1. Ṯikita
Ner orɔ ŋu ŋa ŋima errini kwɔnkwɔn. Na Allah kete ṯurmuna kwɔmnegina tatap ki nyamin nyir nyirlil. Mindaŋ ma Allah kete ureyiŋi nuŋu orɔ kirim dɔmeny wira kwɔmnena kwere mac. Lakin na ṯigɽim ṯeḏi Allah nani ki ŋawla.
Na Allah ari ŋwu, "Eḏi fori orɔ!" na fori orɔ. Na Allah eze kwizaw beṯen nuŋu eca "kaŋuna" . Nuŋuzi feḏina kirrimgi, nuŋu eca kirrimi "kuluŋa".Na Allah kete fori ki laminu liŋna leḏi ṯikita.
Ki lamin lir nimra kuɽen leḏi ṯikita, Na Allah andazi nuŋu kete lereya kindala kider. Nuŋu kete lereya leḏili uɽǝḏa ŋawna ŋa ŋinanu kindala na ŋa ŋinanu kuṯalu.
Ki lamin lir nimra ṯɔɽɔl, na Allah andazi nuŋu uɽǝḏa ŋawna azir wi wunḏalu. nuŋu eca ezir wunḏalu "urayi," na ŋaw nuŋuzi eca ''rujul.'' Na Allah eze kwɔmne ŋgwa kwumaŋu kete kwizaw beṯen.
Ta na Allah ari ŋwu," eḏi urayi diiɽa yaɽi karwagina tatap," Ner ṯa orɔ kaka ṯa ŋa. Na Allah eze kwɔmne ŋgwa kumaŋu kete kwizaw beṯen.
Ki lamin lir kwɔɽŋan leḏi ṯikita, na Allah kete aŋuna, ǝwǝ, na rorum tatap. Nezi Allah kete eḏi erṯelu ki ṯurmuna na eḏi ilŋiḏini kulŋa lamin li, ŋomor na yiḏləy. Na Allah eze kwɔmne ŋgwa kumaŋu kete kwizaw beṯen.
Ki lamin lir ṯuḏni, na Allah kete kwɔmne tatap ŋgwa kweṯi nani ki ŋawna na ndǝw tatap tɔk. Nazi Allah eze ŋizaw beṯen nuŋuzi ortaḏa.
Ki lamin lir nyirlil leḏi ṯikita, na Allah ari ŋwu,''Eḏi ŋirel nani ki ureylu ŋirna ter ter!'' Ner ta orɔ kaka andizagu Allah. Ner orɔ ŋokɔ ŋa ŋeṯi nani ki yaɽina, ŋokɔ ŋeṯi mulɔ riyalu ki ureylu, ŋokɔ ner orɔ ŋeḏi kiyaɽina ŋu. Nazi Allah eze ŋizaw beṯen.
Ta na Allah ariŋu," A kwiri kete kwizigwunaŋ kwaɽinanyji zuragi. Er əḏi zulṯa kwɔmnela ki ṯurmuna ŋirelŋina tatap.
Na Allah afi kulo nuŋu daɽmaḏa kwizigwunaŋ nuŋu uṯaḏa ŋunduŋu wǝŋna weḏi ŋimiḏa. Nuŋu ece Aḏam. Na Allah kwey karṯinya inḏigu Aḏam eḏi nani, nuŋu kete ŋunduŋu karṯinyna eḏiŋu aŋraci.
Ki karṯinyna, na Allah kwey yaɽi yiiɽen yirlinalu ter kwaɽi-kweḏi ŋimiḏa na kwaɽi kweḏi ṯilŋiḏina ṯeḏi ŋa ŋizaw na ŋiki. Na Allah eca Adamŋu ŋwu a ye yaɽi tatap yinani karṯinyna ta ŋwere ye kwaɽi kweḏi ṯilŋiḏina ṯeḏi ŋa ŋizaw na ŋa ŋiki tɔk mac. Ta maŋu ye kwaɽi ŋgwu, ta ŋu ay.
Ta na Allah ari ŋwu," Ŋiti ŋizawi eḏi kwor nani wiɽen mac.'' Lakin na ŋirel ere eḏi ŋuma eḏi meci Aḏamŋu mac.
Ŋwuṯaŋu na Allah idezi Aḏamŋu nuŋu inḏiri ṯuɽoc. Nuŋu alaḏa Aḏamŋu ṯime ṯete naŋwuḏi kete kwayo ta nuŋu efica ŋunduŋu.
Ma Aḏam eze ŋunduŋu, nuŋu ariŋu," Kwaɽinanyi beṯen! Aḏiŋu ǝni 'kwaw,' kaka daɽmaḏirgu aŋnawi weḏi kwor." Ŋwuṯaŋu eṯi kwor ṯazi ṯernyinlu lenyingi aṯiŋu orɔ aŋna wutuput kwawgi kuŋun.
Na Allah kete kworu na kwaw laɽina ŋuduŋu. Nuŋuzi ortaḏa nuŋuzi eca ŋwu, '' Ilŋiḏiri nyele nyuru na lugurna tɔk mindaŋ urezi ṯurmuna!'' Na Allah eze kwɔmne ŋgwa tatap kukitaŋu kwizaw beṯen, na nuŋu amina kwɔmnegi tatap. Na Allah ṯimazi ṯikita tatap ki nyamin nyir nyirlil.
Mindaŋ ma lamin lir dufa kwɔkuɽeny orɔ, na Allah ṯimazi ŋoḏɽɔr ŋuŋun. Nuŋu kaṯu wǝŋ ŋoḏɽɔrna ŋuŋun ŋakuŋuzi. Nuŋu ortaḏa laminu lir dufa kwɔkuɽeny nuŋu irlinelu ter, kaka maŋu kaṯu wǝŋ ŋoḏɽɔrna ŋuŋun ki laminla klu. Ner ta orɔ ŋu ŋikitaŋi Allah ṯurmuna kwɔmnegina tatap.
Ṯiŋereŋ Ṯeḏi Kiṯam kǝni: Ṯikita 1-2