၃၉။တရားလွှတ်တော်တွင်ကိုယ်တော်ယေရှုအားစစ်ဆေးမေးမြန်းကြခြင်း

အချိန်မှာ ညသန်းခေါင်အချိန်သို့ရောက်ရှိနေပြီဖြစ်သည်။ စစ်သားများသည် ကိုယ်တော်ယေရှုကို မေးခွန်းအချို့အား မေးမြန်းစစ်ဆေးရန် သာသနာရေးဆိုင်ရာ မဟာနာယက၏နေအိမ်သို့ ခေါ်ဆောင်သွားခဲ့ကြသည်။ စစ်သားများက ကိုယ်တော်ယေရှုအား အိမ်ထဲသို့ခေါ်ဆောင်သွားချိန်တွင် ပေတရုမှာ အပြင်ဘက်တွင် မီးလှုံပြီး စောင့်နေလေသည်။

အိမ်ထဲသို့ရောက်သောအခါတွင် ဣသရေလခေါင်းဆောင်များသည် ကိုယ်တော်ယေရှုအား ရုံးတင် စစ်ဆေးလေတော့သည်။ သူတို့သည် လိမ်လည်လှည့်ဖျား၍ မျက်မြင်သက်သေပြုလုပ်ကြမည့် လူသက်သေများစွာကိုလည်း ခေါ်ဆောင်ထားလေသည်။ သို့သော်စွပ်စွဲချက်များသည် တစ်ခုနှင့်တစ်ခု ကိုက်ညီခြင်းမရှိသဖြင့် ကိုယ်တော်ယေရှုအား အပြစ်ရှိကြောင်းစွပ်စွဲ၍ မရကြ။ ကိုယ်တော် ယေရှုမှာမူ မည်သည့်စကားမျှ မပြောဘဲဆိတ်ဆိတ်နေလေ၏။

နောက်ဆုံးတွင် သာသနာရေးဆိုင်ရာ မဟာနာယကကြီးသည် ကိုယ်တော်ယေရှုအား စေ့စေ့ကြည့် ပြီးလျှင် “သင်ဟာအသက်ထင်ရှားရှိတဲ့ ဘုရားရဲ့သားတော် မေရှိယဆိုတာဟုတ်သလား” ဟူ၍ မေးမြန်းလေသည်။

ကိုယ်တော်ယေရှုက “သင်ပြောသည့်အတိုင်းပင်ဖြစ်၏။ အနန္တတန်ခိုးတော်အရှင်ဘုရားနှင့်အတူ ထိုင်၍နိဗ္ဗာန်ရွှေမြို့တော်မှကြွလာတော်မူသည်ကိုသင်တွေ့ရလိမ့်မည်”ဟူ၍ ပြန်လည်မိန့်ကြားတော်မူလေသည်။ သာသနာရေးဆိုင်ရာ မဟာနာယကသည် ကိုယ်တော်ယေရှုပြန်ပြောသည့်စကားကိုကြားလျှင် အမျက်ဒေါသ ပြင်းစွာထွက်ပြီး သူ၏ အဝတ်အစားများအား ဆုတ်ဖြဲလိုက်လေသည်။ သူသည် အခြားခေါင်းဆောင်များအား “မင်းတို့ အားလုံး သူပြောတဲ့စကားကိုကြားကြတယ်မလား၊ ဒါဆိုရင် ငါတို့အခြားသက်သေမလိုတော့ဘူး၊ မင်းတို့သူ့အပေါ် ဘယ်လိုဆုံးဖြတ်ကြမလဲ”ဟု အော်ဟစ်မေးမြန်းလေသည်။

သာသနာရေးဆိုင်ရာမဟာနာယကကြီး မေးမြန်းသည်ကို ဣသရေလခေါင်းဆောင်များအားလုံးက“သူဟာသေဒဏ်ထိုက်သူဘဲ”ဟု ပြန်လည်ဖြေကြားကြလေသည်။ ထို့နောက်သူတို့သည် ကိုယ်တော်ယေရှု၏ မျက်လုံးအားအဝတ်ဖြင့်စည်း၍တံတွေးဖြင့်ထွေးလိုက်၊လှောင်ပြောင် လိုက်ဖြင့်ဝိုင်းရိုက်ကြလေသည်။

ပေတရုမှာ အိမ်ခြံအပြင်တွင်စောင့်နေစဉ် အစေခံမတစ်ဦးက သူ့အားတွေ့မြင်သွားပြီး “ရှင်လည်း ယေရှုနဲ့အတူပါလာတဲ့တစ်ယောက်မဟုတ်လား”ဟု မေးမြန်းသဖြင့် ပေတရုက ငြင်းဆိုလေသည်။ ထို့နောက်တွင် နောက်အစေခံတစ်ယောက်မှ မေးမြန်းစဉ်တွင်လည်း ပေတရုမှာ ထပ်မံငြင်းဆို လေသည်။ နောက်ဆုံးတွင် လူအများက “မင်းတို့နှစ်ဦးလုံး ဂါလိလဲက လူတွေဖြစ်လို့ မင်းလည်းယေရှုနဲ့အပေါင်းပါဖြစ်တယ်ဆိုတာ ငါတို့သိတယ်”ဟူ၍ ပြောကြလေသည်။

ထို့နောက်ပေတရုက “ငါဒီလူ့ကို တကယ်မသိတာပါ၊ ဘုရားစူးရပါစေ” ဟူ၍ ပြန်လည်ပြောပြလေသည်။ ပေတရုကျိန်ဆိုပြီး သည်နှင့်ချက်ခြင်းပင် ကြက်တွန်လေသည်။ ကိုယ်တော်ယေရှုသည် ပေတရုအား လှည့် ကြည့်တော်မူလေသည်။

ပေတရုသည် အဝေးသို့ထွက်ပြေးသွားပြီးယူကြုံးမရဖြစ်ကာသည်းထန်စွာငိုကြွေးလေတော့သည်။ ထိုအခါတွင် ကိုယ်တော်ယေရှု အား သစ္စာဖေါက်သူ ယုဒသည် ယုဒလူမျိုးခေါင်းဆောင်များက ကိုယ်တော်ယေရှုအား သေဒဏ်ပေးမည်ကို တွေ့မြင်သွားသဖြင့် ဝမ်းနည်းပူဆွေး ၍အဝေးသို့ ထွက်သွားကာ မိမိကိုယ်ကို အဆုံးစီရင်သွားလေသည်။

ထိုအချိန်တွင် ပိလပ်သည် ရောမအစိုးရအတွက်တာဝန်ထမ်းဆောင်သူ အဖြစ်ပါသည်။ ဣသရေလခေါင်းဆောင်များသည် ပိလပ်ဘုရင်ခံမှ ကိုယ်တော်ယေရှုအား သေဒါဏ် ပေးစေလိုကြသည်။ ပိလပ်သည် ကိုယ်တော်ယေရှုအား “မင်းကယုဒလူမျိုးတွေရဲ့ ဘုရင်ဆိုတာ ဟုတ်သလား”ဟူ၍ မေးမြန်းလေသည်။

ကိုယ်တော်ယေရှုက “သင်ပြောတာမှန်၏။သို့သော် ငါ့၏နိုင်ငံတော်သည် ဤလောကနှင့်မသက်ဆိုင်၊ ဤလောကနှင့်သက်ဆိုင်သည်ဆိုလျှင် ငါ့တပည့်များကငါ့အတွက်ပြန်လည်တိုက်ခိုက် ပေးကြပါလိမ့်မည်၊ ငါသည် ဘုရားရှင်၏ သမ္မာတရားအကြောင်းကို ပြောပြလို၍ ဤကမ္ဘာမြေပေါ်ကိုကြွ လာတော်မူခြင်းဖြစ်သည်။သမ္မာတရားကို မြတ်နိုးသူတိုင်း ငါ့စကားကိုနားထောင်ကြ၏”ဟူ၍ မိန့်တော်မူလေသည်။ ပိလပ်ဘုရင်ခံကလည်း “သမ္မာတရားကားအဘယ်နည်း”ဟူ၍ ပြန်လည်မေးမြန်း လေသည်။

ပိလပ်သည် ကိုယ်တော်ယေရှုနှင့် စကားပြောဆိုပြီးနောက် လူထုရှေ့သို့ထွက်၍ “သူ့အားသေဒဏ်စီရင်ရန်အကြောင်းတစ်စုံတစ်ရာကိုမျှငါရှာမတွေ့ပါ”ဟူ၍ ပြောကြားလေသည်။ သို့သော် ယုဒဘာသာရေးခေါင်းဆောင်များနှင့် လူထုက “သူ့ကိုလက်ဝါးကပ်တိုင်သို့တင်၍သတ်ပါ” ဟူ၍အော်ဟစ်ကြပါသည်။ “သူသည် မည်သည့်အပြစ်မျှ ကျူးလွန်ထားခြင်းမရှိ။” ဟူ၍ ပိလပ်ဘုရင်ခံက ပြောကြားသော်လည်း လူထုမှ ပို၍သာကျယ်လောင်စွာ အော်ဟစ်လာကြလေသည်။ ထို့နောက် ပိလပ်သည် တတိယအကြိမ် “သူ့တွင်အပြစ်မရှိပါ”ဟူ၍ထပ်မံ ပြောကြားလေသည်။

ပိလပ်ဘုရင်ခံသည် လူထုကြီးအုံကြွကာရုန်းရင်းဆန်ခတ်ဖြစ်လာမည်ကိုစိုးရိမ်လာ၍ ကိုယ်တော်ယေရှုအား လက်ဝါး ကပ်တိုင်ပေါ်သို့တင်ရန် သူ၏စစ်သားများကို စေခိုင်းပေးမည်ဟု လူထုအား သဘောတူလိုက်ရ လေသည်။ ရောမစစ်သားများသည် ကိုယ်တော်ယေရှုကိုယ်ပေါ်တွင် တော်ဝင်ဝတ်ရုံအား ဝတ်ဆင်ပေး ၍ဆူးခက်သရဖူအား ဆောင်းပေးလိုက်လေသည်။ ထို့နောက်သူတို့သည် ကိုယ်တော်ယေရှုအား “ယုဒဘုရင်ကို ကြည့်ကြပါ”ဟူ၍ လှောင်ပြောင်ကြလေသည်။

မဿဲ ၂၆:၅၇-၂၇:၂၆ ; မာကု၁၄:၅၃-၁၅:၁၅;လုကာ ၂၂:၅၄-၂၃:၂၅ ; ယောဟန် ၁၈:၁၂-၁၉:၁၆