22. Ang Pagkatawo ni Juan
Kaniadto, nakigsulti ang Dios sa iyang katawhan pinaagi sa mga anghel ug mga propeta. Apan 400 ka tuig na ang milabay nga wala siya makigsulti kanila. Sa kalit lang ang anghel miabot uban ang mensahe nga gikan sa Dios ngadto sa tigulang nga pari nga ginganlan ug Zacarias. Diosnon nga mga tawo si Zacarias ug si Elizabeth nga iyang asawa, apan wala gayod siya makabaton ug anak.
Giingnan sa anghel si Zacarias, “Manganak ug lalaki ang imong asawa. Nganlan nimo siya ug Juan. Mapuno siya sa Balaang Espiritu, ug andamon niya ang mga tawo sa pag-abot sa Mesiyas!” Mitubag si Zacarias, “Ako ug ang akong asawa tigulang na aron makabaton pa ug mga anak! Unsaon man nako pagkahibalo nga matuman kana?”
Mitubag ang anghel kang Zacarias, “Gipadala ako sa Dios aron sa pagsulti kaninyo niining maayong balita. Ug tungod kay wala ka man motuo kanako, maamang ka hangtod nga matawo ang bata.” Dihadiha dayon, dili na makasulti si Zacarias. Ug unya mibiya na ang anghel kang Zacarias. Human niini mipauli si Zacarias sa iyang panimalay ug nagmabdos na ang iyang asawa.
Sa dihang unom na ka bulan ang pagmabdos ni Elizabet, mipakita na usab ang susamang anghel kang Maria nga paryente ni Elizabet. Ulay siya nga babaye nga gipamalay-an na sa usa ka tawo nga ginganlan ug Jose. Miingon ang anghel, “Magmabdos ka ug manganak ug usa ka lalaki. Nganlan nimo siya ug Jesus. Mahimo siya nga anak sa Labing Halangdon nga Dios ug magahari sa walay kataposan.”
Mitubag si Maria, “Unsaon man niana pagkahitabo nga usa man man ako ka ulay?” Ug gipasabot siya sa anghel, “Mokunsad kanimo ang Balaang Espiritu, ug ang sa gahom sa Dios magapandong kanimo. Busa ang bata balaan, ang Anak sa Dios,” Nagtuo si Maria ug nagdawat sa gisulti sa anghel.
Pagkahuman sa pagpakigsulti sa anghel kang Maria, miadto siya ug miduaw kang Elizabet. Sa dihang nadungog ni Elizabet ang tingog ni Maria nga nangayo ug katahoran, milihok ang bata sa iyang sabakan. Naglipay ang mga babaye sa gibuhat sa Dios kanila. Human sa pagbisita ni Maria kang Elizabeth sulod sa tulo ka bulan, mipauli si Maria sa iyang pinuy-anan.
Human manganak si Elizabet sa iyang bata nga lalaki, ginganlan ni Zacarias ug Elizabet ang bata ug Juan, sumala sa gisugo sa anghel. Unya si Zacarias nga naamang, gipasuliti na pag-usab sa Dios. Miingon si Zacarias, “Dalaygon ang Dios, tungod kay wala na niya kalimti ang iyang katawhan! Ikaw, akong anak, pagatawgon nga propeta sa Labing Halangdon nga Dios nga magasulti sa mga tawo kung unsaon nga mapasaylo sila sa ilang mga sala!”
Istorya gikan sa Biblia: Lucas 1