၈။‘ယောသပ်’နှင့် သူ၏မိသားစုအား ဘုရားရှင်ကယ်တင်တော်မူခြင်း

နှစ်ပေါင်းများစွာကြာသောအခါ ‘ယာကုပ်’သည် အသက်အရွယ်အိုမင်းပြီဖြစ်သဖြင့် ၎င်း၏ အချစ်ဆုံးသား ‘ယောသပ်’ကို သူ၏ တိရိစ္ဆာန်များအား ထိန်းကျောင်းပေးနေသော အစ်ကိုထံသို့ စစ်ဆေးကြည့်ရှုရန် စေလွှတ်လိုက်သည်။

‘ယောသပ်’၏ ညီအစ်ကိုများက ‘ယောသပ်’သည် သူတို့အဖေ၏ အချစ်ဆုံးသားဖြစ်ပြီးယောသပ် သည်သူတို့၏ အုပ်ချုပ်သူဖြစ်လာမည်ဟု အိပ်မက်မက်သောကြောင့် ၎င်းအား မုန်းတီးကြ၏။ ‘ယောသပ်’သည် သူ၏ အစ်ကိုများထံသို့ လာသောအခါတွင် သူတို့သည် သူ့အားအဓမ္မဖမ်းဆီး၍ ကျွန်ကုန်သည်များထံသို့ ရောင်းစားလိုက်ကြသည်။

‘ယောသပ်’၏ညီအစ်ကိုများသည် အိမ်သို့ပြန်ခါနီးတွင် ‘ယောသပ်’၏ အဝတ်အစားများအားယူ၍ ဆိတ်သွေးများတွင် နှစ်လိုက်ပြီး သူတို့၏ ဖခင်အား ထိုအဝတ်အစားများကို ပြ၍ တောရိုင်းတိရိစ္ဆာန်များက ‘ယောသပ်’ အား သတ်လိုက်ပြီဟုအထင်ရောက်စေသည်။ ‘ယာကုပ်’သည် အလွန်ဝမ်းနည်းသွားလေသည်။

ကျွန်ကုန်သည်များသည် ‘ယောသပ်’အား အီဂျစ်သို့ခေါ်ဆောင်သွားကြသည်။ အီဂျစ်သည် နိုင်းမြစ်ကမ်းဘေးတလျှောက်တွင်ရှိပြီးကြီးမားကျယ်ဝန်း၍အင်အားကြီးမားသောနိုင်ငံတစ်နိုင်ငံဖြစ်သည်။ ကျွန်ကုန်သည်များသည် ‘ယောသပ်’အား ချမ်းသာသော အစိုးရအရာရှိတစ်ဦးထံသို့ ရောင်းလိုက်သည်။ ‘ယောသပ်’သည် သူ၏ သခင်အား ကောင်းမွန်စွာ အလုပ်အကျွေးပြုသဖြင့် ဘုရားသခင်က သူ့အား ကောင်းချီးပေးတော်မူလေသည်။

သူ့သခင်၏ဇနီးသည် ‘ယောသပ်’နှင့် အတူအိပ်ရန်ကြိုးစားလေသည်။ သို့သော် ‘ယောသပ်’ သည် ဘုရားရှင်ကိုဆန့်ကျင်၍မပြစ်မှားလိုသောကြောင့် ငြင်းဆန်ခဲ့သဖြင့် သူမသည် အလွန်အမင်းဒေါသထွက်သွားပြီး ‘ယောသပ်’ အား ထောင်ထဲသို့ ပို့နိုင်ရန်မတရား စွပ်စွဲလေသည်။ ယောသပ်သည်ထောင်ကျသည်အထိ ဘုရားရှင်အားသစ္စာရှိစွာယုံကြည်ကိုးစားသဖြင့် ဘုရားရှင်သည် ‘ယောသပ်’အား ကောင်းချီးပေးလေသည်။

နှစ်နှစ်ခန့်ကြာပြီးနောက် ယောသပ်သည် အပြစ်ကင်းစင်သော်လည်း ထောင်ထဲ၌ပင်ရှိနေသေးသည်။ တစ်ညတွင် အီဂျစ်ဘုရင်ဖာရောသည် အိပ်မက်နှစ်ခုမြင်မက်၍ သူ့အားကြီးစွာ စိတ်အနှောင့်အယှက်ဖြစ်နေသည်။ ထိုအိပ်မက်များ၏အနက်အဓိပ္ပါယ်ကို သူ၏ပညာရှိများသည် မည်သူမျှ မဖော်ထုတ်နိုင်ပေ။

ဘုရားရှင်သည် ‘ယောသပ်’အား အိပ်မက်၏ အဓိပ္ပါယ်ကို ဖော်နိုင်သော စွမ်းရည်အား ပေးထားလေသည်။ ‘ဖာရော’ ဘုရင်သည် ‘ယောသပ်’ အား ထောင်ထဲမှ ခေါ်ဆောင်လာစေခဲ့ပြီး သူ၏ အိပ်မက်များအား အဓိပ္ပါယ်ပြန်ခိုင်းသောအခါတွင် “ဘုရားရှင်သည် အစာရေစာပေါများသောနှစ်၊ခုနစ်နှစ်နှင့် ကပ်ဘေးကျရောက်သောနှစ်၊ခုနစ်နှစ်ကို ဖြစ်စေ‌တော်မူလိမ့်မည်” ဟုပြောကြားလိုက်သည်။

ဖာရောဘုရင်သည် ‘ယောသပ်’အား အလွန်အမင်းနှစ်သက်သဘောကျပြီး အီဂျစ်ပြည်တခွင်လုံးတွင် ဒုတိယမြောက်အာဏာအရှိဆုံးဘုရင်ခံအဖြစ် ခန့်အပ်လိုက်လေသည်။

ယောသပ်သည်လူများအား အစာရေစာပေါများသော ခုနှစ်နှစ်အတွင်းတွင် အစာရေစာမြောက်များစွာ သိုလှောင်စေသည်။ ထို့နောက်အငတ်ဘေးခုနှစ်နှစ် ဆိုက်ရောက်သောအခါတွင် ယောသပ်သည် လူများအား အစားအသောက်များလုံလောက်စွာရရှိစေရန်ရောင်းချပေးလေသည်။

အငတ်ဘေးသည် အီဂျစ်တစ်ခုထဲတွင်သာမက‘ယာကုပ်’ နှင့် သူ၏မိသားစုနေထိုင်သော ခါနာန်တွင်လည်း ဖြစ်ပွားလေသည်။

ထို့ကြောင့် ‘ယာကုပ်’သည် သူ၏ သားအကြီးများအား အီဂျစ်သို့ အစားအစာဝယ်ရန် စေလွှတ်လိုက်သည်။ ညီအစ်ကိုများ အစားအစာဝယ်နေစဉ် ရှေ့၌ရပ်နေသော ‘ယောသပ်’ အား မမှတ်မိကြပေ။ သို့သော် ‘ယောသပ်’မှာ သူ၏အစ်ကိုတို့အား မှတ်မိလေသည်။

ထို့နောက်သူ၏ ညီအစ်ကိုများ ပြောင်းလဲသွားခြင်းရှိမရှိစမ်းသပ်ပြီး နောက်‘ယောသပ်’ သည် သူတို့အား “ကျွန်ုပ်သည် သင်တို့၏ညီ ‘ယောသပ်’ ဖြစ်ပါသည်။ မကြောက်လန့်ကြပါနှင့်။ သင်တို့သည်ယုတ်မာစွာဖြင့် ကျွန်ုပ်အားကျွန်အဖြစ်ရောင်းစားလိုက်ကြသည်။သို့သော်ဘုရားရှင်သည်ကျွန်ုပ်အားကောင်းကျိုးများခံစားရရန်အတွက်ထိုဆိုးယုတ်သောအရာကိုအသုံးပြုခဲ့ခြင်းသာဖြစ်သည်။ အစ်ကိုနှင့်မိသားစုများကို ကျွန်ုပ်ထောက်ပံ့ပေးနိုင်ရန် အီဂျစ်တွင်လာ၍ နေထိုင်ကြပါ” ဟုထုတ်ဖော်‌ပြောဆိုလိုက်လေသည်။

‘ယောသပ်’၏ညီအစ်ကိုများသည် သူတို့၏အိမ်သို့ ပြန်ရောက်သောအခါတွင် သူတို့၏ဖခင်ဖြစ်သူ အား ‘ယောသပ်’ သည် အသက်ရှင်နေသေးကြောင်းပြောပြရာ'ယာကုပ်'သည် အလွန်ပင်ဝမ်းမြောက်ဝမ်းသာဖြစ်သွားလေသည်။

‘ယာကုပ်’သည် အိုမင်းနေပြီဖြစ်သော်လည်း အီဂျစ်သို့ ပြောင်းရွှေ့ပြီး သူ၏မိသားစုနှင့်အတူ ထိုနေရာ၌ ပျော်ရွှင်စွာနေထိုင်ကြလေသည်။ ‘ယာကုပ်’ မကွယ်လွန်မီ သူတို့၏ သားတစ်ဦးစီတိုင်းအား ကောင်းချီးများပေးခဲ့လေသည်။

ဘုရားရှင်က ‘အာဗြဟံ’ အား ပေးခဲ့သောပဋိညာဉ်သည် ‘ဣဇာက်’ထံသို့ လက်ဆင့်ကမ်းခြင်းခံရပြီးနောက် ‘ယာကုပ်’နှင့်သူ၏သား တစ်ဆယ့်နှစ်ယောက်တို့၏ မိသားစုထံသို့ ဆက်လက်ရောက်ရှိသွားလေသည်။ထိုမိသားစု တစ်ဆယ့်နှစ် စုတို့၏ မျိုးဆက်များသည်လည်း ဣသရေလတွင်ရှိသော လူမျိုး တစ်ဆယ့်နှစ်မျိုး ဖြစ်သွားလေသည်။

ကမ္ဘာဦးကျမ်း ၃၇-၅၀