10. Ang Napulo ka Katalagman

Unya miadto si Moises ug si Aaron kang Paraon. Sila miingon, “Mao kini ang giingon sa Dios sa Israel, ‘Tugoti ang akong katawhan sa paglakaw!’” Apan wala naminaw si Paraon kanila. Wala niya tugoti ang mga Israelita nga molakaw nga gawasnon, iya hinuon silang gipugos sa mga bug-at nga trabahoon!

Nagpadayon si Paraon pagbalibad sa pagpalakaw sa mga katawhan, ug tungod niini nagpadala ang Dios ug napulo ka makalilisang nga mga katalagman sa Ehipto. Pinaagi niini nga mga katalagman, gipakita sa Dios kang Paraon nga siya lamang ang pinakagamhanan kay sa kang Paraon ug sa tanang diosdios sa Ehipto.

Ug gihimo sa Dios nga dugo ang Suba sa Nilo, apan si Paraon nagpabilin nga dili mosugot nga makalakaw ang mga Israelita.

Nagpadala ang Dios ug mga baki sa tibuok Ehipto, ug nagpakiluoy si Paraon kang Moises nga kuhaon ang mga baki. Apan sa nangamatay na ang tanang mga baki, si Paraon nagpagahi sa iyang kasingkasing ug dili tugotan ang mga Israelita sa pagbiya sa Ehipto.

Unya ang Dios nagpadala ug katalagman nga mga tagnok. Unya nagpadala siya ug katalagman nga mga langaw. Gitawag ni Paraon si Moises ug si Aaron nga nag-ingon nga kung ilang pahunungon ang katalagman, makahimo na nga makabiya ang mga Israelita sa Ehipto. Sa dihang nag-ampo si Moises, gipapahawa sa Dios ang tanan nga mga langaw diha sa Ehipto. Apan si Paraon nagpagahi sa iyang kasingkasing ug wala mitugot nga makagawas ang katawhan.

Pagkasunod, gipadad-an sa Dios ug sakit ang tanang mga binuhing mananap sa mga Ehiptohanon ug nangamatay. Apan nagmagahi gihapon ang kasingkasing ni Paraon, ug wala gihapon siya mitugot nga makagawas ang mga Israelita.

Unya giingnan sa Dios si Moises nga magkuha ug abo ug isabwag sa hangin atubangan ni Paraon. Human niya kadto buhata, ang sakit nga mga hubag sa panit modangat sa tibuok Ehiptohanon, apan wala maapil ang mga Israelita.” Gipagahi sa Dios ang kasingkasing ni Paraon, ug wala siya mutugot nga palakwon ang mga Israelita nga gawasnon.

Human niana, nagpadala ang Dios ug yelo nga makadaot sa halos tanan nga mga tanom sa Ehipto ug mopatay ni bisan kinsa nga mogawas. Gipatawag ni Paraon si Moises ug si Aaron ug nag-ingon kanila, “Nakasala ako. Makalakaw na kamo.” Mao nga nag-ampo si Moises, ug niundang ang yelo gikan sa kawanangan.

Apan si Paraon nakasala pag-usab ug nagpagahi sa iyang kasingkasing. Wala niya tugoti nga molakaw ang mga Israelita nga gawasnon.

Unya ang Dios nagpadala ug dulon sa tibuok Ehipto. Ang dulon nikaon sa tanan nga mga tanom nga wala nadaot sa ulan nga yelo.

Unya ang Dios nagpadala ug kangitngit nga midangat sa tulo ka adlaw. Ngitngit kaayo hinungdan nga ang mga Ehiptohanon dili gayod makagawas sa ilang balay. Apan hayag didto sa gipuy-an sa mga Israelita.

Bisan human pa niining siyam ka katalagman, si Paraon nagdumili gihapon ug wala niya palakwa nga gawasnon ang mga Israelita. Tungod kay dili gayod maminaw si Paraon, ang Dios nagplano ug kataposang katalagman. Kini maoy makapausab sa hunahuna ni Paraon.

Istorya gikan sa : Exodus 5-10