15.Urey Weḏi Ṯikitaḏiza
Kwaḏan ta na aŋun orɔ weḏi yi Izrayiilŋa ǝnḏi kanaan, urey weḏi ṯikitaḏiza. Na Jazzwua alla loru na nden nuŋuzi uzi kaka leṯi uṯa kandiza ki maḏinana kweḏi likanaan kweḏi Arihaŋu ŋgwa kwaŋrina rerecen ri rifirli teter. ki maḏinana ŋgwa na kwaw nani kwete kwir kwijin kwǝni Rihab kuma luci lizi kila leṯi uṯi ŋiɽaŋali mindaŋ nuŋuzi meci eḏi afri. ŋǝrrəŋuzi ŋu kaka əḏiŋu ṯǝmina ṯeḏi Allah. Ner kitaḏa eḏi aŋraci Rihabŋu lizi li leḏi dunuŋ kuŋun, mindaŋ ma Izrayiil kii Arihaŋu.
̌Na lizi leḏi Izrayiil ufḏani eḏi uɽaḏa kifirṯana keḏi Orḏunŋu eḏi ǝnḏi ki ureyla weḏi ṯikitaḏza. Na Allah eca Jazzwuaŋu, '' eḏi lijawiḏ ele kerreny. " mindaŋ ma lijawiḏ kete ŋwaralu ŋawla ŋeḏi kifirṯa keḏi Orḏunŋu, na ŋaw kifirṯana irli eḏi irǝlu ŋwuṯaŋu na Izrayiilŋa ǝḏi ŋuma eḏi uɽǝḏa ŋawna kiezir wunḏalu.
Mindaŋ ma lizi uɽǝḏa kifirṯna keḏi Orḏunŋu, na Allah andaci Jazzuwaŋu aŋguru eḏi ǝnḏiḏa maḏinana ŋgwa kwǝḏi ŋuma beṯen kweḏi Arihaŋu. Na lizi iɽi Allahna. Kaka ṯa andicazigu Allah eḏizi ǝrri, na lijawiḏ urṯayi rikaḏa mad̄ina lu taminu tutuput nyaminu na nyirlil.
Ta ki laminla lir dufakwuɽeny ,na Izrayiilŋa rikaḏa maḏina lu nyaminu na dufakwuɽeny kwokwony. Mindaŋ mer rikaḏa maḏina lu ki lamin likiɽmiḏu liṯimaḏi, na urṯa ipi ŋwakǝɽiŋi kinaŋ ma lijawiḏ ǝrni luburuza.
Ta na rerecen ririkaḏi Arihaŋlu irdi ki ureylu, na lizrayiil kii kwɔmne tatap kaka andicazi gu Allah. ner ṯa ruu Rihabŋuzi na lizi leḏi dunuŋ kuŋun, kaka mer orɔ duŋli leḏi Izrayiil. mindaŋ ma lizi liḏaḏu linanu Kanaan neŋne Izrayiilŋa lima kii Ariha ŋu na ner ṯenye beṯen kaka arirgu ŋwu Izrayiil kwezi ǝnḏiḏana ŋuduŋuzina tɔk.
Na Allah allici Izrayiiluzi wamira eḏi ere kete kruu keḏi ŋiɽǝna mac lizi li leḏi ŋuduŋ ŋweḏi Kanaanŋu mac. Lakin na duŋ lete leḏi lizi leḏi kanaanŋu liṯirzi eca lijabauun, kǝkici Jazzwuaŋu ŋǝluŋ ner eca nyiŋa leḏi ezir wete winanu kanaanŋu kwɔrɔ nyiŋa liti leḏi Kanaanŋu liri mac. Ner uṯici Jazzuwaŋu lu eḏi kete kruu keḏi ŋiɽǝna ŋuduŋali. Na Jazzuwaŋa Izrayiilŋali ere uṯici Allah lu mac Lijabauunli linḏi ṯakaŋgi mac. Ŋwuṯaŋu na Jazzuwa kete kruu keḏi ŋiɽǝna ŋunduŋali.
Ta na Izrayiilŋa ke rugwɔrina beṯen mindaŋ mer elŋe ŋǝluŋi ŋeḏi Lijabauun lima kiɽǝnji ŋunduŋuzi lu, lakin ner aŋraci kruu keḏi ŋiɽǝna kaka kitarzi gu ki yeyna yeḏi Allah. Ma nyamin ṯamḏu nyokɔ, Na kweleny kweḏi luduŋ leḏi lizi lete kwokwony leḏi kanaanŋu, lir Amuuri, neŋne Lijabauun lima kete kruu keḏi ŋiɽana Izrayiilŋa li, ŋwuṯaŋu ner aɽiza urṯa duŋ wupa ner ǝnḏiḏa Jabauunŋu na. Na Lijabauun ṯiŋaci Jazzuwaŋu juwaba eḏi mǝci ŋunduŋuzi.
Ŋwuṯaŋu na Jazzuwa aɽazi urṯa duŋ weḏi Izrayiil ner ele kulŋǝ tatap eḏi kaṯazi Lijabauuna. ŋurpana tutuk ner liŋɽazi Liamuuriya nerzi ǝnḏiḏana.
Na Allah ṯuguḏici Izrayiilŋu ki lamin kila. nuŋu duŋgwaci Liamuuriya eḏi rǝmbǝlni na nuŋuzi uzica ŋurom ner eɽnye lizi luru lir Liamuuri.
Na Allah muḏǝḏa aŋuna lu tɔk kilere mindaŋ a Izrayiil ǝḏi aŋwuna wupa weḏi yi ketece Liamuuriya ŋoru. Ki laminla ta kla, na Allah inḏeḏa Izrayiilŋu ṯilaza kii ṯupa.
Mindaŋ ma Allah ilazi ṯuwǝni kiḏa kii, ta na ŋuduŋ ŋuru ŋwir ŋweḏi lizi lir Likanaan aɽaḏi duŋ ǝḏi ǝnḏiḏa Izrayiilŋuna. Nezi Jazzuwaŋa lizrayiil li ǝnḏiḏana nerzi iri kiṯay
Ma ŋǝrya ŋu ere, na Allah inḏeḏa yabila yir na ter ter yeḏi Izrayiil ǝzir wokɔ weḏi urey weḏi ṯitaḏza eḏi orɔ weŋen. Ta na Allah inḏeḏa Izrayiilŋu ŋiɽǝna ki yibirla yirikaḏi ŋunduŋuzi lu tatap.
Mindaŋ ma Jazzuwa orɔ kwor kupa, nuŋu urnoṯi lizi tatap leḏi Izrayiil duŋli. Nuŋuzi ṯiŋǝyini ŋa ŋɔfḏana deŋgenna eḏi iɽi ṯikǝkinana kiḏa ṯikita Allah Izrayiilŋali ki ayiinla weni Zinna. Na lizi kitaḏa ǝḏi irlalu nyeɽe nyeɽe eḏi Allahna na eḏi rumi kruu kuŋun tɔk.
Ṯiŋereŋ ṯeḏi kiṯam kirlinalu ter kǝni: Jazzuwa 1:24