8. Giluwas sa Dios si Jose ug ang Iyang Panimalay

Paglabay sa daghang mga katuigan, sa dihang tigulang na kaayo si Jacob, gisugo niya ang iyang pinalangga nga anak nga lalaki nga si Jose, sa pagduaw sa iyang mga igsoon nga lalaki nga nag-atiman sa ilang mga kahayopan.

Nasuko kang Jose ang iyang mga igsoon tungod kay gihigugma man kaayo siya sa ilang amahan, ug nagdamgo pa nga siya maoy mangulo kanila. Sa dihang miduaw si Jose sa iyang mga igsoong lalaki, gidagit nila siya ug gibaligya ngadto sa pipila ka mga negosyante nga nagapamalit ug ulipon.

Sa wala pa makabalik ang mga igsoong lalaki ni Jose sa ilang panimalay, gigisi nila ug gituslob nila sa dugo sa kanding ang sinina ni Jose. Unya gipakita nila sa ilang amahan ang sinina aron makahunahuna siya nga ang ihalas nga mananap ang nagpatay kang Jose. Naguol pag-ayo si Jacob mahitungod niini.

Gidala sa mga negosyante si Jose ngadto sa Ehipto. Ang Ehipto usa ka dako ug gamhanan nga nasod, nga nahimutang duol sa Suba sa Nilo. Gibaligya sa mga negosyante si Jose ingon nga usa ka sulugoon ngadto sa dato nga opisyal sa Ehipto. Gialagaran ni Jose ang iyang agalon pag-ayo, ug gipanalanginan sa Dios si Jose.

Misulay sa pagpakigdulog kang Jose ang asawa sa iyang agalon, apan dili gusto ni Jose nga makasala batok sa Dios. Tungod niini nasuko ang babaye kang Jose, hinungdan nga gidakop ug gipriso siya kay gipasanginlan man siya ug bakak. Bisan sa prisohan, nagmatinud-anon gihapon si Jose sa Dios, ug ang Dios nagpanalangin kaniya.

Human sa duha ka tuig, napriso pa gihapon si Jose, bisan tuod wala siyay sala. Usa ka gabii niana, ang Paraon nga maoy hari sa mga Ehiptohanon, adunay duha ka damgo nga nakahasol pag-ayo kaniya. Walay usa sa iyang mga magtatambag ang nakahibalo sa kahulogan sa maong mga damgo.

Ang Dios naghatag kang Jose ug abilidad sa paghubad sa mga damgo, busa gipakuha siya sa Paraon gikan sa prisohan. Gihubad ni Jose ang damgo sa hari sa Ehiptohanon nga nag-ingon, “Magpadala ang Dios ug pito ka tuig nga abunda sa ani, ug mosunod niini ang pito ka tuig sa kagutom.”

Nahimuot pag-ayo si Paraon kang Jose ug tungod niini gibutang siya ingon nga sunod kaniya nga gamhanan sa tanang tawo sa tibuok Ehipto!

Giingnan ni Jose ang tanan nga katawhan nga magtigom ug daghang pagkaon sulod sa pito ka tuig samtang maayo pa ang ani. Pag-abot sa pito ka tuig nga kagutom gibaligya ni Jose ang mga pagkaon ngadto sa katawhan aron anaa silay saktong makaon.

Misamot ang kagutom dili lang sa Ehipto, kondili miabot usab sa Canaan diin nagpuyo si Jacob ug ang iyang pamilya.

Busa gipaadto ni Jacob sa Ehipto ang iyang kamagulangang mga anak nga lalaki aron mamalit ug pagkaon. Ang mga igsoong lalaki wala makaila kang Jose sa dihang sila nagtindog sa iyang atubangan aron magpalit ug pagkaon. Apan si Jose nakaila kanila.

Human niya gisulayan ang iyang mga igsoon kung nausab na ba gayod sila, miingon siya kanila, “Ako ang inyong igsoon nga si Jose! Ayaw kamo kahadlok. Daotan ang inyong gihimo kanako sa dihang inyo akong gibaligya ingon nga sulugoon, apan gigamit sa Dios ang daotan alang sa maayo! Dinhi na kamo puyo sa Ehipto aron makahatag ako kaninyo ug sa tibuok ninyo nga pamilya.”

Sa dihang namalik ang mga igsoon ni Jose sa ilang panimalay, ug ilang gisultihan ang ilang amahan nga si Jacob, nga buhi pa si Jose, nalipay pag-ayo siya.

Bisan tuod tigulang na si Jacob, mibalhin gihapon siya ug puyo didto sa Ehipto uban sa tanan niya'ng pamilya. Sa wala pa mamatay si Jacob, gipanalanginan niya ang matag usa sa iyang mga anak nga lalaki.

Ang saad sa kasabotan nga gihatag sa Dios kang Abraham napasa ngadto kang Isaac, unya ngadto kang Jacob, ug ngadto usab sa dose (12) ka mga anak nga lalaki ni Jacob ug sa ilang mga pamilya. Ang kaliwat sa dose (12) ka mga anak nga lalaki ni Jacob nahimo nga dose (12) ka tribo sa Israel.

Istorya gikan sa Biblia: Genesis 37-50