၂၀၊ပြည်နှင်ဒါဏ်ခံရခြင်း နှင့် ပြည်တော်ပြန်ခြင်း

ဣသရေလနိုင်ငံတော်နှင့် ယုဒနိုင်ငံတော်နှစ်ခုစလုံးသည် ဘုရားရှင်အပေါ် ဆန့်ကျင်၍ အပြစ်များကျူးလွန်ခဲ့ကြသည်။ သူတို့သည်ဘုရားရှင်နှင့် 'သိနာ' တောင်ပေါ်တွင် ထားရှိသော ပဋိညာဉ်တော်ကို ချိုးဖောက်ခဲ့ကြသဖြင့် ဘုရားရှင်သည် သူ၏ရှေ့ဖြစ်ဟောပညာရှိများအား သူတို့ထံသို့ စေလွှတ်၍ ၎င်းတို့၏အပြစ်များအား နောင်တရပြီး ဘုရားရှင်အား ပြန်လည်ကိုးကွယ်ကြရန် သတိပေးခိုင်းခဲ့သော်လည်းမနာခံခဲ့ကြပေ။

ထို့ကြောင့် ဘုရားရှင်သည် နိုင်ငံနှစ်ခုစလုံးကို သူတို့၏ရန်သူများအား ဖျက်ဆီးခွင့်ပေးလိုက်သဖြင့် 'အာရှုရိ' သည် အလွန်အင်အားကြီးသော နောက်ထပ်နိုင်ငံတစ်ခု ဖြစ်လာခဲ့သည်။ 'အာရှုရိ' လူမျိုးများသည် အခြားနိုင်ငံများအပေါ်တွင် အလွန်ရက်စက်ကြမ်းကြုတ်ကြသဖြင့် သူတို့သည် ဣသရေလနိုင်ငံတော်အား လာရောက်ဖျက်ဆီးကြလေသည်။ 'အာရှုရိ' များသည် ဣသရေလ မှ လူများစွာကို သတ်ဖြတ်ကြပြီး ၎င်းတို့လိုချင်သောအရာများအား ယူကာ နိုင်ငံ၏အများစုသော နေရာများအား မီးရှို့ခဲ့ကြသည်။

'အာရှုရိ' များသည် လူမျိုးစုခေါင်းဆောင်များ၊ ချမ်းသာသောသူများနှင့် တန်ဖိုးရှိသောအရာများကို ဖန်တီးပြုလုပ်နိုင်သောသူများကို စုပေါင်း၍ 'အာရှုရိ' သို့ခေါ်ဆောင်သွားကြလေသည်။ ဣသရေလရှိ အချို့သော ဆင်းရဲသားမိသားစုများသာ ဣသရေလတွင် ကျန်ရှိခဲ့ကြလေသည်။

ထို့နောက် 'အာရှုရိ' လူမျိုးများသည် ထိုမြေနေရာတွင် အခြေချနေထိုင်ရန်အတွက် တိုင်းတပါးသားများအား ခေါ်ဆောင်ခဲ့ကြသဖြင့် သူတို့သည် မြို့များအား ပြန်လည်တည်ဆောက်ကြလေသည်။ ၎င်းတို့သည် ထိုနေရာတွင် ကျန်နေခဲ့သော ဣသရေလလူမျိုးများအား လက်ထပ်ထိမ်းမြားကြသဖြင့် ကျန်လူများ၏ မျိုးဆက်များအား နောင်တွင် ရှမာရီတန် လူမျိုးများဟု ခေါ်ကြလေသည်။

ယုဒနိုင်ငံတော်ရှိလူများသည် ဣသရေလနိုင်ငံတော်ရှိလူများ ဘုရားရှင်အား ယုံကြည်နာခံခြင်းမရှိသောကြောင့် မည်ကဲ့သို့အပြစ်ပေးခြင်းခံရသည်ကို တွေ့မြင်ခဲ့ကြပြီးဖြစ်သည်။ သို့သော်လည်း ၎င်းတို့သည် ခါနန်ရှိဘုရားများအပါအဝင် ရုပ်တုများအား ဆက်လက်ကိုးကွယ်နေကြလေသည်။ ဘုရားရှင်သည် ၎င်းတို့ထံသို့ ရှေ့ဖြစ်ဟောပညာရှိများအား စေလွှတ်ကာ ကတိတော်စကားများ ပြောကြားခိုင်းခဲ့သော်လည်း သူတို့မှာ လိုက်နာခြင်းမရှိခဲ့ကြပေ။

ဣသရေလနိုင်ငံတော်အား 'အာရှုရိ' လူမျိုးများဖျက်ဆီးပြီး နှစ်တစ်ရာခန့်ကြာသော် ဘုရားရှင်သည် 'ဗာဗုလုန်' လူမျိုးများ၏ဘုရင်ဖြစ်သော 'နေဗုခဒ်နေဇာ' အား ယုဒ၏နိုင်ငံတော်ကို တိုက်ခိုက်ရန် စေလွှတ်လိုက်လေသည်။ 'ဗာဗုလုန်' သည် အလွန်အင်အားကြီးသောနိုင်ငံတော်ဖြစ်သဖြင့် ယုဒဘုရင်သည် 'နေဗုခဒ်နေဇာ' ၏လက်အောက်ခံ နိုင်ငံအဖြစ် နေထိုင်ရန် သဘောတူလိုက်ပြီး ငွေကြေးအမြောက်အများကိုလည်း နှစ်စဉ်ဆက်သရမည်ဖြစ်ပါသည်။

သို့သော် နှစ်အနည်းငယ်ကြာသောအခါ ယုဒ၏ဘုရင်သည် 'ဗာဗုလုန်'အား ပုန်ကန်ဆန့်ကျင်သဖြင့် 'ဗာဗုလုန်' လူမျိုးများသည် ယုဒနိုင်ငံအား ပြန်လည်တိုက်ခိုက်လေတော့သည်။ သူတို့သည် ယေရုရှလင်မြို့တော်အား သိမ်းပိုက်ခဲ့ကြပြီး ဗိမာန်တော်အား ဖျက်ဆီးကာဗိမာန်တော်နှင့်မြို့တော်တွင် ရှိသည့် ရွှေငွေရတနာများအား ယူဆောင်သွားခဲ့လေသည်။

'နေဗုခဒ်နေဇာ' ၏ စစ်သားများသည် သူတို့၏ ဘုရင်အားပုန်ကန်သော ယုဒဘုရင်အား အပြစ်ပေးရာတွင် ယုဒ ဘုရင်၏သားတော်ကို ၎င်း၏အရှေ့တွင် သတ်ပြီး သူ့ကိုလည်း မျက်လုံးကွယ်အောင်ပြုလုပ်လေသည်။ ထိုသို့ပြုလုပ်ပြီးသောအခါတွင် သူတို့သည် ယုဒဘုရင်အား ခေါ်ဆောင်သွား၍ ဗာဗုလုန်ရှိထောင်ထဲတွင် သေဆုံးစေလေသည်။

'နေဗုခဒ်နေဇာ' နှင့် သူ၏ စစ်တပ်သည် ယုဒနိုင်ငံတော်ရှိ လူများအားလုံးနီးပါးကို ဗာဗုလုန် သို့ခေါ်ဆောင်သွားပြီး အဆင်းရဲဆုံးသူများကိုသာ လယ်ယာမြေများစိုက်ပျိုးရန် ချန်ရစ်ထားခဲ့လေသည်။ ဘုရားရှင်နှင့်လူများ ကတိသစ္စာပြုထားသောနယ်မြေမှ ထွက်ခွာသွားရသော ဤအချိန်ကာလကို ပြည်နှင်ဒဏ်ခံရခြင်းဟု ခေါ်လေသည်။

ဘုရားရှင်သည် သူ၏လူသားများကို သူတို့၏အပြစ်များအတွက် နှင်ထုတ်ခံရခြင်းဖြင့် အပြစ်တော်ပေးခဲ့သော်လည်း သူတို့အပေါ်တွင်ပေးခဲ့သောကတိစကားများအား ဘုရားရှင်သည် မေ့လျော့ခြင်းမရှိပေ။ ဘုရားရှင်သည် သူ၏လူများအပေါ်တွင် ဆက်လက်ကြည့်ရှုခဲ့သည်။ သူ၏ရှေ့ဖြစ်ဟောပညာရှိများမှ တစ်ဆင့်ဆက်လက်မိန့်ကြားပြီး သူသည် သူတို့အား နှစ်ပေါင်းခုနှစ်ဆယ်ကြာလျှင် ကတိပေးထားသော မြေနေရာသို့ ပြန်ခွင့်ရမည်ဟု ကတိတော်ပေးခဲ့လေသည်။

နှစ်ပေါင်း ခုနှစ်ဆယ်ခန့်ကြာသောအခါတွင် ပေရသိဘုရင်ဖြစ်သူကုရုသည် ဗာဗုလုန်လူမျိုးများအား အောင်နိုင်ခဲ့သဖြင့် ဗာဗုလုန်အင်ပါယာအစား ပေရသိအင်ပါယာက များစွာသောနိုင်ငံတို့အား အုပ်ချုပ်လေတော့သည်။ ဣသရေလလူမျိုးများအား ယခုအခါ ယုဒလူမျိုးများဟုခေါ်ကြပြီး ၎င်းတို့ အများစု၏ဘဝတစ်လျှောက်လုံးသည် ဗာဗုလုန်တွင်နေထိုင်လာခဲ့ကြသူများဖြစ်သည်။ အသက်အကြီး ဆုံးယုဒလူမျိုးများသာလျှင် ယုဒ၏နိုင်ငံတော်အား မှတ်မိကြလေသည်။

'ပေရသိ'လူမျိုးများသည် အလွန်သန်မာပြီး အင်အားကောင်းကြသော်လည်း ၎င်းတို့သိမ်းပိုက်ထားသော လူများအပေါ်တွင် သနားညှာတာမှုရှိကြပါသည်။ 'ကုရု'သည် 'ပေရသိ'တို့၏ဘုရင်ဖြစ်ပြီးနောက် အချိန်အနည်းငယ်အကြာတွင် 'ယုဒပြည်'သို့ ပြန်လိုသော မည်သည့်ယုဒလူမျိုးမဆို 'ပေရသိပြည်'အားစွန့်ခွာ၍ 'ယုဒပြည်'သို့ပြန်သွားနိုင်ကြောင်းကို အမိန့်ထုတ်ပြန်လိုက်လေသည်။ သူသည် ၎င်းတို့၏ ဗိမာန်တော်အားပြန်လည်တည် ဆောက်ရန်ပင် ငွေကြေးများထောက်ပံ့လေသည်။ ထိုသို့ဖြင့် နှစ်ပေါင်းခုနှစ်ဆယ်ခန့် ပြည်နှင်ဒါဏ်ခံရပြီးနောက်တွင် အနည်းငယ်သောယုဒလူမျိုး လူစုငယ်တစ်စုသာ ယုဒပြည်ရှိ ယေရုရှလင်မြို့တော်သို့ ပြည်တော်ပြန်ကြလေသည်။

ဤသူများသည် ယေရုရှလင်သို့ပြန်လည်ရောက်ရှိလာသောအခါတွင် ၎င်းတို့သည် ဗိမာန်တော်အား ပြန်လည်တည်ဆောက်ကြပြီး မြို့ပတ်လည်တွင် မြို့တံတိုင်းများတည်ဆောက်ကြလေသည်။ 'ပေရသိ'လူမျိုးများသည် ယုဒလူမျိုးတို့အား ဆက်လက်အုပ်ချုပ်နေကြသော်လည်း ၎င်းတို့သည် ကတိပေးထားသော မြေနေရာတွင် ပြန်လည်နေထိုင်၍ ဘုရားရှင်အား ထိုဗိမာန်တော်တွင် ပြန်လည် ကိုးကွယ်ပူဇော်ကြလေသည်။

ဓမ္မရာဇဝင် ၁၇; ၂၄-၂၅; ၂ ရာဇဝင်ချုပ် ၃၆၊ ဧဇရ ၁-၁၀; နေဟမိ ၁-၁၃