29. Ṯiŋereŋ Ṯeḏi Kaḏama Kiti Kǝḏi Ŋimiɽiyana mac
Lamin lete,na Butruuz uṯici Yecuŋulu nuŋu eca ŋwu,'' Kweleny ,nyamin nyorɔ ḏa nyenyi iɽnyaci aŋgǝriŋulu maŋu akici nyiŋu pir? Ŋorɔ nyaminuna dufa kokuɽeny a?'' Na Yecu eca ŋwu,'' Ŋende ŋeni nyaminuna dufa kokuɽeny mac, lakin nyaminuna ruɽiŋana ṯɔɽɔl na wri na dufa kokuɽeny!'' ŋiɽaŋalŋi ŋwu, Yecu kunaŋnanyji eḏizi iɽnyacilu nyaminu tatap. Ta na Yecu andazi ṯiŋeroŋa kiḏu.
Na Yecu ari ŋwu,''Ŋeleny ŋeḏi Allah ŋiri kaka kweleny ŋgwa kunaŋna eḏi kete ṯiɽiyaḏa yaḏama yi yuŋun. Kete kir kaḏama kuŋun kinaŋnaḏiŋu ḏena ṯeḏi ŋirel ŋiri kaka 200,000 ujra weḏi yiḏlǝy.''
''Kaka magu kaḏama ŋga ere kete kiriiza mac, na kweleny ari ŋwu, ' Liṯiri koru ŋgu kiḏay lizilina leḏi dunuŋ kuŋun kaka luway mindaŋ eḏiŋu aɽazi kamzu kuŋun.'''
''Na kaḏama idici ŋurguŋilu ki yeyna yeḏi kweleny nuŋu eca ŋwu, 'nyi kunaŋnaŋa eḏi muḏici nyiŋu ṯɔgori kokɔ, na nyi kwiŋa ruci kamzulu ŋga tatap kiri kaka kinaŋnaḏiŋa. 'Na ŋimiɽi ye kwelenyina beṯen ŋeḏi kaḏama ŋga, nuŋu kii kamzu ŋga tatap kinŋnaḏuŋu nuŋu eca ŋwu inḏi.''
''Lakin ma kaḏama ruuḏa nanigu kweleny, nuŋu inḏa kwete kwiṯir gi uɽmaṯi kwir kaḏama kwǝḏirgi kamzu kima ǝḏi yǝwə kwɔɽŋan. Na kaḏama muḏa meḏgen kwir kaḏama tɔk nuŋu eca ŋwu, 'ruucanyi kiriiza ŋgwa kunaŋnaḏinyi ŋaŋu!'''
''Na ŋgwa kweṯirgi oɽmaṯi kwir kaḏama idǝcilu ŋurguŋilu nuŋu eca ŋwu, ' Nyi kwaraḏiŋa eḏi muḏici nyiŋu ṯogɔri, nyi kwiŋa ruci kamzu kuŋa tatap kir kaka kinaŋnaḏinyi. 'Lakin na kaḏama dima ŋgwa ,kweṯir gi uɽmaṯi kir kaḏama tɔk nuŋu kaṯu ki zijin na mindaŋ maŋu ruci ŋunduŋu kamzu kuŋun.''
''Na Yaḏama yokɔ eze ŋiɽaŋali ŋa ŋerrina ner urtinina beṯen. Ner ele nanigu kweleny ner andaci ŋiɽaŋali ŋir kaka ŋǝrrina.''
''Na kweleny urnuṯi kaḏama nuŋu eca ŋwu, ''Ŋa kwiri kaḏama kiki ṯogɔri! Nyi kumaŋ afrinyjici kamzu kuŋa ŋga tatap kaka ariḏiŋa nyiŋu ŋwalŋi. Ner ufḏani duŋguŋa eḏi erri kaka ṯaŋu.''Na kweleny ere amina mac nuŋu kaṯu ŋgwa kwiri kaḏama kiki ṯogɔri kizijin na ŋunani mindaŋ ŋuruci kamzu kuŋun ŋga tatap.''
Na Yecu ari ŋwu, ''Ŋinderṯa ŋir kaka ŋinḏizi papa kwinyi kweḏi ki lerenaŋu eḏizi ǝrrici kwizi kwere daŋgalna kwiti kweṯi iɽnyaci eŋgenlu ṯogɔrḏi minmin mac.''
Ṯiŋereŋ ṯinani kiṯamna keni: Matta 18:21-35