၂၄။ယောဟန်မှ ကိုယ်တော်ယေရှုအား ရေနှစ်မင်္ဂလာပြုပေးခြင်း

ဇာခရိနှင့် ဧလိရှဗက်တို့၏ သားဖြစ်သူ ယောဟန်သည် အသက်ကြီးပြင်းလာသောအခါ ရှေ့ဖြစ်ဟောပညာရှိ ဖြစ်သွားလေသည်။ သူသည် တောကန္တာရထဲတွင် နေထိုင်၍ ကုလားအုပ်အမွှေးအဝတ်ကြမ်းကို ဝတ်ဆင်ကာပျားရည်နှင့်ကျိုင်းကောင်ကိုစားသုံးလေသည်။

လူများစွာသည် တောကန္တာရထဲသို့ ထွက်လာပြီး ယောဟန်ဟောကြားသောသတင်းစကားများအား လာရောက်နားထောင်ကြပါသည်။ ရှင်ယောဟန်က ထိုလူများအား “နောင်တရကြပါ၊ ဘုရားရှင်၏နိုင်ငံတော် တည်လုနီးပြီ” ဟု ဟောပြောခဲ့ပါသည်။

လူများက ရှင်ယောဟန်ပြောသောသတင်းစကားအား ကြားသောအခါတွင် များစွာသောလူတို့သည် သူတို့၏အပြစ်များအတွက် နောင်တရကြသဖြင့် ရှင်ယောဟန်က ရေနှစ်မင်္ဂလာပြုပေးလေသည်။ များစွာသော ဘာသာရေးခေါင်းဆောင်များသည် ရှင်ယောဟန်ထံသို့ လာကြသော်လည်း သူတို့မှာ နောင်တရခြင်း မရှိ၊သူတို့၏အပြစ်များအား ဝန်ခံခြင်းမပြုကြပေ။

အရှင်ယောဟန်သည် ဘာသာရေးခေါင်းဆောင်များအား “မြွေဆိုး၊ သင်တို့၏ အကျင့်စရိုက်များအား ပြုပြင်ပြောင်းလဲရန်နောင်တရကြပါ။ ဘုရားရှင်သည် အသီးကောင်း မသီးသောအပင်ဟူသမျှ ကိုခုတ်လှဲ၍ မီးထဲသို့ပစ်ချခြင်းခံရလိမ့်မည်” ဟု ပြောကြားလေသည်။ထို့ကြောင့် “သင်၏လမ်းကိုအဆင်သင့်ဖြစ်စေရန် ငါ၏ ရှေ့တော်ပြေး တမန်တော်တစ်ဦးကိုသင့်ထက်အလျင်စေလွှတ်တော်မူမည်” ဟူ၍ရှေ့ဖြစ်ဟောပညာရှိတို့ဟောကြားခဲ့သည်များမှာပြည့်စုံမှန်ကန်လေတော့သည်။

အချို့သော ဘာသာရေးခေါင်းဆောင်များသည် အရှင်ယောဟန်အား “မေရှိယ” ဟုတ်၊မဟုတ် မေးကြလေသည်။ အရှင်ယောဟန်က “ကျွန်ုပ်သည် မေရှိယမဟုတ်ပါ။ သို့သော် သူသည် ကျွန်ုပ်၏ နောက်တွင် ပေါ်ထွန်းလာလိမ့်မည်။ သူသည် အလွန်ကြီးကျယ်မြင့်မြတ်သောကြောင့် ကျွန်ုပ်သည် သူ၏ဖိနပ်ကြိုးကိုဖြည်ပေးရန်ပင် မထိုက်တန်ပါ” ဟု ပြန်လည်ဖြေကြားလိုက်ပါသည်။

နောက်တစ်နေ့တွင် ရှင်ယောဟန်ထံ၌ ကိုယ်တော်ယေရှုသည် ရေနှစ်မင်္ဂလာပြုလုပ်ရန် ကြွရောက်လာလေသည်။ ရှင်ယောဟန်သည် သူ့အားတွေ့သောအခါတွင် “ လောကသားတို့၏ဒုစရိုက် အပြစ်များအား အဝေးသို့ ယူဆောင်တော်မူမည့်ဘုရားရှင်၏ သိုးသူငယ်ကို ကြည့်ရှုကြလော့” ဟု ပြောကြားလိုက်လေသည်။

ရှင်ယောဟန်က ကိုယ်တော်ယေရှုအား “ကျွန်ုပ်သည် အရှင့်အားရေနစ်မင်္ဂလာပြုပေးရန်ထိုက်တန်သူမဟုတ်ပါ။အရှင်ကသာ ကျွန်ုပ်အား ရေနှစ်မင်္ဂလာပြုလုပ်ပေးရပါမည်ဟု ပြောကြားလေသည်”။ သို့သော် ကိုယ်တော်ယေရှုသည် “သင်သည် ကျွန်ုပ်အား ရေနှစ်မင်္ဂလာပြုပေးရန်သင့်တော်သူဖြစ်သည်။ အဘယ်ကြောင့်ဆိုသော် ဤအရာသည် မှန်ကန်သောအကြောင်းတရားဖြစ်သောကြောင့်ဖြစ်သည်” ဟု မိန့်ကြားတော်မူလေသည်။ ထို့ကြောင့် ကိုယ်တော်ယေရှုသည် မည်သည့်အခါမျှ အပြစ်ကျူးလွန်ခြင်း မရှိသော်လည်း ရှင်ယောဟန်မှ ရေနှစ်မင်္ဂလာပြုလုပ်ပေးလိုက်လေသည်။

ကိုယ်တော်ယေရှုသည် ရေနှစ်မင်္ဂလာခံယူပြီး ရေထဲမှ ထွက်ပေါ်လာစဉ်တွင် ဘုရားရှင်၏ဝိညာဉ်တော်သည် ချိုးငှက် အသွင်ဖြင့် ပေါ်လာပြီး ကိုယ်တော်ယေရှုအပေါ်သို့ နားတော်မူ၏။တစ်ချိန်တည်းမှာပင် ဘုရားရှင်သည်မိုးကောင်းကင်မှ "ဤသူသည် ငါ၏ချစ်သားဖြစ်သည်။သူ့ကိုငါ နှစ်သက်မြတ်နိုးတော်မူ၏။" ဟု မိန့်တော်မူလေသည်။

ဘုရားရှင်က အရှင်ယောဟန်အားဤသို့မိန့်တော်မူထားခဲ့သည်။ “သင်ရေနစ်မင်္ဂလာပြုပေးသူတစ်ဦးအပေါ်၌ ဝိညာဉ်တော်သည် ဆင်းသက်လာပြီးနားတော်မူလိမ့်မည်။ ထိုသူသည် ဘုရားရှင်၏ သားတော်ဖြစ်သည်” ဟုမိန့်တော်မူထားခဲ့သည်။ဘုရားရှင်သည် တစ်ဆူတည်းသောဘုရားဖြစ်ပါသည်။ သို့သော် အရှင်ယောဟန် သည်ကိုယ်တော်ယေရှုအား ရေနှစ်မင်္ဂလာပြုပေးနေစဉ်အချိန်တွင် သူသည်အဖဘုရားရှင်၏ မိန့်တော်မူသောအသံတော်ကို ကြားခဲ့ရပြီးဘုရား၏ သားတော်ယေရှုထံသို့ဝိညာဉ်တော်သက်ရောက်ခြင်းအားလည်း တွေ့မြင်ခဲ့ရလေသည်။

မဿဲကျမ်း၃:မာကု၁;-၉-၁၁;လုကာ၃;၃း၁-၂၃