Daniel

Daniel 1

Daniel 1:1-2

Kanus-a man gisulong ug gipalibotan ni Nebucadnezar nga hari sa Babilonia ang Jerusalem ug giundang ang pagdawat niini sa tanang galamiton?

Gisulong ni Nebucadnezar ang Jerusalem sa ikatulo ka tuig sa paghari ni Jehoyakim nga Juda.

Kinsa man ang naghatag ug kadaogan kang Nebucadnezar batok kang Jehoyakim nga hari sa Juda?

Ang Ginoo maoy naghatag ug kadaogan kang Nebucadnezar batok kang Jehoyakim.

Daniel 1:3-5

Unsa man ang gisulti sa hari kang Ashpenas nga buhaton?

Gisultihan sa hari si Ashpenas nga dad-on ang pipila ka mga tawo sa Israel, lakip ang mga harianong kaliwat ug halangdon.

Unsa mang klasing batan-ong mga lalaki ang gusto sa hari nga dad-on ngadto sa Babilonia?

Gusto sa hari ang mga batan-ong lalaki nga walay ikasaway, ambongan, batid sa tanang kaalam, puno sa kahibalo ug panabot, angayang moalagad sa palasyo sa hari.

Unsa man ang ipakaon sa mga batan-ong lalaki?

Pakan-on sila sa lamiang kalan-on ug bino sa hari sa matag adlaw .

Daniel 1:6-7

Unsa man ang ngalan sa pipila ka mga batan-ong lalaki nga gikan sa Israel ug unsa man ang gihatag nga mga ngalan sa pangulong opisyal?

Ang mga ngalan sa batan-ong lalaki ug ang gipangalan kanila sa pangulong opisyal: Si Daniel ginganlan ug Belteshazar, si Hanania ginganlan ug Sadrac, si Mishael ginganlan ug Mesac, ug si Azaria ginganlan ug Abednego.

Daniel 1:8-10

Unsa man ang nahukoman ni Daniel sa iyang hunahuna?

Nakahukom si Daniel sa iyang hunahuna nga dili niya hugawan ang iyang kaugalingon pinaagi sa lamiang kalan-on o bino sa hari.

Unsa man ang gitubag sa pangulong opisyal sa dihang nanghangyo si Daniel nga dili niya hugawan ang iyang kaugalingon pinaagi sa lamiang kalan-on ug ilimnon sa hari?

Miingon ang pangulong opisyal kang Daniel nga nahadlok siya sa hari, nga ang hari maoy nagsugo kung unsay kan-on ug imnon ni Daniel ug tingali patyon sa hari ang pangulong opisyal kung makita si Daniel sa hari nga dili himsog kay sa ubang mga batan-ng lalaki nga kaidad ni Daniel.

Daniel 1:11-13

Unsa man ang gihangyo ni Daniel sa tig-atiman nga gitahasan kang Daniel, kang Hananias, kang Mishael ug kang Azaria?

Gihangyo ni Daniel ang tig-atiman nga sulayan una sila sulod sa napulo ka mga adlaw pinaagi sa pagpakaon kanila ug utanon ug tubig aron pagaimnon ug human sa napulo ka mga adlaw itandi sila sa ubang mga batan-ong lalaki nga nagkaon sa lamiang kalan-on sa hari ug unya hukman sila basi sa iyang nakita.

Daniel 1:14-16

Human sa pag-uyon sa sinaligan sa pagsulay, unsa man ang iyang nakita human sa napulo ka adlaw sa pagtandi kang Daniel, kang Hanania, kang Mishael ug kang Azaria ngadto sa ubang mga batan-ong lalaki?

Nakita sa sinaligan nga mas nihimsog pa gayod ang barog ni Daniel, ni Hanania, ni Mishael ug ni Azaria kay sa kadtong mga batan-ong lalaki nga nagkaon sa lamiang kalan-on sa hari.

Daniel 1:17-18

Unsa man ang gihatag sa Dios ngadto kang Daniel, kang Hanania, kang Mishael ug kang Azaria?

Gihatagan sila sa Dios ug kahibalo ug panabot sa tanang basahon ug kaalam, ug masabtan gayod ni Daniel ang tanang matang sa panan-awon ug sa mga damgo.

Daniel 1:19-21

Unsa man ang nakita sa hari sa dihang nakigsulti siya sa tanang grupo sa mga batan-ong lalaki?

Nakita sa hari nga walay makatandi kang Daniel, kang Hanania, kang Mishael ug kang Azaria. Sa matag pangutana sa kaalam ug kahibalo nga gipangutana sa hari kanila, nakita niya nga sila mas maayo sa pito ka pilo kay sa tanang mga salamangkero ug niadtong nag-angkon nga makasulti sa patay, nga anaa sa iyang tibuok gingharian.

Unsa man kadugay nga nagpuyo si Daniel sa Babilonia?

Nagpuyo siya didto hangtod sa unang tuig sa paghari ni Haring Cyrus.

Daniel 2

Daniel 2:1-4

Kanus-a man nagdamgo si Nebucadnezar ug mga damgo nga nakahasol sa iyang hunahuna ug maoy hinungdan nga dili siya makatulog?

Nahitabo kini sa ikaduhang tuig sa iyang paghari.

Nganong gipatawag man sa hari ang mga salamangkero, mga manglalamat, mga maalamong ug kadtong nag-angkon nga makasulti sa mga patay?

Buot sa hari nga isugilon nila kaniya ang mahitungod sa iyang mga damgo.

Daniel 2:5-9

Unsa man ang gustong ipabuhat sa hari sa maalamon nga mga tawo?

Gusto sa hari nga ipadayag nila ang iyang damgo kaniya ug hubaron ang damgo sa hari.

Unsa man ang giingon sa hari nga mahitabo sa maalamong mga tawo kung dili nila masulti ang iyang damgo ug dili kini mapadayag alang kaniya?

Ang hari miingon nga kung dili nila kini mahubad, wataswatason ang lawas sa maalamon nga mga tawo ug ang ilang mga balay himoong pundok sa kinalibang.

Unsa man ang giingon sa hari nga iyang buhaton sa tawo o mga tawo nga makapadayag sa iyang damgo ug makahubad niini?

Miingon ang hari nga hatagan niya ang tawo o mga tawo ug mga gasa, ganti, ug dakong kadungganan.

Daniel 2:10-11

Kinsa man ang giingon sa maalamon nga mga tawo nga makabuhat sa gipangayo sa hari mahitungod sa iyang damgo?

Miingon ang maalamon nga mga tawo nga walay usa ka tawo sa kalibotan nga makatagbo sa sugo sa hari, ang mga dios lamang ang makabuhat niana.

Daniel 2:12-13

Human sa tubag sa maalamon nga mga tawo kang Nebucadnezar, unsa man ang gisugo sa hari?

Nagsugo ang hari nga pagapatyon kadtong tanan nga inila sa ilang pagkamaalamon.

Daniel 2:14-18

Kinsa man si Arioc?

Si Arioc ang pangulo sa tigbantay sa hari, ang gipili sa hari nga maoy mopatay sa tanan nga maalamon sa Babilonia.

Giunsa man pagtubag ni Daniel kang Arioc, sa dihang miadto siya kang Daniel?

Nagtubag si Daniel uban sa pagkamaalaamon ug pagtahod kang Arioc. Nangutana siya kang Arioc nganong dinalian man kaayo ang sugo sa hari.

Unsa man ang gihangyo ni Daniel kang Arioc human sila nagsulti?

Nagsulod si Daniel ug naghangyo nga hatagan siya ug panahon sa hari aron ipadayag ang buot ipasabot sa damgo sa hari.

Daniel 2:19-22

Unsa man ang gibuhat ni Daniel human nga gipadayag kaniya ang panan-awon?

Gidayeg ni Daniel ang Dios sa langit.

Daniel 2:23

Unsa man ang gipasalamatan ni Daniel sa Dios sa iyang mga katigulangan?

Nagpasalamat si Daniel sa Dios sa iyang katigulangan alang sa kaalam ug gahom nga gihatag kaniya sa iyang katigulangan.

Daniel 2:24-26

Kinsa man ang giadto ni Daniel human gipadayag kaniya ang panan-awon?

Misulod si Daniel aron makigkita kang Arioc.

Unsa man ang gisulti ni Daniel kang Arioc?

Gisultihan ni Daniel si Arioc nga dili patyon ang maalamon nga mga tawo sa Babilonia. Miingon si Daniel kang Arioc nga dad-on siya sa atubangan sa hari aron isulti ni Daniel sa hari ang kahulogan sa iyang damgo.

Daniel 2:27-28

Sa dihang gidala na si Daniel ngadto sa hari, kinsa man ang gisulti ni Daniel nga makapadayag sa tinago nga gimando sa hari?

Miingon si Daniel nga adunay Dios nga nagpuyo sa langit, nga maoy makapadayag sa mga tinago.

Sa kinatibuk-an unsa man ang giingon ni Daniel nga kahulogan sa damgo sa hari?

Miingon si Daniel nga ang damgo mahitungod sa mahitabo sa umaabot nga mga adlaw.

Daniel 2:29-30

Nganong gipadayag man kang Daniel ang damgo?

Gipadayag ang damgo kang Daniel aron masabtan sa hari ang kahulogan ug masayran ang iyang gihunahuna nga anaa sa iyang kasingkasing mismo.

Daniel 2:31-33

Unsa man ang hulagway sa estatuwa nga nakita sa hari sa iyang damgo?

Dako ang estatuwa ug hinimo sa bulawan ang ulo, ang dughan ug bukton hinimo sa plata, ang tiyan ug ang mga paa hinimo sa bronse, ang mga batiis hinimo sa puthaw ug may bahin niini nga hinimo puthaw ug lapok.

Daniel 2:34-35

Unsa man ang nahitabo sa estatuwa nga nakita sa hari sa iyang damgo?

Nakita sa hari nga nahugno ang bato, apan dili pinaagi sa mga kamot sa tawo. Nakadugmok kini sa tiil sa estatuwa ug ang tibuok estatuwa nga nadugmok sa pino nga gipalid sa hangin.

Unsa man ang nahitabo sa bato nga nakadugmok sa estatuwa?

Ang bato nga nakadugmok sa estatuwa nahimong dakong bukid ug nalukop ang tibuok kalibotan.

Daniel 2:36-43

Kinsa man ang ulo nga bulawan?

Si haring Nebucadnezar ang ulo nga bulawan.

Daniel 2:44-45

Unsa man ang buhaton sa Dios sa langit nianang mga adlawa sa gingharian nga may bahin nga puthaw ug may bahin nga yuta nga kolonon?

Nianang adlawa ang Dios sa langit magpatindog ug gingharian nga dili gayod maguba o mapukan sa ubang katawhan.

Daniel 2:46-47

Unsa man ang gisugo ni Nebucadnezar nga buhaton kang Daniel human sa iyang pagsugilon sa damgo sa hari ug ang mga kahulogan niini?

Nagsugo ang hari nga halaran si Daniel ug halad nga insenso.

Unsa man ang gisulti ni Nebucadnezar mahitungod sa Dios ni Daniel?

Miingon si Nebucadnezar nga ang Dios ni Daniel mao ang Dios sa mga dios, ang Ginoo sa mga hari ug ang tawo nga makapadayag sa mga tinago.

Daniel 2:48-49

Unsa man ang gibuhat ni Nebucadnezar human sa paghangyo ni Daniel sa hari?

Gipili sa hari si Sadrac, si Mesac, ug Abednego nga labaw sa tigdumala sa tibuok probinsya sa Babilonia.

Daniel 3

Daniel 3:1-2

Unsa man ang mga sukod sa estatuwa nga bulawan nga gihimo ni haring Nebucadnezar nga gipahimutang didto sa Kapatagan sa Dura?

60 ka cubit ang gitas-on ug unom ka cubit ang gilapdon sa estatuwa.

Daniel 3:3-5

Kinsa man ang miabot sa paghalad sa estatuwa nga gipahimotang ni Nebucadnezar?

Ang mga gobernador sa probinsya, mga gobernador sa rehiyon, ug ang mga gobernador sa lungsod, uban ang mga magtatambag, mga tigkupot sa salapi, mga maghuhukom, mga pangulong maghuhukom, ug ang tanang mga pangulong opisyal sa mga probinsya ang miadto sa paghalad.

Unsa man ang buot ipabuhat ni Nebucadnezar niadtong mitambong sa paghalad?

Gusto niya nga moluhod ug mohapa ang tanan nga mitambong ngadto sa estatuwa nga bulawan sa dihang madungog nila ang huni sa mga budyong, sa mga plawta, sa mga kudyapi, sa mga lira, sa mga harpa, ubang matang sa mga plawta, ug sa tanang matang sa tulunggon.

Daniel 3:6-7

Unsa man ang gimando sa hari alang niadtong dili moluhod ug mosimba sa estatuwa sa dihang madungog nila ang tanang huni sa mga tulunggon?

Miingon ang hari nga kadtong dili moluhod ug mosimba nianang higayona, itambog dayon didto sa nagdilaab nga hudno.

Daniel 3:8-10

Kinsa man ang nagsumbong kang Sadrac, Mesac, ug Abednego?

Pipila ka mga Caldihanon ang misumbong kanila.

Daniel 3:11-15

Si kinsa man ang wala miluhod ug misimba sa estatuwa?

Ang pipila ka mga Judio, ang ilang ngalan mao si Sadrac, si Mesac, ug si Abednego ang wala miluhod ug misimba sa estatuwa.

Daniel 3:16-18

Unsa man ang tubag ni Sadrac, Mesac, ug Abednego ngadto sa hari sa dihang giusab sa hari sa pagmando nga moluhod ug mosimba sa estatuwa, ug gisulti kung unsa ang silot kung dili sila mosunod sa mando sa hari?

Mitubag si Sadrac, Mesac, ug Abednego nga ang ilang Dios makahimo sa pagluwas kanila gikan sa nagdilaab nga hudno. Apan kung dili, dili gayod sila mosimba sa mga dios ni Nebucadnezar o mohapa ngadto sa estatuwa.

Daniel 3:19-20

Unsa man ang gimando ni Nebucadnezar alang kang Sadrac, Mesac, ug Abednego?

Nagmando si Nebucadnezar nga painiton ang hudno kapito ka pilo ang kainiton kay sa naandan niini nga kainiton, ug gaposon si Sadrac, Mesac, ug Abednego ug itambog sa hudno.

Daniel 3:21-23

Unsa man ang nahitabo kang Sadrac, Mesac, ug Abednego ug sa mga tawo nga nagtambog kanila didto sa hudno?

Nakapatay ang kalayo sa mga tawo nga nagtambog kang Sadrac, Mesac, ug abednego tungod sa labihan kainit sa kalayo nga gikan sa hudno ug unya si Sadrac, Mesac, ug Abednego nahulog sa hudno.

Daniel 3:24-25

Unsa man ang hinungdan nga natingala ug midali sa pagtindog si Nebucadnezar?

Natingala si Nebucadnezar tungod kay nakakita siyag upat ka tawo, nga walay gapos nga naglakawlakaw taliwala sa kalayo ug wala sila maunsa ug ang kahayag sa ikaupat nga tawo sama sa usa ka anak sa mga dios.

Daniel 3:26-28

Unsa man ang nakita sa mga tawo nga anaa didto mahitungod kang Sadrac, Mesac, ug Abednego human sila migawas gikan sa kalayo?

Nakita sa mga tawo nga anaa didto nga wala makasunog ang kalayo sa ilang mga lawas; ug wala masunog ang ilang mga buhok; ug wala maunsa ang ilang mga bisti; ug wala gani sila nanimahong aso.

Daniel 3:29-30

Unsa man ang kasugoan nga gipakanaog ni Nebucadnezar pagkahuman sa nahitabo kang Sadrac, Mesac, ug Abednego ug sa nagdilaab nga hudno?

Nagpakanaog ug sugo si Nebucadnezar nga ang tanang katawhan, mga nasod ug mga pinulongan nga magpasipala sa Dios ni Sadrac, Mesac, ug Abednego tagodtagoron gayod, ug himoong tinapok nga basura ang ilang mga balay tungod kay walay laing dios ang makaluwas sama niana.

Unsa man ang gibuhat sa hari alang kang Sadrac, Mesac, ug Abednego?

Gipatas-an ni haring Nebucadnezar ang katungdanan ni Sadrac, ni Mesac, ug ni Abednego sa probinsya sa Babilonia.

Daniel 4

Daniel 4:1-3

Asa man gipadala ni Nebucadnezar ang kasugoan?

Gipadala ni Nebucadnezar ang kasugoan sa tanang katawhan, mga kanasoran, ug mga pinulongan nga nagpuyo sa kalibotan.

Nganong nagpadala man si Nebucadnezar ug kasugoan?

Nagpadala si Nebucadnezar ug kasugoan aron sa pagsulti sa tanan mahitungod sa mga ilhanan ug mga katingalahan nga gibuhat kaniya sa Labing Halangdon.

Unsa man ang gisulti ni Nebucadnezar mahitungod sa Labing Halangdon?

Miingon si Nebucadnezar mahitungod sa Labing Halangdon, "Pagkagamhanan sa iyang mga ilhanan ug iyang mga katingalahan! Ang iyang gingharian mao ang walay kataposang gingharian, ug ang iyang pagbuot molungtad hangtod sa tanang kaliwatan."

Daniel 4:4-6

Unsa man ang nakapahadlok kang Nebucadnezar?

Ang damgo mao ang nakapahadlok kang Nebucadnezar.

Nganong nagbuhat man ug kasugoan si Nebucadnezar nga dad-on kaniya ang tanang maalamong mga tawo sa Babilonia?

Buot ni Nebucadnezar nga moadto kaniya ang mga maalamong tawo sa Babilonia aron hubaron ang iyang damgo.

Daniel 4:7-9

Unsa man ang ngalan ni Daniel sa Babilonia ug unsa man ang katungdanan ni Daniel sa gingharian ni Nebucadnezar?

Belteshazar ang ngalan ni Daniel sa Babilonia ug labaw sa mga salamangkero ang iyang katungdanan.

Kinsa man ang gituohan ni Nebucadnezar nga makahubad sa iyang damgo?

Nagtuo si Nebucadnezar nga mahubad ni Daniel ang iyang damgo, kay miingon si Nebucadnezar, "...ang espiritu sa balaang mga dios anaa kanimo ug walay tinago nga lisod alang kanimo."

Daniel 4:10-12

Unsa man ang nakita ni Nebucadnezar sa unang bahin sa iyang damgo?

Nakita ni Nebucadnezar ang dako, lig-on, ug maanindot nga kahoy nga misangko sa kalangitan. Nahimo kining pasilonganan sa mga mananap ug gisalagan sa mga kalanggaman. Daghan kinig bunga nga nahimong pagkaon sa tanang buhing binuhat.

Daniel 4:13-14

Unsa man ang giingon sa balaang mensahero nga gikan sa kalangitan nga buhaton sa maong kahoy?

Miingon ang balaang mensahero nga putlon ang kahoy, putlon ang mga sanga niini, husloon ang mga dahon ug ikatag ang mga bunga niini.

Daniel 4:15-16

Unsa man ang angayang buhaton sa tuod sa maong kahoy?

Ibilin ang tuod sa yuta nga hiniktan ug puthaw ug bronse. Pasagdi kining mabasa sa yamog. Pasagdi kining magpuyo ipon sa mga mananap. Pasagdi nga maghunahuna siya sama sa mananap ug dili panghunahuna sa tawo sulod sa pito ka tuig.

Daniel 4:17-19

Unsa man ang katuyoan nga gibuhat kini sa maong kahoy sa damgo ni Nebucadnezar?

Ang katuyoan mao nga masayod ang tanang buhi nga ang Labing Halangdon ang nagdumala sa mga gingharian sa katawhan ug ihatag kini kang bisan kinsa nga buot niyang ipadumala niini.

Daniel 4:20-23

Kinsa mang tawhana ang maong kahoy nga gisulti ni Daniel sa damgo ni Nebucadnezar?

Miingon si Daniel nga ang kahoy mao si Nebucadnezar.

Daniel 4:24-25

Unsa man ang mahitabo kang Nebucadnezar hangtod nga ilhon niya nga ang Labing Halangdon mao ang nagdumala sa mga gingharian sa katawhan ug ihatag niya kini kang bisan kinsa nga buot niyang hatagan.

Papahawaon si Nebucadnezar gikan sa mga tawo. Magpuyo siya sa kaumahan uban sa ihalas nga mga mananap ug manabsab sa sagbot sama sa torong baka ug mabasa sa yamog nga gikan sa kalangitan.

Unsa man kadugayon hangtod giila ni Nebucadnezar nga ang Labing Halangdon mao ang nagdumala sa mga gingharian sa katawhan ug ihatag niya kini kang bisan kinsa nga buot niyang hatagan?

Molabay ang pito ka tuig diha pa giila ni Nebucadnezar nga ang Labing Halangdon mao ang nagdumala sa mga gingharian sa katawhan ug ihatag niya kini kang bisan kinsa nga buot niyang hatagan.

Daniel 4:26-27

Human mahubad ang damgo ni Nebucadnezar unsa man ang tambag ni Daniel kaniya?

Gitambagan ni Daniel si Nebucadnezar nga mohunong na sa pagpakasala ug buhaton ang maayo. Giingnan usab niya si Nebucadnezar nga mobiya sa iyang mga sala pinaagi sa pagpakitag kaluoy sa mga dinaogdaog.

Daniel 4:28-33

Unsa man kadugayon ayha nahitabo ang hubad sa damgo ni Nebucadnezar?

Nahitabo ang iyang damgo human sa dose ka bulan ang mibalay.

Daniel 4:34-35

Unsa man ang gibuhat ni Nebucadnezar sa dihang nahibalik ang iyang maayong pamuot?

Gidayeg ug gipasidunggan ni Nebucadnezar ang Labing Halangdon nga maghari sa walay kataposan.

Daniel 4:36-37

Unsa man ang nahitabo sa gingharian ni Nebucadnezar?

Gibalik ang gingharian kaniya.

Unsa man ang kataposang gisulti ni Nebuadnezar mahitungod sa Hari sa langit?

Ang iyang giingon mao kini: "Karon, ako si Nebucadnezar, magdayeg, magpasidungog, ug maghimaya sa Hari sa langit, kay ang tanan nga iyang gihimo maayo, ug ang iyang pamaagi makataronganon. Ginapaubos niya kadtong naglakaw sa ilang mga garbo."

Daniel 5

Daniel 5:1-2

Alang kang kinsa man ang dakong kapistahan nga gihimo ni haring Belshazar?

Naghimo siya ug dakong kapistahan alang sa iyang liboan nga mga inilang mga tawo.

Kinsa man si Belshazar?

Anak siya nga lalaki ni Nebucadnezar.

Daniel 5:3-4

Unsa man nga mga panudlanan ang ilang gigamit nga imnanan ug bino sa kapistahan ug asa kini gikan?

Gigamit nila ang mga panudlanan nga bulawan nga gikuha gikan sa templo, ang balay sa Dios, sa Jerusalem.

Unsa man ang gibuhat sa mga tawo nga anaa sa kapistahan sa dihang nag-inom sila ug bino?

Nagdayeg sila sa ilang mga diosdios nga hinimo sa bulawan ug sa plata, sa bronse, sa puthaw, sa kahoy ug sa bato.

Daniel 5:5-6

Unsa man ang nahitabo samtang nag-inom ug bino ang katawhan ug nagdayeg sa ilang mga diosdios?

Mitungha ang mga tudlo sa kamot sa tawo sa atubangan sa tungtonganan sa lampara ug nagsulat sa bungbong sa palasyo sa hari.

Unsa man ang nahitabo sa hari sa dihang nakita niya ang kamot?

Nausab ang iyang dagway ug nahadlok siya sa paghunahuna; nawad-an ug kusog ang iyang mga paa, ug ang iyang mga tuhod nagapangurog.

Daniel 5:7-12

Unsa man ang gisaad sa hari ngadto sa tawo nga makapahayag sa sinulat nga anaa sa bungbong ug sa ipasabot niini?

Misaad ang hari nga ang tawo nga makasaysay sa sinulat ug sa ipasabot niini pagasul-oban sa tapul nga bisti ug pagakwentasan siya sa bulawang kwentas ug mahimo siya nga ikatulo sa pinakataas nga magmamando sa gingharian.

Daniel 5:13-16

Unsa man ang mga kinaiyahan ang gisulti sa hari nga matud pa niya nga iyang nadungog mahitungod kang Daniel?

Nag-ingon ang hari kang Daniel nga nadungog niya nga anaa kaniya ang espiritu sa mga dios ug nag-angkon si Daniel sa kahayag ug panabot ug talagsaong kaalam.

Daniel 5:17-19

Unsa man ang tubag ni Daniel sa dihang gisultihan siya sa mga ganti nga iyang pagadawaton sa pagbasa sa sinulat ug pagpahayag sa ipasabot niini?

Gisultihan ni Daniel ang hari, "Imoha na lamang kanang imong mga gasa, ug ihatag ang imong mga ganti ngadto sa laing tawo. Apan, basahon ko gihapon ang sinulat alang kanimo, O hari, ug isaysay ko kanimo ang buot ipasabot niini.

Daniel 5:20-21

Ngano nga gipakanaog man si Nebucadnezar gikan sa iyang harianong trono ug nganong gikuha man kaniya ang iyang kagahom?

Nawala kang Nebucadnezar ang iyang kagahom ug ang iyang trono tungod kay nahimong mapasigarbohon ang iyang kasingkasing ug nagmagahi ang iyang espiritu busa naghinambog siya.

Daniel 5:22-24

Unsa man ang hukom ni Daniel batok kang Belshazar?

Nag-ingon si Daniel kang Belshazar nga wala siya magpaubos sa iyang kasingkasing, gipataas niya ang iyang kaugalingon batok sa Ginoo sa langit ug wala niya gipasidunggan ang Dios nga naggunit sa iyang gininhawa ug nasayod sa tanan niyang mga dalan.

Daniel 5:25-28

Unsa man ang ipasabot sa sinulat nga anaa sa bungbong?

Ang kahulogan mao kini nga mosunod: Giihap na sa Dios ang gingharian ni Belshazar ug gidala kini sa iyang kataposan. Gitimbang na si Belshazar sa timbangan ug nakakaplagan nga kulang. Mabahin ang gingharian ni Belshazar ug ihatag kini ngadto sa mga Medes ug sa mga Persians.

Daniel 5:29-31

Unsa man ang nahitabo niadtong gabhiona sa dihang gihubad ni Daniel ang sinulat alang kang Belshazar?

Niadtong gabhiona si Belshazar, ang hari sa Babilonia, gipatay, ug si Darius nga usa ka Medianhon ang mipuli sa gingharian.

Unsang idara si Darius taga-Media sa dihang mipuli siya sa gingharian?

Mipuli si Darius nga taga-Media sa gingharian sa dihang nagpangidaron siya ug 62.

Daniel 6

Daniel 6:1-3

Kinsa man ang gipili ni Darius nga magdumala sa gingharian?

Gipili niya ang 120 ka mga gobernador sa mga probinsya uban ang tulo ka mga tigdumala nga labaw kanila.

Kinsa man ang usa nga nalakip sa tulo nga pangulo nga tigdumala?

Si Daniel ang usa sa tulo ka mga pangulo sa tigdumala.

Nganong gipili man ang tulo ka pangulo nga mga tigdumala?

Gipili sila aron nga magdumala sa mga gobernador sa probinsya, aron dili na mawad-an ang hari.

Kinsa man ang giplanohan sa hari nga magdumala sa tibuok gingharian?

Nagplano ang hari nga ibutang si Daniel nga labaw sa tibuok gingharian.

Daniel 6:4-5

Nganong wala may makita ang laing mga pangulo nga tigdumala ug ang mga gobernador sa mga probinsya, sayop sa iyang katungdanan, sipyat ug pagpasagad sa buluhaton ni Daniel alang sa gingharian?

Wala sila makakita ug bisan unsa niini nga mga butang tungod kay matinud-anon si Daniel.

Unsa man ang usa ka pamaagi nga ikasumbong sa laing labaw nga mga tigdumala ug sa mga gobernador sa probinsya batok kang Daniel?

Naghunahuna sila nga makakita sila ug butang batok kang Daniel nga may kalabotan sa balaod sa iyang Dios.

Daniel 6:6-9

Unsa man ang gitambag sa mga gobernador sa mga probinsya ug sa laing labaw nga mga tigdumala nga buhaton ni Haring Darius?

Gitambagan nila si Darius nga magpakanaog ug usa ka kasugoan ug ipatuman kini ug si bisan kinsa ang magaampo sa bisan unsa nga dios o tawo, gawas lamang kang Haring Darius sulod sa 30 ka adlaw, kana nga tawo itambog ngadto sa langob nga may mga liyon.

Daniel 6:10-12

Unsa man ang gibuhat ni Daniel human sa iyang pagkasayod nga gipakanaog na ang kasugoan ug ang dukomento gipermahan na nga mahimong balaod?

Mipauli si Daniel sa iyang balay, miluhod ug nag-ampo ug nagpasalamat sa Dios sama sa iyang ginabuhat kaniadto.

Daniel 6:13-16

Unsa man ang gibuhat sa mga tawo nga naglaraw batok kang Daniel sa dihang nakita nila si Daniel nga nag-ampo ug nagpakitabang sa Dios?

Miadto kadtong mga tawhana sa hari ug nagsulti kaniya nga si Daniel wala naghatag ug pagtagad sa hari o sa iyang kasugoan ug nag-ampo si Daniel ngadto sa Dios makatulo sa usa ka adlaw.

Unsa man ang gibuhat sa hari sa dihang nadungog niya nga wala motuman si Daniel sa kasugoan sa hari?

Nahasol gayod pag-ayo ang hari ug naghunahuna siya sa pagluwas kang Daniel gikan sa iyang mando.

Daniel 6:17-18

Unsa man ang gibuhat sa hari, human nga gitambog si Daniel sa puy-anan sa mga liyon?

Gisilyohan sa hari ang agianan sa puy-anan sa mga liyon pinaagi sa iyang kaugalingong singsing pangsilyo. Unya mipauli siya sa iyang palasyo ug nag-puasa sa tibuok gabii ug wala matulog.

Daniel 6:19-20

Pagkasunod adlaw human nga gitambog si Daniel didto sa puy-anan sa mga liyon, kanus-a man miadto ang hari didto sa puy-anan sa mga liyon, unsa man ang iyang gipangutana kang Daniel?

Nangutana ang hari kang Daniel kung giluwas ba siya sa Dios nga padayon niya nga gialagaran gikan sa mga liyon.

Daniel 6:21-22

Giunsa man pagtubag ni Daniel ang hari?

Nag-ingon si Daniel sa hari, "Mabuhi sa kanunay ang hari!" Gipadala sa Dios ang iyang anghel ug maoy nagtak-om sa baba sa mga liyon, ug wala nila ako mapasakiti. Tungod kay nakaplagan ako nga dili sad-an sa iyang atubangan ug sa imong atubangan usab, o hari, ug wala akoy gihimo nga daotan kanimo."

Daniel 6:23

Unsa man ang unang mando nga gihatag sa hari human niya nakita si Daniel nga buhi sa puy-anan sa mga liyon.

Ang unang mando nga gihatag sa hari human niya makita nga buhi si Daniel mao ang pagkuha kang Daniel pagawas sa puy-anan sa mga liyon.

Daniel 6:24-25

Unsa man ang ikaduhang mando nga gihatag sa hari human niya makita si Daniel nga buhi sa puy-anan sa mga liyon?

Ang ikaduhang mando sa hari mao ang pagdala sa mga tawo nga nagpasangil kang Daniel ug itambog sila ngadto sa puy-anan sa mga liyon uban sa ilang mga anak ug sa ilang mga asawa.

Daniel 6:26-27

Unsa man ang gisulti ni Darius sa iyang kasugoan mahitungod sa Dios ni Daniel?

Nag-ingon si Darius sa Dios ni Daniel"... buhi siya nga Dios ug buhi siya sa walay kataposan, ug ang iyang gingharian dili gayod malumpag; ang iyang gahom walay kinutoban. Gihimo kita niya nga may kagawasan ug giluwas kita, ug nagahimo siya ug mga katingalahan ug mga kahibulongan sa langit ug sa yuta; giampingan niya si Daniel nga luwas gikan sa kusog sa mga liyon.

Daniel 6:28

Kang kinsa man nga panahon sa paghari nga nag-uswag si Daniel?

Nag-uswag si Daniel sa panahon sa paghari ni Darius ug sa panahon sa paghari ni Cyrus nga usa ka Persian.

Daniel 7

Daniel 7:1-3

Kanus-a man nagdamgo si Daniel ug adunay panan-awon sa iyang hunahuna?

Nagdamgo si Daniel ug adunay panan-awon samtang naghigda siya sa iyang higdaanan sa unang tuig sa paghari ni Belshazar ang hari sa Babilonia.

Unsa man ang nag-ukay sa dakong dagat diha sa panan-awon ni Daniel?

Giukay ang dakong dagat sa upat ka mga hangin sa langit.

Unsa man ang migula gikan sa dagat?

Upat ka dagkong mga mananap, ug managlahi ang matag usa nga migula sa dagat.

Daniel 7:4-5

Unsa man ang gihatag ngadto sa mananap nga sama sa liyon?

Gihatagan kini ug hunahuna sa usa ka tawo.

Unsa man ang gisulti nga buhaton sa mananap nga sama sa uso?

Gisultihan kini nga mobarog ug pangaonon ang daghang mga tawo.

Daniel 7:6-7

Unsa man ang gihatag sa mananap nga sama sa leopardo?

Gihatagan kini ug katungod sa pagmando.

Unsa man ang gibuhat sa ikaupat nga mananap?

Gikaon sa ikaupat nga mananap, mipinopino, ug gitunobtunoban kung unsa ang nahibilin.

Daniel 7:8

Unsa man ang nakita ni Daniel nga nahitabo sa ikaupat nga mananap samtang gihunahuna niya ang mga sungay niini?

Nakita ni Daniel ang laing mitubo nga gamay nga sungay taliwala sa napulo ka mga sungay. Nangaibot ang tulo ka sungay nga nag-una. Nakita ni Daniel nga ang gamay nga sungay adunay mga mata nga sama sa tawo ug baba nga nagpasigarbo mahitungod sa dakong mga butang.

Daniel 7:9

Kinsa man ang milingkod sa usa ka trono nga gipahimotang?

Milingkod ang Walay Kataposan sa usa sa mga trono.

Daniel 7:10

Unsa man ang gihimo sa Walay Kataposan?

Andam na sa paghukom ang hukmanan, ug giablihan na ang mga basahon.

Daniel 7:11-12

Unsa man ang nahitabo sa upat ka mga mananap?

Gipatay ang mananap nga adunay sungay nga nagsulti sa mga pulong sa pagpasigarbo, gilaglag ang lawas niini ug gitugyan kini aron pagasunogon. Ang laing tulo ka mga mananap gikuhaan sa ilang katungod sa pagmando apan gipataas pa ang ilang kinabuhi sa gitakda nga panahon

Daniel 7:13-16

Kinsa man ang gipaila ngadto sa usa ka Walay Kataposan sa diha sa panan-awon ni Daniel ?

Siya nga miabot uban sa mga panganod sa kalangitan ang usa ka binuhat nga sama sa anak sa tawo; miduol siya sa Walay Kataposan.

Unsa man ang gihatag niining usa nga "sama sa anak sa tawo"?

Gihatag niining usa nga "sama sa anak sa tawo" ang walay kataposang katungod sa pagmando, usa ka gingharian nga dili gayod mapukan, ang himaya ug harianong gahom.

Daniel 7:17-22

Unsa man ang gisulti kang Daniel nga gipasabot sa upat ka mga mananap sa iyang damgo?

Gisultihan si Daniel nga ang upat ka mga mananap mao ang upat ka mga hari nga motungha gikan sa kalibotan.

Kinsa man ang modawat sa gingharian ug manag-iya niini sa walay kataposan?

Dawaton sa mga balaang katawhan sa Labing Halangdon ang gingharian ug panag-iyahon kini hangtod sa walay kataposan.

Daniel 7:23-24

Sa dihang nangutana si Daniel sa tawo nga mibarog didto mahitungod sa ikaupat nga mananap, unsa man ang gisulti niya nga buhaton sa ikaupat nga mananap ngadto sa kalibotan?

Kadtong tawo nga gipangutana ni Daniel miingon nga ang ikaupat nga mananap mao ang ikaupat ka gingharian ug pagakaonon, pagatunobtunoban niini ug pagadugmokon niini hangtod nga mapino ang tibuok kalibotan.

Unsa man ang gisulti sa tawo nga mibarog didto mahitungod sa napulo ka mga sungay?

Nag-ingon ang tawo nga mibarog didto nga ang napulo ka mga hari motungha gikan sa napulo ka mga gingharian.

Daniel 7:25-26

Unsa man ang gibuhat niadtong usa nga nagasulti sa mga pulong batok sa Labing halangdon ug unsa man ang iyang kataposan?

Pagalutosan niya ang balaang katawhan sa Labing Halangdon. Sulayan niya sa pag-usab ang mga kapistahan ug ang balaod. Magamando siya niining mga butanga sulod sa usa ka tuig, dugang ang duha ka tuig ug tunga apan kuhaon gikan kaniya ang harianong gahom aron pagalamyon ug pagalaglagon sa kataposan.

Daniel 7:27-28

Kang kinsa man ihatag ang gingharian ug kagahom ilalom sa tibuok langit?

Ihatag kini ngadto sa katawhan nga iya sa Labing Halangdon.

Unsa man ang nahitabo kang Daniel human sa iyang panan-awon?

Nasamok pag-ayo si Daniel ug ang iyang panagway nausab, apan gitipigan niya sa iyang kaugalingon ang maong panan-awon.

Daniel 8

Daniel 8:1-2

Kanus-a man nahitabo ang ikaduhang panan-awon ni Daniel?

Nahitabo ang ikaduhang panan-awon ni Daniel sa ikatulong tuig sa paghari ni haring Belshazar.

Asa man si Daniel panahon sa iyang panan-awon?

Atua si Daniel sa kinutaan nga siyudad sa Susa didto sa probinsiya sa Elam nga anaa sa kilid sa Kanal sa Ulai.

Daniel 8:3-4

Unsa man ang duha ka mga mananap nga nakita ni Daniel sa iyang panan-awon?

Nakita ni Daniel ang usa ka laking karnero ug ang torong kanding dinhi nga panan-awon

Sama sa unsa man ang duha ka sungay sa laking karnero?

Ang usa ka sungay sa laking karnero mas taas kay sa usa apan ang mubo mas daling mitubo kay sa taas nga sungay.

Unsa man kagamhanan ang laking karnero?

Walay laing mga mananap ang makasukol sa laking karnero. Walay maluwas gikan sa kamot sa laking karnero. Gibuhat niya ang iyang gusto, ug nahimo siyang gamhanan.

Daniel 8:5-6

Unsang matang sa sungay ang nabatonan sa torong kanding?

Ang torong kanding adunay usa lamang ka sungay diha tungatunga sa iyang mga mata.

Daniel 8:7-8

Unsa man ang gibuhat sa torong kanding ngadto sa laking karnero?

Gidasmagan sa torong kanding ang laking karnero ug gibali ang duha ka sungay niini, gitumba sa yuta ug gitamaktamakan siya.

Unsa man ang mipuli pagtubo sa nahimutangan niini sa dihang ang dakong sungay sa torong kanding nabali?

Ang upat ka laing mga sungay mitubo nga nag-atubang sa upat ka kahanginan sa nahimutangan sa usa ka sungay nga nabali.

Daniel 8:9-10

Unsa man ang nahitabo sa usa sa upat ka sungay sa torong kanding?

Mitubo sa usa sa mga sungay ang laing sungay, gamay sa una apan midako kini diha sa amihanan, sa kasadpan, ug diha sa matahom nga yuta sa Israel.

Unsa man ang gibuhat sa sungay sa dihang midako kini?

Midako kini pag-ayo nga nakiggubat na kini batok sa kasundalohan sa langit.

Daniel 8:11-12

Nganong gitugyan man ang kasundalohan ngadto sa sungay sa torong kanding ug naundang ang pagsunog sa mga halad?

Nahitabo kini tungod sa pagsupak.

Daniel 8:13-14

Hangtod kanus-a man matapos kining mga butanga, kining panan-awon mahitungod sa pagsunog sa halad, ang sala nga nagdalag kalaglagan, ang pagtugyan sa templo, ug ang pagyatakyatak sa kasundalohan sa langit?

Molungtad kinig 2,300 ka mga gabii ug mga kabuntagon.

Unsa man ang mahitabo tapos sa 2,300 ka mga gabii ug mga kabuntagon?

Mahiuli na sa hustong kahimtang ang templo

Daniel 8:15-17

Kinsa man ang gisultihan nga motabang sa pagpasabot sa panan-awon ngadto kang Daniel?

Si Gabriel mao ang gisultihan nga motabang sa pagpasabot sa panan-awon ngadto kang Daniel.

Daniel 8:18-19

Kay kanus-a man mahitabo ang panan-awon? Unsang panahona man kini gitagana?

Ang panan-awon alang sa takna sa kapungot. Gitagana kini sa gitakdang panahon.

Daniel 8:20-21

Unsa man ang simbolo sa duha ka sungay sa laking karnero ug sa torong kanding diha sa panan-awon ni Daniel?

Ang laking karnero nga may duha ka sungay mao ang mga hari sa Media ug sa Persia. Ang torong kanding mao ang hari sa Gresya.

Daniel 8:22-23

Unsa man ang simbolo sa upat ka sungay, ang mga sungay nga mitubo sa nahimutangan sa sungay nga nabali?

Ang upat ka mga sungay naghulagway sa upat ka mga gingharian nga motungha gikan sa nasod nga gigikanan sa sungay nga nabali.

Daniel 8:24-26

Unsa man ang buhaton niining maalamon ug mapintas nga hari?

Siya mao ang hinungdan sa nagkatag nga kalaglagan ug magmalampuson sa bisan unsa nga iyang buhaton. Laglagon niya ang gamhanan mga tawo, ang katawhan nga balaan. Molampos siya sa pagpanglimbog. Makigbatok siya sa hari sa mga hari.

Unsa man ang mahitabo niining maalamon ug mapintas nga hari?

Mabuntog siya, apan dili pinaagi sa kamot sa tawo.

Daniel 8:27

Giunsa man sa panan-awon pagpamuhat kang Daniel?

Gikapoy si Daniel ug naluya sulod sa pipila ka mga adlaw ug nalisang siya sa panan-awon,

Daniel 9

Daniel 9:1-2

Unsa nga gingharian ang giharian ni haring Asuero?

Siya mao ang hari sa tibuok gingharian sa Babilonia.

Unsa man ang nabantayan ni Daniel sa pagtuon sa pulong ni Yahweh pinaagi kang propeta Jeremias?

Nabantayan niya ang pagkasinalikway sa Jerusalem matapos ang pito ka tuig.

Daniel 9:3-4

Giunsa man pagpangita ni Daniel ang Ginoong Dios?

Gipangita ni Daniel ang Ginoong Dios uban ang pag-ampo ug pangaliyupo, uban ang pagpuasa, ang pagsul-ob sa bisting sako, ug ang paglingkod sa abo.

Unsa man ang unang butang nga gibuhat ni Daniel sa pagduol niya kang Ginoong Dios diha sa mga pag-ampo?

Gisugid ni Daniel ang mga sala sa mga Israelita.

Daniel 9:5-6

Kang kinsa man gisugilon sa mga propeta ang ngalan sa Dios?

Gisugilon sa mga propeta ngadto sa mga hari, sa mga pangulo, sa mga katigulangan, ug sa tibuok katawhan sa yuta.

Daniel 9:7-8

Nganong ang kaulawan atua man sa panagway sa mga Israelita?

Ang kaulawan atua sa ilang mga panagway tungod kay nakasala man sila batok sa Ginoo.

Daniel 9:9-11

Unsa man ang gibubo sa Israel tungod sa ilang sala?

Ang tunglo ug ang panumpa nga sinulat sa Balaod ni Moises, ang sulugoon sa Dios, gibubo ngadto kanila.

Daniel 9:12-14

Giunsa man pagpamatuod ni Yahweh ang iyang mga pulong nga iyang gisulti batok sa Israel ug sa ilang mga hari?

Gipamatud-an ni Yahweh ang iyang mga pulong nga iyang gisulti batok kanamo ug batok sa among mga magmamando, pinaagi sa pagpahamtang kanamo sa dakong katalagman.

Unsa man ang gisulti ni Daniel nga wala buhata sa Israel sa pagpakilooy sa Dios?

Miingon si Daniel nga wala nila isalikway ang ilang pagpakasala ug wala tagda ang kamatuoran sa Dios.

Daniel 9:15-19

Unsa man ang mga hinungdan nga gisulti ni Daniel nga angay pasayloon ni Ginoong Dios ang Israel?

Miingon si Daniel nga angayan pasayloon sa Ginoo ang Israel tungod sa matarong nga mga buhat sa Ginoo.

Daniel 9:20-21

Kanus-a man miabot si Gabriel kang Daniel?

Miabot si Gabriel kang Daniel sa takna sa paghalad sa kagabhion samtang nag-ampo si Daniel.

Daniel 9:22-23

Nganong miabot man si Gabriel kang Daniel?

Miabot si Gabriel aron paghatag kang Daniel sa kaalam ug sa panabot.

Daniel 9:24-25

Nganong 70 kapiloon ka pito man katuig ang gitagana alang kang Daniel ug sa iyang balaang siyudad?

Ang 70 kapiloon ka pito katuig ang gitagana aron sa pagtapos sa kalapasan, sa sala, sa kapasayloan sa pagkadaotan, sa pagpadala sa walay kataposang pagkamatarong, sa pagmantala sa panan-awon ug sa mga propesiya, ug sa pagbalaan sa labing balaang dapit.

Pila man ka tuig ang molabay pa ayha ang pagpatuman sa sugo aron sa pagbalik ug pagtukod pag-usab sa Jerusalem sa pag-abot sa balaang pinili?

Aduna pay pito kapiloon sa pito ug 62 kapiloon sa pito nga tuig nga molabay sa duha ka mga panghitabo.

Daniel 9:26

Kanus-a man laglagon ang dinihogan?

Malaglag siya human sa 62 kapiloon sa pito nga tuig.

Daniel 9:27

Unsa man ang buhaton sa umaabot nga magmamando?

Pamatud-an niya ang kasabotan sa kadaghanan sulod sa pito ka tuig. Sa tungatunga sa pito ka tuig taposon niya ang pagsakripisyo ug ang paghalad.

Unsa man ang mahitabo sa tawo nga nagbuhat sa kangil-aran?

Ang makalilisang nga kataposan ug ang kalaglagan isugo nga ibubo na sa usa ka tawo nga nagbuhat sa kangil-aran.

Daniel 10

Daniel 10:4-6

Kinsa man ang nakita ni Daniel sa iyang panan-awon?

Nakita niya ang usa ka tawo nga nagbistig pino nga lino nga nagbakos ug lunsayng bulawan.

Sama sa unsa man ang usa ka tawo nga nakita ni Daniel?

Ang lawas sa maong tawo sama sa topaz, ang iyang panagway sama sa kilat, ang iyang mata sama sa nagdilaab nga sulo, ang iyang mga bukton ug mga tiil sama sa pinasinaw nga bronse, ang tingog sa iyang mga pulong sama sa dakong pundok sa katawhan.

Daniel 10:7-11

Unsa man ang gibati ni Daniel sa pagkakita niya sa talagsaong panan-awon ug nadungog ang mga pulong sa tawo?

Nangluspad ang masanag nga panagway ni Daniel ug nawad-an na siyag umoy. Nakuyapan siya nga nahapla sa yuta.

Daniel 10:12-13

Kanus-a man gipadala ang anghel ngadto kang Daniel?

Gipadala ang anghel kang Daniel sukad sa unang adlaw nga gitinguha na niya ang pagsabot ug nagpaubos sa iyang kaugalingon atubanga sa Dios.

Nganong miabot man ug 21 ka adlaw ayha pa nakaabot ang anghel ngadto kang Daniel?

Gibabagan siya sa prinsipe sa gingharian sa Persia nga nagbantay kaniya.

Daniel 10:14-15

Asa man mahitabo ang panan-awon?

Ang panan-awonmahitungod sa naghinapos gna mga adlaw, ang taliabot pa nga mga adlaw.

Daniel 10:16-17

Unsa man ang gisulti ni Daniel nga nahitabo kaniya sa panan-awon?

Miingon si Daniel nga nahasol ako ug wala na akoy kusog, ug maglisod na gani sa pagginhawa.

Daniel 10:18-19

Unsa man ang gibuhat sa binuhat nga may hulagway sama sa tawo aron pagbaskog kang Daniel?

Ang binuhat nga sama sa usa ka tawo mihikap kaniya aron lig-onon siya.

Daniel 10:20-21

Unsa man ang gisulti sa binuhat nga daw sama sa tawo ngadto kang Daniel nga iyang angay buhaton human siya makabiya?

Miingon siya nga mobalik siya aron makiggubat sa prinsipe sa Persia.

Unsa man ang gibuhat sa binuhat nga daw sama sa tawo nga iyang isulti kang Daniel?

Miingon siya nga sultihan niya si Daniel kung unsa ang nahisulat sa basahon sa kamatuoran.

Daniel 11

Daniel 11:1-2

Giunsa man sa ikaupat nga hari sa Persia pagbaton ug gahom?

Makabaton siya ug gahom pinaagi sa iyang kadato.

Unsa man nga gingharian ang gusto sa ikaupat nga hari sa Persia nga pakigbatokan sa tanan?

Gihagit niya ang tanan nga makigbatok sa gingharian sa Gresya.

Daniel 11:3-4

Kinsa man ang bantogan nga hari nga dili hatagan sa gingharian?

Ang gingharian dili ihatag sa kaliwatan sa hari.

Daniel 11:5-6

Kinsa man ang maghimo ug kasabotan?

Ang hari sa Habagatan ug ang usa sa iyang mga pangulo nga mahimong hari sa Amihanan maoy maghimo ug kasabotan.

Kinsa man ang moabot aron pagpamatuod sa kasabotan taliwala sa hari sa Habagatan ug hari sa Amihanan?

Ang anak nga babaye sa hari sa Habagatan moadto sa hari sa Amihanan aron pagpamatuod sa ilang kasabotan.

Daniel 11:7-9

Unsa man ang mabuhat sa anak nga babaye sa hari sa Habagatan ngadto sa hari sa Amihanan?

Sulongon niya ang kasundalohan ug sudlon ang kota sa hari sa Amihanan ug buntogon kini.

Daniel 11:10

Unsa man ang buhaton sa mga anak nga lalaki sa hari sa Amihanan?

Mangandam ang iyang mga anak nga lalaki ug magtigom ug dakong pundok sa kasundalohan. Walay hunong ang ilang pag-abot sama sa baha lukopon nila ang tanan moabot kini hangtod sa kota sa hari sa Habagatan.

Daniel 11:11-12

Unsa man ang buhaton sa hari sa Habagatan isip balos sa pagsulong sa mga anak nga lalaki sa hari sa Amihanan?

Ang hari sa Habagatan masuko pag-ayo; moadto siya ug makig-away batok sa hari sa Amihanan.

Kinsa man ang magmadaugon sa gubat tali sa Amihanan ug Habagatan?

Ang hari sa Habagatan mao ang magmadaugon sa maong gubat.

Daniel 11:13

Human sa pipila ka katuigan, unsa man ang buhaton sa hari sa Amihanan?

Moabot ang hari sa Amihanan uban ang dakong pundok sa kasundalohan nga adunay mas daghang kasangkapan.

Daniel 11:14

Nianang panahona kinsa pa man ang motungha aron makigbatok sa hari sa Habagatan?

Nianang panahona daghan ang motungha ug makigbatok sa hari sa Habagatan lakip ang mga daotan taliwala sa katawhan ni Daniel.

Daniel 11:15-16

Unsa man ang mahitabo sa panahon nga sulongon sa hari sa Amihanan ang hari sa Habagatan?

Ang hari sa Habagatan dili makabarog batok kaniya. Ang hari sa Amihanan magbuhat sa bisan unsa nga iyang gusto buhaton batok sa hari sa Habagatan.

Daniel 11:17-19

Ngano man nga ihatag sa hari sa Amihanan ang iyang anak nga babaye aron ipaasawa sa hari sa Habagatan?

Buhaton kini sa hari sa Amihanan aron sa paglaglag sa gingharian sa Habagatan.

Unsa man ang mahitabo sa hari sa Amihanan?

Taposon sa usa ka pangulo ang kadaotan sa hari sa Amihanan ug isumbalik kaniya ang iyang kadaotan. Mapandol siya ug malaglag; dili na siya makaplagan.

Daniel 11:20-22

Unsa man ang buhaton sa makapuli nga hari sa Amihanan?

Pugson niya pagpabayad ug buhis ang mga tawo aron sa pagpapanindot sa gingharian.

Unsa man ang mahitabo niadtong magpugos sa pagpabayad sa buhis?

Mapukan dayon siya human sa pipila ka mga adlaw, apan dili sa kasuko o sa gubat.

Giunsa man sa talamayon nga tawo nga wala gihatagan ug harianon nga pagpasidungog aron makabaton ug gahom?

Moabot siya nga wala damha ug maghari sa gingharian pinaagi sa pagpanlimbong.

Daniel 11:23-24

Unsa man ang buhaton sa talamayon nga hari human sa ilang gihimo nga kasabotan?

Gikan sa panahon nga naghimo sila ug kasabotan, mamuhat siya nga malimbongon.

Daniel 11:25-27

Unsa man ang mahitabo kung ang malibongong hari makigbatok sa hari sa Habagatan?

Ang hari sa Habagatan dili magmadaugon batok sa malimbongong hari kay ang tanang laraw batok man kaniya.

Nganong maglingkod man sa susamang lamesa ug mamakak sa usag-usa ang hari sa Amihanan ug ang hari sa Habagatan?

Mamakak sila sa usag-usa kay ang ilang mga kasingkasing nagtinguha ug daotan batok sa usag-usa.

Daniel 11:28

Unsa man ang gitinguha nga pakigbatok sa kasingkasing sa hari sa Amihanan?

Ang iyang kasingkasing makigbatok sa balaang kasabotan.

Daniel 11:29-32

Giunsa man pagpagawas sa hari sa Amihanan sa iyang kasuko sa balaang kasabotan?

Ipagawas niya ang iyang kasuko batok sa balaang kasabotan pinaagi sa pagpakita sa iyang pagdapig niadtong mosalikway sa balaang kasabotan.

Daniel 11:33-35

Unsa man ang mahitabo sa maalamon?

Adunay panahon nga ang maalamon mapukan pinaagi sa espada ug pinaagi sa kalayo; mangabihag ug makawatan sila sa ilang mga gipanag-iyahan. Sa ilang pagkapandol, pipila lamang ang motabang kanila.

Nganong ang uban nga mga maalamon mapandol?

Ang pipila sa mga maalamon mapandol aron paghinlo ug pagputli kanila, hangtod nga moabot ang kataposan.

Daniel 11:36-37

Labaw kang kinsa man ipataas sa hari sa Amihanan ang iyang kaugalingon?

Ituboy niya ang iyang kaugalingon ingon nga labaw sa tanang dios ug himoon niyang bantogan ang iyang kaugalingon; lakip ang Dios sa mga dios, ang mga dios sa iyang katigulangan, ug ang dios nga gitinguha sa mga babaye.

Daniel 11:38-39

Unsa man ang buhaton sa malimbongon nga hari sa Amihanan aron mapasidunggan siya?

Pasidunggan niya kadtong magpasidungog kaniya. Himoon niya sila nga pangulo sa daghang mga tawo.

Daniel 11:40-41

Sa kataposang panahon unsa man ang mahitabo sa dihang ang hari sa Amihanan moadto sa mahimayaon nga dapit?

Nianang panahona liboan ka mga Israelita ang mapandol ug malaglag.

Kinsa man ang makaikyas gikan sa kamot sa hari sa Amihanan?

Daghan ang gikan sa Edom, sa Moab, ug ang katawhan sa Ammon ang makaikyas gikan sa iyang mga kamot.

Daniel 11:42-43

Unsa man ang pipila ka mga nasod nga mahisakop sa gahom sa hari sa Amihanan?

Ang hari sa Amihanan mopalapad sa iyang gahom ngadto sa Ehipto, sa Libya, ug sa Etiopia.

Daniel 11:44-45

Unsa man ang buhaton sa hari sa Amihanan sa dihang iyang madungog ang usa ka balita nga makapalisang kaniya?

Moadto siya uban ang hilabihan nga kasuko ug iyang pagalaglagon sa hingpit ug magbuhat ug kadaot.

Asa man tukoron sa hari sa Amihanan ang tolda sa iyang palasyo?

Magtukod siya ug harianong tolda nga iyang puy-an taliwala sa kadagatan, sa bukid sa katahom sa pagkabalaan.

Kinsa man ang motabang sa hari sa Amihanan sa kataposan?

Moabot ang kataposan sa hari sa Amihanan, ug walay motabang kaniya.

Daniel 12

Daniel 12:1-2

Kinsa man ang tigpanalipod sa katawhan ni Daniel?

Si Michael, ang bantogang prinsipe nga tigpanalipod sa katawhan ni Daniel.

Unsa man kadaotan ang panahon sa kagubot nga nahisulat dinhi?

Panahon kini sa kalisod nga wala pa gayod mahitabo sukad pa sa sinugdan sa bisan unsang nasod.

Kinsa man ang maluwas nianang panahona?

Nianang panahona, ang katawhan ni Daniel maluwas, ang matag usa ka tawo kansang ngalan nahisulat sa libro.

Unsa man ang mahitabo sa mga nangamatay?

Daghan sa mga nangamatay na ang mabanhaw, ang uban makabaton ug kinabuhing walay kataposan ug ang uban mapakaulawan ug pasipad-an sa walay kataposan.

Daniel 12:3-6

Unsa man ang mahitabo niadtong mga maalamon nga nakakabig ug daghan ngadto sa pagkamatarong?

Kadtong mga maalamon mosidlak sama sa kahayag sa kalangitan, ug kadtong nakakabig ug daghan ngadto sa pagkamatarong mahisama sa mga bituon hangtod sa kahangtoran.

Hangtod kanus-a man ang gisulti nga tipigan ni Daniel ang gisilyohan nga libro?

Gisultihan si Daniel sa pagtipig ug sa pagisilyo sa libro hangtod nga moabot ang kataposang panahon.

Daniel 12:7

Hangtod kanus-a man ang kataposan niining kahibulongan nga mga butang nga gisulti sa tawo nga nagbisti ug lino?

Nagsulti ang tawo nga nagbisti ug lino nga mahitabo kini sulod sa tulo ug tunga katuig. Sa dihang ang gahom sa balaang katawhan mapukan na gayod, kining tanang butanga matapos gayod.

Daniel 12:8-9

Unsa man ang gipangatarongan sa anghel kang Daniel sa dihang wala niya masabti ang iyang gisulti?

Miingon ang anghel, "Lakaw na, Daniel, kay ang mga pulong magpabiling tinago ug gisilyohan hangtod sa panahon sa kataposan.

Daniel 12:10-11

Sa kataposang panahon kinsa man ang dili makasabot sa mga propesiya?

Walay daotan nga makasabot, apan kadto lamang mga maalamon makasabot niini.

Hangtod kanus-a man mahitabo nga hunongon ang matag adlaw nga paghalad ug halad sinunog ug ang paghugawhugaw nga maoy hinungdan sa hingpit nga kamingaw?

sulod sa 1,290 ka mga adlaw.

Daniel 12:12-13

Niadtong panahona kinsa man ang giingon sa anghel nga bulahan?

Ang anghel nag-ingon "Bulahan ang makahulat hangtod nga matapos ang 1,335 ka mga adlaw."

Unsa man ang gisulti sa anghel nga mahitabo kang Daniel?

Miingon siya nga makapahulay si Daniel ug mobarog sa dapit nga gitagana kaniya sa kataposan nga mga adlaw."