50. Mobalik si Jesus
Sa hapit na 2,000 ka tuig, nagkadaghan na ang mga tawo sa tibuok kalibotan nga nakadungog sa maayong balita mahitungod kang Jesus ang Mesiyas. Nidaghan na ang mga Simbahan. Nagsaad si Jesus nga mobalik siya sa kataposan sa kalibotan. Bisan ug wala pa siya makabalik, tumanon gayod niya ang iyang saad.
Samtang maghulat kita sa pagbalik ni Jesus, gusto sa Dios nga magkinabuhi kita nga balaan ug magpasidungog kaniya. Gusto usab niya nga atong isugilon sa uban ang mahitungod sa iyang gingharian. Sa dihang si Jesus ania pa sa kalibotan nag-ingon siya, “Magsangyaw ang akong mga tinun-an sa maayong balita mahitungod sa gingharian sa Dios ngadto sa tanang tawo sa tibuok kalibotan, ug unya moabot na ang kataposan.”
Daghan sa mga grupo sa katawhan nga wala pa makadungog mahitungod kang Jesus. Sa wala pa siya mibalik sa langit, nagsugo si Jesus sa mga Kristohanon nga imantala ang maayong balita sa mga tawo nga wala pa gayod makadungog niini. Miingon siya, “Lakaw ug himoang mga tinun-an ang tanang grupo sa katawhan!” ug, “Hinog na ang mga tanom sa kaumahan alang sa pag-ani!”
Miingon usab si Jesus, “Ang usa ka ulipon dili molabaw sa iyang agalon. Sama sa mga awtoridad niining kalibotana nga nagdumot kanako, pasakitan kamo ug patyon nila kamo tungod kanako. Bisan tuod nga mag-antos kamo niining kalibotana, pagmadasigon kamo tungod kay napildi ko na si Satanas, ang usa nga nagmando niining kalibotana. Kung kamo magpabilin nga matinud-anon kanako hangtod sa kataposan, ang Dios magluwas kaninyo!”
Gisuginlan ni Jesus ang iyang mga tinun-an ug usa ka istorya aron ipasabot sa mga tawo kung unsa ang mahitabo sa dihang matapos na ang kalibotan. Miingon siya, “Adunay usa ka tawo nga nagtanom ug usa ka maayong binhi sa iyang uma. Samtang natulog siya, ang iyang kaaway miadto ug nagsabwag sa mga binhi sa sagbot aron masagol sa mga trigo, ug unya milakaw siya.”
Sa pagtubo sa mga tanom, ang mga sulugoon sa tawo miingon, “Agalon, nagtanom ka ug maayo nga mga binhi sa uma. Nganong aduna may mga sagbot niini?’ Mitubag ang agalon, “Usa siguro ka kaaway ang nagsabwag kanila.”
“Ug mitubag ang mga sulugoon sa ilang agalon, “Kinahanglan ba namong ibuton ang mga sagbot?” Miingon ang agalon. “Ayaw. Kung buhaton ninyo kana, maibot usab ninyo ang pipila sa mga trigo. Hulata hangtod ang ting-ani ug unya tapoka ang mga sagbot aron sunogon, apan dad-a ang mga trigo dito sa akong kamalig.’”
Wala makasabot ang mga tinun-an kung unsa ang kahulogan sa maong istorya, busa gihangyo nila si Jesus nga ipasabot kini kanila. Miingon si Jesus, “Ang tawo nga nagtanom sa maayong binhi nagsimbolo sa Mesiyas. Ang uma nagsimbulo sa kalibotan. Ang maayong binhi nagsimbolo sa mga tawo sa gingharian sa Dios.”
“Ang mga sagbot nagsimbolo sa mga tawo nga nahisakop ngadto sa daotan. Ang kaaway nga nagtanom sa mga sagbot nagsimbolo sa yawa. Ang pag-ani nagsimbolo sa kataposan sa kalibotan, ug ang mga mangangani nagsimbolo sa mga anghel sa Dios.
Sa pag-abot na sa kataposan sa kalibotan, tapokon sa mga anghel ang tanang katawhan nga nahisakop sa yawa ug ilabay sila didto sa nagdilaab nga kalayo, diin sila magahilak ug magakagot sa ilang mga ngipon diha sa hilabihan nga pag-antos. Unya ang mga matarong mosidlak sama sa adlaw didto sa gingharian sa Dios nga ilang Amahan.”
Miingon usab si Jesus nga siya mobalik sa dili pa matapos ang kalibotan. Mobalik siya sa samang paagi sa iyang pagbiya, susama sa iyang lawasnong lawas ug moabot sa ibabaw sa panganod diha sa kalangitan. Sa pagbalik ni Jesus, ang matag Kristohanon nga namatay mabanhaw gikan sa mga patay ug motagbo kaniya didto sa langit.
Unya ang mga Kristohanon nga nagpabiling buhi pagabayawon ngadto sa langit ug makig-uban sa mga Kristohanon nga nabanhaw gikan sa mga patay. Ug silang tanan makauban na ni Jesus didto. Human niana, magpuyo si Jesus kauban ang iyang katawhan diha sa hingpit nga kalinaw ug panaghiusa hangtod sa kahangtoran.
Nagsaad si Jesus nga maghatag ug korona sa tanan nga motuo kaniya. Mabuhi sila ug maghari kauban sa Dios diha sa hingpit nga kalinaw hangtod sa kahangtoran.
Apan pagahukman sa Dios ang tanan nga wala motuo kang Jesus. Ipanglabay niya sila didto sa impiyerno, diin maghilak sila ug magkagot sa ilang mga ngipon sa kasakit hangtod sa kahangtoran. Ang kalayo didto nga dili gayod mapalong kanunay magasunog kanila, ug ang mga ulod walay hunong sa pagkaon kanila.
Sa pagbalik ni Jesus, laglagon gayod niya sa hingpit si Satanas ug ang iyang gingharian. Ilabay niya si Satanas sa impiyerno diin masunog siya hangtod sa kahangtoran, kauban kadtong nagpili sa pagsunod kaniya kaysa pagtuman sa Dios.
Tungod kay wala mituman sa Dios si Adan ug si Eva ug nagdala sa sala dinhi sa kalibotan, gitunglo kini sa Dios ug nakahukom nga laglagon kini. Apan sa umaabot nga adlaw maghimo ang Dios ug usa ka bag-ong langit ug bag-ong kalibotan nga hingpit.
Magpuyo si Jesus ug ang iyang mga katawhan sa bag-o nga kalibotan, ug magahari siya sa tanan. Pahiran niya ang matag luha ug wala nay pag-antos, kagul-anan, panaghilak, pagkadaotan, kasakit o kamatayon. Magahari si Jesus sa iyang gingharian inubanan sa kalinaw ug hustisya, ug kauban na niya ang iyang mga katawhan hangtod sa kahangtoran.
Istorya gikan sa Biblia: Mateo 24:14; 28:18; Juan 15:20, 16:33; Gipadayag 2:10; Mateo 13:24-30, 36-42; 1 Tesalonica 4:13-5:11; Santiago 1:12; Mateo 22:13; Gipadayag 20:10, 21:1-22:21