34.Yecu Urtunaŋ gu Riŋereŋwa Riḏaḏu

Na Yecu andazi riŋereŋwa riḏaḏu ruru reḏi ŋeleny ŋeḏi Allah. Kaka ṯaŋu naŋuzi eca ŋwu," Ŋeleny ŋeḏi kilerenaŋ ŋiri kaka lola leḏi kwaɽi kwir kuḏa kila lukuḏi kwor kiturunyna tuŋun. Ŋa kwilŋidi rac eḏariŋu tor teḏi kuḏa tiri tokuɽeny ki ŋolana tatap."

Lakin ma tor teḏi kuḏa ruuḏa ta naŋu peŋe ki ŋola karṯinyna, kupa mindaŋ eṯi ndaw ila eṯir nanalu ki riilla ruŋun.''

Na Yecu andazi ṯiŋereŋ ŋwa ṯete kɔkwac, " Ŋeleny ŋeḏi Allah ŋiri kaka nyurŋa nyilakicazi kwawna yiila yi mindaŋ mer ṯugli tatap."

"Na ŋeleny ŋedi Allah orɔ kokwac kaka ṯawana ṯima kwor kwete luci ki ureyna. Na kwor kwete anḏa kwir ter naŋu kurṯi kokwac . Naŋu uranin ṯamana ṯi naŋu ele eḏi ila komne tatap kwediŋu eḏi dima kiriiza eḏigi ila ureyla."

"Na ŋeleny ŋeḏi Allah orɔ kokwac kaka lulu leḏi ilina yupa. Mindaŋ ma ṯajir ṯeḏi lulu inḏa ta, naŋu ila komne kiṯay tatap kweḏiŋu ta naŋu dima kiriiza ǝḏi liṯa."

Ta na Yecu nadazi ṯiŋereŋwa kiḏu ǝḏi lizi lokɔ kila liṯi ǝliḏa ŋɔḏɽɔr ŋeŋen ṯugɔri nana na eṯirzi ere amini ŋeḏi lizi liḏaḏu mac. Naŋu ariŋwu," Lor nden linḏi ǝḏi ǝnḏi kiheykelna ǝḏi ari ki yiriny. Kwete deŋgena naŋu orɔ kweṯi ǝlila ṯulba, na kwete naŋu orɔ nda leḏi ḏiin."

"Ŋgwa kwir nda leḏi ḏiin naŋu ari ki yiriny kaka ṯaŋu,' Zukran ,ŋa kwir Allah , nyi kwiti kuki kaka lor liḏaḏu mac lir kaka liṯi dimaḏa lizi komne tɔk, na lizi liti lir lalu mac, na lir lijin tɔk ya ǝḏi orɔ kaka ŋgwala kwiṯi ǝlla ṯulba."'

'"Kaka ṯaŋu , eṯinyi ǝliḏa edneya rii nyamin nyiɽen ki uzbuu na eṯinyi inḏaḏǝ ŋaŋu wri kweḏi kiriiza maŋu rataḏi ruɽiŋana ṯuḏni na kwomne kuzaw ŋgwa kweṯi nyi inda."'

"Lakin ŋgwa kweṯi ǝlla ṯulba naŋu rili tuk ki ezir wa weḏi ŋgwa kwir nda leḏi ḏiin, na naŋu ere baŋaḏa lereya la mac. Ta naŋu ipi kurdoma kuŋun ta naŋu ari ki yiriny, ''Allah, eḏiŋa ŋimɽi iyaḏa naniny gu kaka iriny gu kwizi kuki.'"

Na Yecu ariŋwu, " Nyi kwaŋazi andaci rerem, Allah wuma niŋnaci ŋgwa kweṯi ǝlla ṯulba tara ṯuŋun ki yiriny naŋu ruzi kuzuɽu. Lakin naŋu ere amɽi tara ki yiriny ṯeḏi ŋgwa kwir nda leḏi ḏiin mac. Allah winḏi ǝḏi dapazi kwuzamu kwere kweṯi ipini ki rogɽɔ, naŋu dimaḏala ŋgwa kweṯi ǝjilini ki rogɽɔ."

Ṯiŋereŋ ṯeḏi injiil tanani kiṯamna keḏi Matta 13: 31-33;44-46;Marguuz 4:30-32; Lugga 13:18-21;18:9-14