၃၇။ကိုယ်တော်ယေရှုက၊လာဇရုအား သေခြင်းမှပြန်လည်ရှင်သန်စေခြင်း

လာဇရုဟုခေါ်သောလူတစ်ဦးရှိခဲ့ပြီး သူ့ထံတွင်မာရိနှင့် မာသဟုခေါ်သော ညီအစ်မနှစ်ဦး ရှိလေသည်။ သူတို့သည် ကိုယ်တော်ယေရှုနှင့်လည်း အလွန်ရင်းနှီးသော မိတ်ဆွေများဖြစ်ကြသည်။ တစ်နေ့တွင် ကိုယ်တော်ယေရှုအား လူတစ်ယောက်မှ လာဇရုအလွန်နေမကောင်းဖြစ်နေကြောင်း လာရောက်၍ပြောပြလေသည်။ ကိုယ်တော်ယေရှုသည် ထိုသို့ကြားသောအခါတွင် “ဤရောဂါ သည် လာဇရုအားသေစေမည့်ရောဂါမဟုတ်၊ဘုရားရှင်၏ဘုန်းတော်ပို၍ထင်ရှားစေလိမ့်မည့်ရောဂါဖြစ်သည်။” ဟူ၍ မိန့်တော်မူလေသည်။

ကိုယ်တော်ယေရှုသည် လာဇရုအား အလွန်ချစ်ခင်တော်မူလေသည်။ သို့သော်သူရောက်နေသောနေရာ၌နှစ်ရက်မျှစောင့် နေတော်မူသည်။ ထိုနှစ်ရက်ကျော်သောအခါတွင်
ကိုယ်တာ်ယေရှုသည် သူ၏တပည့်တော်များအား “ယုဒပြည်သို့ ပြန်သွားကြစို့”ဟု မိန့်တော်မူလိုက်သောအခါတွင် တပည့်တော်များက “မကြာသေးခင်က ၎င်းနေရာမှလူများသည် ကိုယ်တော်ကို သတ်ချင်နေကြသည် မဟုတ်ပါလား”ဟူ၍ ပြန်လည်လျှောက်တင်လေသည်။ ထိုအခါတွင် ကိုယ်တော် ယေရှုက “ငါတို့၏မိတ်ဆွေလာဇရု အိပ်ပျော်လျက်နေ၏။ငါသူ့ကိုသွား နိုးရမည်”ဟူ၍ ပြန်လည်မိန့်တော်မူလိုက်ပါသည်။

ကိုယ်တော်ယေရှု၏တပည့်တော်များက “ကိုယ်တော်လာဇရုသည် အမှန်အိပ်ပျော်နေခြင်းဖြစ်လျှင် သူပြန်၍ကျန်းမာလာပါလိမ့်မည်”ဟု ပြန်လည်လျှောက်ထားလိုက်ပါသည်။ ထို့နောက်ကိုယ်တော် ယေရှုသည် သူတို့အား “လာဇရုမှာသေပြီ။ ငါထိုနေရာတွင် မရှိခြင်းအတွက်ငါဝမ်းမြောက်၏။ ထိုမှသာ သင်တို့ငါ့အားယုံကြည်ကြလိမ့်မည်။”ဟု ပွင့်လင်းစွာ မိန့်တော်မူလေသည်။

ကိုယ်တော်ယေရှုသည် လာဇရု၏မွေးရပ်မြေသို့ရောက်သောအခါတွင် လာဇရုမှာသေပြီး၍လေးရက်ကြာမြင့်ပြီဖြစ်သည်။ မာသသည် ကိုယ်တော်ယေရှုနှင့်တွေ့ဆုံရန်ထွက်လာပြီး “ကိုယ်တော်၊ ကိုယ်တော်သာဤနေရာတွင်ရှိခဲ့လျှင် ကျွန်မ၏မောင်သေမည် မဟုတ်ပါ။ သို့သော်ဘုရားရှင်သည် ကိုယ်တော်တောင်းသည့်အရာတိုင်း အားပေးလိမ့်မည်ဆိုသည်ကို ကျွန်မယုံကြည်ပါသည်” ဟူ၍ လျှောက်တင်လိုက်ပါသည်။

ကိုယ်တော်ယေရှုက “ငါသည်အသက်ရှင်ခြင်းနှင့်ပြန်လည်ရှင်ပြန်ထမြောက်သောအရှင်ဖြစ်၏။ ငါ့အားယုံကြည်သူသည် သေသော်လည်းပြန်ရှင်လာလိမ့်မည်။ ငါ့အားယုံကြည်သူတိုင်းဘယ်သောအခါမှသေဆုံးလိမ့်မည်မဟုတ်။သင်သည် ဤစကားကိုယုံကြည်ပါသလား”ဟူ၍ ပြန်လည်မိန့်တော်မူလေသည်။ ထိုအခါတွင် ‘မာသ’က “မှန် ပါ၊အရှင် ကိုယ်တော်သည် ‘မေရှိယ’ဖြစ်ပြီး ဘုရားရှင်၏သားတော်ဖြစ်သည်ကို ယုံကြည်ပါသည်”ဟူ၍ ပြန်လည်လျှောက်ထားလေသည်။

ထို့နောက် မာရိရောက်ရှိလာပြီး ကိုယ်တော်ယေရှု၏ခြေတော်ရင်းတွင်ပျပ်ဝပ်လျှက် “ ကိုယ်တော်သာဤနေရာတွင်ရှိလျှင် ကျွန်မ၏မောင် သေမည်မဟုတ်ပါ”ဟူ၍ လျှောက်တင်လေသည်။ ကိုယ်တော်ယေရှုသည် သူတို့အား “သင်တို့ လာဇရုအလောင်းကို မည်သည့်နေရာတွင်ထားကြသနည်း”ဟူ၍ မေးမြန်းလေသည်။ ထိုသူတို့က ကိုယ်တော်ယေရှုအား “အုတ်ဂူထဲတွင် ထည့်သွင်းထားရှိပါသည်။ လာ၍ကြည့်ရှုတော်မူပါ”ဟူ၍ လျှောက်ထားတော် မူလေသည်။ ထို့နောက်ကိုယ်တော်ယေရှုသည် မျက်ရည်ကျတော်မူလေ၏။

သင်္ချိုင်းဂူဆိုသည်မှာ အပေါက်ဝတွင် ကျောက်တုံးဖြင့်ပိတ်ထားသော ကျောက်ဂူတစ်လုံးပင်ဖြစ်သည်။ ကိုယ်တော်ယေရှုသည် ကျောက်ဂူဆီသို့ ရောက်လာသောအခါတွင် အခြားလူများအား “ထိုကျောက်တုံးကို ဖယ်လိုက်ပါ”ဟု မိန့်တော်မူလေသည်။ သို့သော် မာသက “သူသေ သည်မှာ လေးရက်ခန့်ရှိပြီးဖြစ်သဖြင့် အပုပ်နံ့များထွက်နေပါလိမ့်မည်”ဟု လျှောက်ထားတော် မူလေသည်။

ကိုယ်တော်ယေရှုသည် “ငါ့အားယုံကြည်ခြင်းရှိလျှင် ဘုရားရှင်၏တန်ခိုးတော်အား တွေ့မြင်ရလိမ့်မည်ဟု ငါပြောထားသည်မဟုတ်လား”ဟု မိန့်တော်မူလေသည်။ ထိုအခါတွင် သူတို့သည် ကျောက်တုံးအားတွန်း၍ဖယ်ရှားလိုက်ကြလေသည်။

ထို့နောက်ကိုယ်တော်ယေရှုသည် ကောင်းကင်သို့မော့ကြည့်ပြီး “အဖဘုရားရှင် သားတော်လျှောက်ထားသည်များအား နာကြားတော်မူသောကြောင့်ကျေးဇူးတင်ပါ၏။သားတော်၏စကားများအား အဖဘုရားရှင် အမြဲနားထောင်တော်မူနေသည်ကိုလည်း သိပါသည်။သားတော်အား အဖဘုရားရှင်စေလွှတ်တော်မူကြောင်းကိုဤနေရာတွင်ရှိသောသူများသိစေရန်ဤသို့အမိန့်တော်ပေးပါ၏”ဟူလျှောက်ထား ကာ “လာဇရု ထွက်ခဲ့တော့”ဟု အော်ခေါ်လိုက်လေသည်။

ထိုအခါတွင် လာဇရုသည်သင်္ချိုင်းဂူမှအသုဘအဝတ်များစည်းနှောင်ထားလျှက်အတိုင်းထွက်လာခဲ့လေသည်။ ကိုယ်တော်ယေရှုသည် ထိုသူတို့အား “ထိုအဝတ်များအား ဖြည်ပေးလိုက်ပါ” ဟူ၍ ပြောကြားလိုက်ပါသည်။ ယုဒလူမျိုးအများစုသည် ထိုထူးဆန်းအံ့ဩဖွယ်ကောင်းသောအဖြစ်အပျက်ကြောင့် ကိုယ်တော်ယေရှုအား ယုံကြည်လာကြလေသည်။

သို့သော်လည်းယုဒလူမျိုးများနှင့် ဘာသာရေးခေါင်းဆောင်များသည် ကိုယ်တော်ယေရှုအား မနာလိုကြသဖြင့်ကိုယ်တော်ယေရှုနှင့် လာဇရုအားမည်သို့သတ်ပစ်ရန် အတူတကွ ပူးပေါင်းကြံစည်ကြလေတော့သည်။

ယောဟန် ၁၁:၁-၄၆