20. Ŋufanya na Ṯaɽiḏa Dunuŋ.
Na ŋeleny ŋeḏi Izrayiil ŋa Yahuḏḏa gi ǝrri ŋikiaŋi kuduŋ nanigu Allah. Ta ner kii kuru na ŋga ki kita Allah ŋunduŋali ki ainla weni zinna. Nezi Allah ṯiŋaca liɽiya eḏi kirnyaḏa ŋunduŋwzi mindaŋ eḏi aɽa eḏi kwɔce ŋunduŋu lu, lakin ner derne eḏi inyici ŋunduŋu nana.
ŋwuṯaŋu na Allah inḏeḏa ŋelenyi kiduŋ jiza nuŋu duŋgaci ṯwǝni ṯeŋen eḏi kirazi ŋunduŋuzi lu. Na Kweleny ŋgwa kwir kweleny kweḏi ezir tatap kweḏi Zuuriya ŋu, kweḏi ŋuma beten, na lizi lira rogwɔrna, ner kii ŋeleny na ŋeḏi Izrail. Na lizuurya eɽenye lizi luru ki ŋeleny na ŋeḏi Izail, ner dimi kwɔmne tatap kwir kwurara yili, ner dunazi ezir wupa ki baleḏna.
Ta na lizi leḏi Zuuriyaŋu aɽazi lizi duŋ lir ŋuɽa, na lir lurṯo, na kla lilŋiḏi ŋɔḏɽor nerzi mulɔ ner li ele Zuuriya. Nerzi ṯa ṯazalu ki ŋeleny na ŋeḏi Izrail kla lir luway liti limerzi eɽenye mac.
Ṯaŋwu na lizuuriya afa lizi leḏi nyen nerzi inḏeḏa ezir weḏi ŋeleny ŋeḏi Izrail eḏi yi nani na. Na lizi kla leḏi nyen aɽazi maḏina lu ŋgwa kwumer kii ta ner agi lizi leḏi Izrail leɽina kinaŋ. Na lugurna leḏi Izrayiil kla lima agi lizi leḏi nyen nerzi eca Lizamri.
Na lizi leḏi ŋeleny ŋeḏi Yahuḏḏa ŋu eze aŋgurwu magu Allah ipi lizi leḏi ŋeleny ŋeḏi Izraiil ŋu kaka dirnar gu eḏi ǝmini na eḏil iɽi ŋunduŋu na mac. Lakin ner ṯa kwɔkce libaila lu, na yallah yeḏi lizi leḏi kanaan ŋu tɔk. Nezi Allah ṯiŋaca liɽiya eḏi ermici ŋunduŋuzi, lakin ner derne eḏi neŋne.
Ma yiḏlǝ yir kaka 100 ṯamḏu nyaminlu nyimanyi lizuuriya kii ŋelenyna ŋeḏi Izrail, na Allah ṯiŋaḏa Nabukaḏnazirŋu, kwir kweleny kweḏi Babilŋu, eḏi enḏiḏa ŋelenyna ŋeḏi Yahuḏḏaŋu eḏizi ṯuguḏi. kaka firligu ŋeleny ŋeḏi babilŋu beṯen. Na kweleny kweḏi Yahuḏḏaŋu amini eḏi orɔ kuway kweḏi Nabukaḏnazir eḏi ketezi kuruza kuruu dǝdǝp yiḏlǝyu tatap.
Lakin mata yiḏlǝ yokɔ ṯamḏu, na kweleny kweḏi Yahuḏḏaŋu iṯanici ŋelenyna ŋeḏi babilŋu. Ŋwuṯaŋu, na libabil aɽa ner ṯuguḏi ŋelenyi ŋeḏi Yahuḏḏaŋu mindaŋ ner miḏa maḏina ŋgwa kupa kweḏi Urzalimŋu. Ta ner kii daŋga, ner dimi kwɔmne kwir ṯawuna ndendeṯ ṯeḏi maḏina na daŋga tɔk.
Eḏi inḏeḏa kwelenyi kweḏi Yahuḏḏaŋu jiza kweḏi ṯiṯǝnena, Na orṯa weḏi Nabukaḏnazir ɽenye kwelle kweḏi kweleny kwir nyɔŋor ki yeyna yuŋun na ner ruzi ŋunduŋu kunduŋ. Mindaŋ merzi ǝrri ŋa, ner mulɔ kwelenyi eḏgi ele eḏi ay ki zijina kweḏi Babilŋu.
Na Nabukaḏnazirŋa urṯa yi wuŋun mulɔ lizi leḏi ŋeleny ŋeḏi Yahuḏḏaŋu ladaḏi keṯɔk eḏi ṯimani kworɔ nerli ele Babil, nerzi ṯazalu lir luway eḏi kwɔe rurony. Na ŋumor ŋwa ŋumŋi lizi leḏi Allah mulɔḏne ŋumaŋina ŋuwaya eḏi ṯazi ureyŋi lu weḏi ṯikitaḏiza ǝni ŋufanya.
Kaka kina ṯiŋaḏi Allah ǝpa wuŋun ki lizina luŋun kaka ǝrrergu ŋikiyaŋi ṯiŋaḏuŋuzi ki ŋufanya na, lakin nuŋu li ere ṯuḏina ya ṯikitaḏizaḏi tuŋun mac. Eṯita Allah raŋaḏa lizi luŋun na eṯuŋuzi andaci liɽi li luŋun. Na naŋwzi inḏeḏa ṯikitaḏiza ṯeni ŋwu, ma yiḏlǝ ruɽi ṯoɽɔl na wri ṯamḏu ta, er ma orle kwokwony ki urey la weḏi ṯikitaḏiza.
Ma yiḏlǝ yir kaka ruɽi ṯoɽɔl na wri ṯamḏu Zyruuz kwir kweleny kweḏi lifariz, ilazi Babilŋu kii na ŋeleny ŋeḏi lifariz murṯaḏa ki ŋelenyla ŋeḏi Babilŋu ŋupa. Ṯaŋwu ner eca lizi leḏi Izrayiil yahuuḏ lokwɔ deŋgena linani yiḏlǝyu yeŋen tatap Babil. Na lokwɔ lima peŋe lir yahuuḏ ner ṯiŋaini azir weḏi Yahuḏḏa ŋu.
Na ŋeleny ŋeḏi lifariz ŋupa na ŋifirli tɔk ta ner eḏi ŋimɽiya ki lizina liṯerzi ilazi kii. Ŋiti ŋulina mac mindaŋ ma Zyruuz orɔ kweleny kweḏi lifariz, nuŋu ala wamira wari ŋwu ma yahuuḏ yere naŋni eḏi aɽi Yahuḏḏa kweḏi ŋuma eḏita a ṯazi Fariziŋu lu eḏi aɽi Yahuḏḏa. Nuŋuzi inḏeḏa kuruza eḏigi aɽazi daŋgalu! Ŋwuṯaŋu, ma yiḏlǝ ruɽi ṯɔɽol na wri ṯamḏu nanirgu ki ŋufanya na. Na lizi lokɔ liti luru mac lir yahuuḏ aɽiḏa ki maḏina na kweḏi Urzalimŋu Yahuḏḏa na.
Mindaŋ ma lizi upaḏa Urzalim, ner aɽazi daŋgalu ŋgwa kumer kii na rercen ririkaḏu maḏina lu tɔk. Na nanir kina ki ŋelenyna ŋeḏi lizi liḏaḏu, kwokwony ta ner nani ki urey la weḏi ṯiktaḏiza na eṯir kwɔce Allah lu ki daŋgana.
Riŋereŋ reḏi yiṯam yeḏi Muluuk aṯaani 17:24-25; akhbar ayaam ataani 36;Izra 1-10;Namiya 1-13.