48.Si Jesus ang Gisaad Nga Mesiyas

Sa dihang gibuhat sa Dios ang kalibotan, ang tanan hingpit ug wala gayo’y sala. Naghigugmaanay si Adan ug Eva, ug ilang gihigugma ang Dios. Wala pay sakit o kamatayon. Mao kini ang gusto nga paagi sa Dios alang sa kalibotan.

Misulti si Satanas pinaagi sa bitin didto sa tanaman aron mailad niya si Eva. Unya nakasala si Eva ug si Adan batok sa Dios. Tungod kay nakasala man sila, ang tanan nga tawo sa kalibotan magsakit na ug mamatay.

Tungod kay nakasala si Adan ug si Eva, adunay dili maayo nga nahitabo. Nahimo silang kaaway sa Dios. Ug tungod niini, ang tanan nga tawo nga mahimugso sa kalibotan makasasala na ug kaaway na usab sa Dios. Naguba ang relasyon sa Dios ug sa mga tawo tungod sa sala. Apan adunay plano ang Dios aron mabalik kini nga relasyon.

Nagsaad ang Dios nga usa sa mga kaliwat ni Eva maoy modugmok sa ulo ni Satanas, ug samaran ni Satanas ang iyang tikod. Nagpasabot kini nga patyon ni Satanas ang Mesiyas, apan banhawon siya pag-usab sa Dios. Ug unya ang Mesiyas ang moguba sa gahom ni Satanas hangtod sa kahangtoran. Paglabay sa daghan nga mga katuigan, gipadayag sa Dios nga si Jesus mao ang Mesiyas.

Sa dihang giguba sa Dios ang tibuok kalibotan pinaagi sa lunop, naghatag siya ug Arka nga moluwas sa mga tawo nga mituo kaniya. Sa susamang paagi, ang tanang tawo angayan nga mamatay tungod sa ilang mga sala, apan gihatag sa Dios si Jesus aron moluwas sa tanan nga motuo kaniya.

Sa daghan nga mga katuigan, ang mga pari nagpadayon sa paghalad sa mga halad ngadto sa Dios alang sa mga tawo aron ipakita kanila ang silot nga angay nilang madawat tungod sa ilang mga sala. Apan kini nga mga halad dili makawala sa ilang mga sala. Si Jesus ang Labaw nga Pangulong Pari. Dili sama sa uban nga mga pari, gihalad niya ang iyang kaugalingon ingon nga halad aron mawala ang sala sa tanang tawo sa kalibotan. Si Jesus ang hingpit nga pangulong pari, tungod kay iyang gikuha ang silot sa tanan nga sala nga nabuhat sa tawo.

Miingon ang Dios kang Abraham, “Pinaagi kanimo ang tanang grupo sa mga tawo sa kalibotan mapanalanginan.” Kaliwat ni Abraham si Jesus busa ang tanan nga mga grupo sa mga tawo mapanalanginan usab pinaagi kang Jesus. Tungod kay ang tanan nga mituo kang Jesus maluwas gikan sa sala ug mahimong espirituhanong kaliwat ni Abraham.

Sa dihang giingnan sa Dios si Abraham nga ihalad ang iyang anak nga lalaki nga si Isaac, ingon nga usa ka halad, gihatagan siya sa Dios ug karnero nga maoy ihalad puli sa iyang anak lalaki, nga mao si Isaac. Angayan kitang tanan nga mamatay tungod sa atong mga sala! Apan gihatag sa Dios si Jesus, ang Nating Karnero sa Dios, ingon nga halad aron mamatay puli kanato.

Sa dihang nagpadala ang Dios sa pinakaulahi nga katalagman sa Ehipto, giingnan niya ang matag Israelita nga pamilya nga mag-ihaw ug labing maayo nga nating karnero ug ikatag ang dugo niini sa ibabaw ug sa mga kilid sa ilang pultahan. Sa dihang nakita na sa Dios ang dugo, nisaylo lang siya sa ilang mga balay ug wala niya gipatay ang kamagulangan nga mga anak nga lalaki. Gitawag nila kining Pista sa Paglabay sa Anghel.

Si Jesus ang atong Nating Karnero sa Pagsaylo. Hingpit siya ug walay sala sa dihang siya gipatay sa panahon sa pagsa-ulog sa Pagsaylo. Sa pagtuo sa matag usa kang Jesus, ang dugo ni Jesus mao ang bayad alang sa sala nianang tawhana, ug ang silot sa Dios molabay lang nianang tawhana.

Naghimo ang Dios ug kasabotan sa mga Israelita, ang iyang pinili nga katawhan. Apan ang Dios naghimo ug Bag-ong Kasabotan nga alang na sa tanang tawo. Tungod niining Bag-ong Kasabotan, si bisan kinsa nga gikan sa grupo sa mga tawo nga motuo kang Jesus maapil na sa katawhan sa Dios.

Usa ka bantogan nga propeta si Moises ug gisangyaw niya ang pulong sa Dios. Apan si Jesus ang pinakalabaw nga propeta sa tanan. Siya mao ang Dios, busa ang tanan niyang gibuhat ug giingon mao ang buhat ug mga pulong sa Dios. Mao kini ang hinungdan nga gitawag si Jesus nga Pulong sa Dios.

Misaad ang Dios kang David nga ang usa sa iyang mga kaliwat kinahanglan maghari ingon nga usa ka hari sa katawhan sa Dios hangtod sa kahangtoran. Tungod kay si Jesus ang Anak sa Dios, ug ang Mesiyas, siya ang pinasahi nga kaliwat ni David nga magahari hangtod sa kahangtoran.

Si David mao ang hari sa Israel, apan si Jesus ang hari sa tibuok langit ug sa yuta. Mobalik siya pag-usab ug maghari sa iyang gingharian uban ang hustisya ug kalinaw, hangtod sa kahangtoran.

Ang istorya gikan sa Biblia: Genesis 1-3, 6, 14, 22; Exodus 12, 20; 2 Samuel 7; Hebreo 3:1-6, 4:14-5:10, 7:1-8:13, 9:11-10:18; Gipadayag 21