35. Ang Maluluy-on nga Amahan

Usa ka adlaw, gitudloan ni Jesus ang mga maniningil ug buhis ug ubang makasasala nga nagtapok aron maminaw kaniya.

Ang ubang pangulo sa relihiyon nga nakakita kang Jesus nga nakig-amigo sa mga makasasala, unya ila siyang gisaway. Mao nga nagsaysay si Jesus ug istorya.

"Adunay usa ka lalaki nga anaay duha ka anak nga lalaki. Ang manghod nga lalaki miingon sa iyang amahan, 'Amahan, gusto na nakong kuhaon ang akong panulondon karon dayon!' Mao nga gibahinbahin sa amahan ang iyang katigayonan alang sa iyang duha ka anak."

Gitapok sa manghod nga anak nga lalaki ang tanan nga iyang gipanag-iyahan ug giusik-usikan ang iyang kwarta sa kalibutanong mga buhat.”

"Pagkahuman, usa ka grabe nga tinggutom ang nahitabo sa dapit diin atua ang manghod nga anak nga lalaki, ug wala na siyay kuwarta nga ikapalit ug pagkaon. Mao nga mitrabaho siya, tigbahog sa mga baboy. Makalolooy ug gutom kaayo siya nga gusto na niya kaunon ang pagkaon sa mga baboy."

"Sa kataposan, ang manghod nga anak miingon sa iyang kaugalingon, "Unsa man kining akong gibuhat? Ang tanan nga sulugoon sa akong amahan daghan ug pagkaon nga makaon, Mobalik ko sa akong amahan ug maghangyo ko kaniya nga mahimong iyang sulugoon.

"Ang manghod nga anak mipauli sa balay sa iyang amahan. Sa diha nga layo pa siya, nakita siya sa iyang amahan ug nalooy. Midagan siya sa iyang anak ug gigakos ug gihalokan kini."

"Ang anak miingon, 'Amahan, nakasala ako batok sa Dios ug batok kanimo. Dili na ako takos aron mahimo nimong anak.

"Apan ang iyang amahan miingon sa iyang sulugoon, 'Lakaw ug dalaha ang pinaka maayong biste ug ipasul-ob kini sa akong anak! Sul-obi siyag sing-sing sa iyang tudlo ug hatagi siyag sandal sa iyang tiil. Ug ihawa ang labing maayo nga nating baka aron kita magsaulog, tungod kay ang akong anak nga lalaki patay na, apan karon buhi na siya! Siya nawala, apan karon nakit-an na!

"Ang mga tawo nagsaulog. Sa wala madugay, ang magulang nga anak niabot sa balay gikan sa pagtrabaho sa uma. Nadungog niya ang tugtog ug pagsayaw mao nga natingala siya unsa ang nahitabo."

"Sa dihang nahibaw-an sa magulang nga anak nga nagsaulog sila tungod kay niuli na ang igsoon niya, nasuko siya pag-ayo ug wala misulod sa balay. Nigawas ang iyang amahan ug nihangyo kaniya nga mosulod ug magsaulog kauban nila, apan siya wala misugot."

"Ang magulang nga anak miingon sa iyang amahan, 'Sa pipila ka niaging tuig matinud-anon ko nga nagtrabaho kanimo! Wala gayud ako nagsupak kanimo, unya wala man lang ko nimo gihatagan bisag usa lang ka gamay nga kanding aron makasaulog ko kauban sa akong mga higala. Apan kining anak nimo nga nag-usik-usik sa imong kwarta sa makasasala nga binuhatan niabot, giihawan dayon nimo siya ug labing maayo nga nating baka!"

"Mitubag ang amahan, 'Anak, kanunay kang anaa kanako, ug ang tanan nga gipanag-iyahan nako imuha. Apan angay kitang magsaulog, tungod kay ang imong manghod nga lalaki namatay, apan karon buhi na. Siya nawala, apan karon nakit-an na!

Istorya gikan sa Biblia: Lucas 15:11-32