39. Si Jesus Sa Hukmanan
Karon sa pagkatungang gabii, gidala sa mga sundalo si Jesus sa balay sa pangulong pari aron siya pangutan-on. Misunod si Pedro apan layo lang siya kanila. Sa dihang gidala si Jesus sa balay nagpabilin lang si Pedro sa gawas ug nagpainit duol sa kalayo.
Sa sulod sa balay, gisugdan na ug pangutana si Jesus sa mga pangulo sa mga Judio. Daghan ang mitestigo ug mga bakak mahitungod kaniya apan wala magka-uyon ang ilang mga gipanulti, busa dili mapamatud-an sa mga pangulo sa Judio nga sad-an siya sa bisan unsa. Naghilom lang si Jesus ug walay gisulti.
Sa kataposan, mitan-aw ang labaw’ng pari kang Jesus ug miingon, “Sultihi kami, ikaw ba ang Mesiyas nga Anak sa Buhing Dios?”
Mitubag si Jesus,” “Oo ako, ug makita ninyo nga maglingkod ako kauban ang Dios ug mobalik gikan sa langit.” Nasuko ang labaw’ng pari ug gigisi niya ang iyang sinina. Misinggit siya sa laing relihiyosong mga pangulo, “Dili na nato kinahanglan ang mga testigo! Nakadungog kamo nga miingon siya nga siya ang Anak sa Dios. Unsa man ang inyong hukom?
Ang tanan nga mga pangulo sa mga Judio mitubag sa labaw’ng pari, “Angay siyang patyon!” Unya ilang gitaptapan si Jesus, giluwaan, gibunalan, ug gibugal-bugalan siya.
Samtang naghulat si Pedro sa gawas sa balay, nakit-an siya sa usa ka babaye nga sulugoon ug giingnan siya, "Kauban ka usab ni Jesus!” Gilimod kini ni Pedro. Taud-taud niana, adunay lain nga babaye nga nag-ingon sa samang paagi ug gilimod kini pag-usab ni Pedro. Sa kataposan, miingon ang mga tawo didto, “Nakahibalo gayod kami nga kauban ka ni Jesus tungod kay kamong duha gikan man sa Galilea.”
Apan nanumpa si Pedro nga miingon, “Tungluhon unta ako sa Dios kung nakaila ako niining tawhana!" Diha-diha dayon, mituktugaok ang manok, ug milingi si Jesus ug mitan-aw kang Pedro.
Nilakaw si Pedro ug mihilak siya pag-ayo. Sa kasamtangan, si Judas nga magluluib nakakita nga gihukman si Jesus nga pat-yon sa mga pangulo sa Judio. Naguol siya pag-ayo, ug milakaw palayo ug naghikog siya.
Pagkasunod adlaw, sayo sa kabuntagon, gidala sa mga pangulo sa mga Judio si Jesus didto kang Pilato, ang Romano nga gobernador. Nagdahom sila nga mahukman si Jesus nga sad-an ug pagapatyon siya. Nangutana si Pilato kang Jesus, “Ikaw ba ang hari sa mga Judio?”
Mitubag si Jesus kaniya, “Gisulti na nimo, apan ang akong gingharian wala dinhi niining kalibotana. Kung dinhi pa sa kalibotan ang akong gingharian, nakig-away na unta ang akong mga sulugoon alang kanako. Mianhi ako sa kalibotan aron isulti sa mga tawo ang kamatuoran. Ug ang tanan nga nahigugma sa kamatuoran maminaw kanako.” Nangutana si Pilato, “Unsa ba ang kamatuoran?”
Pagkahuman niyag pakigsulti kang Jesus, migawas siya didto sa katawhan ug miingon, “Wala akoy nakita nga sala niining tawhana.” Apan ang mga pangulo sa mga Judio ug ang mga katawhan naninggit, “Ilansang siya sa krus!” Mitubag si Pilato, “Wala man siyay sala.” Apan gipakusgan pa gayod nilag singgit. Sa ikatulong higayon miingon si Pilato, “Dili gayod siya sad-an!”
Nahadlok si Pilato nga magkagubot ang katawhan busa misugot siya nga ilansang sa mga sundalo si Jesus. Gilatos siya sa mga Romanong sundalo, gisul-oban ug usa ka harianong kapa, ug gikoronahan siyag tunokon. Gibugal-bugalan nila si Jesus, “Tan-awa ninyo, ang Hari sa mga Judio!”
Ang Istorya Gikan sa Biblia: Mateo 26:57-27:26; Marcos 14:53-15:15; Lucas 22:54-23:25; Juan 18:12-19:16