49. Ang Bag-ong Kasabotan sa Dios

Giingnan sa usa ka anghel ang ulay nga ginganlan ug Maria nga siya maoy maghimugso sa Anak sa Dios. Busa samtang ulay pa siya gilamdagan siya sa Balaang Espiritu ug namabdos siya. Nanganak siya ug usa ka batang lalaki ug ginganlan siya’g Jesus. Tungod niana, si Jesus nahimong Dios ug Tawo.

Si Jesus naghimo ug mga milagro nga nagpamatuod nga siya ang Dios. Nilakaw siya ibabaw sa tubig, gipahunong ang mga bagyo, nag-ayo sa daghang mga masakiton, nag-abog sa mga demonyo, nagbanhaw sa mga patay, ug gihimo niya ang lima ka tinapay ug duha ka gagmay’ng isda nga igo aron makakaon ang kapin sa 5,000 ka mga tawo.

Si Jesus mao usab ang bantogan nga magtutudlo, ug nagsulti siya uban ang gahom tungod kay siya ang Anak sa Dios. Gitudlo niya nga kinahanglan higugmaon ninyo ang inyong isigkatawo sama sa paagi sa paghigugma ninyo sa inyong kaugalingon.

Gitudlo usab niya nga kinahanglan ninyo higugmaon ang Dios nga labaw kaysa tanan nga anaa kaninyo, lakip ang inyong katigayanonan.

Nag-ingon si Jesus nga ang gingharian sa Dios mas bililhon pa kaysa bisan unsa dinhi sa kalibotan. Apan ang pinakaimportanteng butang alang sa tanan mao ang pagpasakop sa gingharian sa Dios. Aron makasulod sa gingharian sa Dios, kinahanglan nga maluwas kamo gikan sa inyong mga sala.

Nagtudlo si Jesus nga ang pipila sa mga tawo magadawat kaniya ug mamaluwas, apan ang uban dili. Miingon siya nga ang pipila ka mga tawo sama sa maayong yuta. Gidawat nila ang maayong balita ni Jesus ug nangaluwas. Ug ang uban nga mga tawo sama sa gahi nga yuta diha sa dalan, diin ang binhi nga mao ang pulong sa Dios wala makasulod ug wala makahatag sa ani. Kadtong mga tawo nga nagsalikway sa mensahe mahitungod kang Jesus dili makasulod sa iyang gingharian.

Si Jesus nagtudlo nga gihigugma sa Dios pag-ayo ang mga makasasala. Gusto niya silang mapasaylo ug himuon nga iyang mga anak.

Nag-ingon usab si Jesus nga ang Dios masuko sa sala. Sa dihang nakasala si Adan ug Eva, nakaepekto kini sa tanan niyang kaliwatan. Tungod niini, ang matag tawo sa kalibotan nakasala ug nahimulag gikan sa Dios. Ug busa, ang tanan nahimong kaaway sa Dios.

Apan ang Dios nahigugma pag-ayo sa tanang tawo sa kalibotan busa iyang gihatag ang iyang Bugtong Anak aron nga si bisan kinsa nga mutuo kang Jesus dili silotan tungod sa ilang mga sala, ug magpuyo uban sa Dios hangtod sa walay kataposan.

Tungod sa inyong mga sala, sad-an kamo ug angayan nga mamatay. Nasuko gayod ang Dios kaninyo, apan gipagawas niya ang iyang kasuko ngadto kang Jesus, inay kaninyo. Sa dihang si Jesus namatay ibabaw sa krus, gidawat niya ang silot alang kaninyo.

Si Jesus wala gayod makasala, apan gipalabi niya nga silotan ug mamatay ingon nga hingpit nga halad aron mokuha sa atong mga sala ug sa mga sala sa matag usa dinhi sa kalibotan. Tungod kay gihatag ni Jesus ang iyang kaugalingon ingon nga halad, makapasaylo na ang Dios sa bisan unsang sala, bisan pa ug bug-at nga kasal-anan.

Dili makaluwas kaninyo ang maayong mga buhat. Wala kamo’y mahimo aron mabatonan ang relasyon sa Dios. Si Jesus lang ang makahinlo sa inyong mga sala. Kinahanglan nga motuo kamo nga si Jesus mao ang Anak sa Dios, ug namatay siya sa krus puli kaninyo, ug ang Dios nagbanhaw kaniya pag-usab.

Ang Dios moluwas ni bisan kinsa nga motuo kang Jesus ug modawat kaniya ingon nga ilang Agalon. Apan dili siya moluwas niadtong dili motuo kaniya. Dili babag kung kamo dato o kabos, lalaki o babaye, tigulang o batan-on, o kung asa ka nagpuyo. Nahigugma ang Dios kaninyo ug gusto niya nga motuo kita kang Jesus aron makabaton siya ug suod nga relasyon kaninyo.

Gidapit kamo ni Jesus aron sa pagtuo kaniya ug sa pagpabawtismo. Motuo ba kamo nga si Jesus mao ang Mesiyas, ang Bugtong Anak sa Dios? Motuo ba kamo nga ikaw usa ka makasasala ug angayan ka silotan sa Dios? Motuo ba kamo nga namatay si Jesus didto sa krus aron sa pagkuha kanimo gikan sa imong mga sala?

Kung mituo kamo kang Jesus ug sa iyang gihimo sa inyong kinabuhi, kamo usa na ka Kristohanon! Gikuha kamo sa Dios gikan sa gingharian ni Satanas nga mao ang kangitngit ug gibutang kamo niya sa gingharian sa Dios nga mao ang kahayag. Gikuha na sa Dios ang inyong karaan, nga makasasalang paagi sa pagbuhat sa mga butang, ug gihatagan na kamo sa bag-o, ug matarong nga pagkinabuhi.

Kung kamo usa ka Kristohanon, gipasaylo na kamo sa Dios sa inyong mga sala tungod sa gibuhat ni Jesus. Ug karon, giila na kamo ingon nga suod nga higala sa Dios ug dili na usa ka kaaway.

Kung kamo usa na ka higala sa Dios ug sulugoon ni Jesus nga mao ang Agalon, pagatumanon ninyo kung unsa ang gitudlo ni Jesus kaninyo. Bisan tuod kamo Kristohanon na, matintal gihapon kamo sa sala. Apan ang Dios matinud-anon ug nag-ingon nga kung inyong isugid ang inyong mga sala, pasayluon kamo niya. Ug pagahatagan sa kusog sa pagpakig-away batok sa sala.

Ang Dios nag-ingon kaninyo nga mag-ampo, magtuon sa iyang pulong, magsimba kaniya kauban ang mga Kristohanon, ug isulti sa uban kung unsa ang nabuhat sa Dios kaninyo. Kining tanan nga mga butang makatabang kanimo aron makabaton ug malig-on nga relasyon sa Dios.

Istorya gikan sa Biblia: Roma 3:21-16, 5:1-11 Juan 3:16; Marcus 16:16; Colosas 1:13-14; II Corinto 5:17-21; I Juan 1:5-10