11. Ang Pagsaylo

Ang Dios nagpasidaan kang Paraon nga kung dili niya palakwon ang mga Israelita, iyang pamatyon ang tanan nga kinamagulangan nga anak nga lalaki sa mga tawo ug mananap. Sa pagkadungog ni Paraon niini, nagpabilin gihapon siya sa pagbalibad sa pagtuo ug pagtuman sa Dios.

Ang Dios naghatag ug paagi sa pagluwas sa unang anak nga lalaki sa bisan kinsa nga anaay pagtuo kaniya. Ang matag pamilya magpili ug hingpit nga nating karnero ug ila kining ihawon.

Ang Dios nag-ingon sa mga Israelita magbotang ug dugo sa nating karnero sa tibuok pultahan sa ilang balay, ug lutoon ang karne niini ug kan-on dayon kini, uban ang hinimong pan nga walay patubo. Siya usab nag-ingon kanila nga mangandam sa pagbiya sa Ehipto human sila makakaon.

Ang mga Israelita nagtuman gayod sa tanan nga gisugo sa Dios. Sa tungang gabii, ang Dios miadto sa tibuok Ehipto ug gipamatay ang tanang kinamagulangang anak nga lalaki.

Ang tanang kabalayan sa mga Israelita anaay dugo libot sa ilang pultahan, ug gisayloan sa Dios ang ilang mga balay. Ang tanan nga anaa sa sulod sa balay naluwas. Sila nangaluwas tungod sa dugo sa nating karnero.

Apan ang mga Ehiptohanon wala mutuo o motuman sa mando sa Dios. Mao nga wala gisayloan sa Dios ang ilang mga balay. Gipamatay sa Dios ang tanan nga kinamagulangan nga anak nga lalaki sa mga Ehiptohanon.

Ang tanang kinamagulangang anak nga lalaki sa mga Ehiptohanon namatay, gikan sa kinamagulangang anak sa piniriso, ngadto sa kinamagulangang anak ni Paraon. Daghang katawhan sa Ehipto ang nanghilak ug nagbakho tungod sa tumang kaguol.

Nianang gabhiona, gipatawag ni Paraon si Moises ug si Aaron ug nag-ingon, “Kuhaa ang mga Israelita ug pahawa kamo dinhi sa Ehipto karon dayon!” Ang mga katawhan sa Ehipto mismo maoy naghangyo nga mobiya diha-diha dayon ang mga Israelita.

Istorya gikan sa Biblia: Exodus11:1-12:32