26 .Yecu Maŋu Aki Ŋoḏɽɔr
Mindaŋ maŋu keteci ṯugɔma ṯeḏi ziṯan ŋoru, na Yecu aɽa ŋuma ŋi ŋeḏi Ṯigɽim Ṯirlinalu Ter kililina leḏi Jalilŋu ki ezir weṯuŋ yi nani. Na Yecu ele ki ezirna wirna ter ter nuŋu urtuni lizilu. Na lizi tatap uŋuni ŋiɽaŋali ŋizaw ŋeni ŋuŋun.
Na Yecu ele ki maḏina na kweḏi Nazraŋu ezir wunanuŋ yi ŋɔgɔŋi. Ki lamin leni zabiṯ ,naŋu ele kezir weḏi ṯukwecalu. Ner inḏada izkorɔla kweḏi kuɽi kweni Izaya mindaŋ eḏiŋu urti. Ta na Yecu kiṯi izkorɔla ta naŋu urtici lizi ǝzir wokɔ.
Na Yecu urti, "Allah winḏaḏinyi ṯigɽima ṯuŋun mindaŋ eḏi nyi ilŋiḏni lizi lir luway, ŋiɽaŋali ŋizaw, eḏi inḏaḏa lizi huriya kila lumurzi, eḏiŋuzi kiṯici yey kila lir lunduŋ na eḏizi kaṯini wuŋ kila libiina ṯurfa. Kiḏla ŋgu keḏi ṯamɽa ṯeḏi Allah kwiri."
Ta na Yecu nanalu. Na lizi tatap raŋiḏa ŋunduŋu keṯɔk. Ner elŋe ŋiɽnya ŋeḏi kig̱am ŋga ṯa kumoŋu urti ŋeni ŋeḏi Mezaya. Na Yecu ariŋu, " Ŋiɽaŋal ŋiminyji urtici ŋaŋuzi ŋwu ŋerrina kiremŋgu" Na lizi tatap liŋɽi. ''Ner ariŋu tor teḏi Yuuzif titi tri meny a?"
Na Yecu ariŋu, " Ŋeḏi yeyna rerem kuɽi kwiti kwere mac kwetir amɽi dunu ki maḏina na kuŋun. Ki nyamina na nyeḏi kuɽi kweni Iliya, na law nani luru layu lworu ki ŋeleny na ŋeḏi Izrayiil. lakin ma kaw ere dunni yiḏleyu ṯoɽɔl na kuɽanana kelgenyina, na Allah ere uza Iliyaŋu mac eḏiŋu meci kwaw kwira kworu na ki Izrayiilna, Lakin nani gu kwaw kwira kworu kweḏi umam kwir ter.''
Na Yecu eŋne naŋu ariŋu, " Na ki nyamin na nyeḏi Iliyaza kwir kuɽi, na lizi litaziri leḏi kimaḏ keḏi yirna ki Izrayiillna.lakin na Iliyaza ere zawi kwere deŋgenna mac. Na naŋu zawi kimaḏi dak keḏi Numaan, kwir nda leḏi ṯuwan ṯeḏi Izrayiil kuuma kimaḏ keḏi yirna." Na lizi liniŋnaca Yecuŋu ner orɔ Yahuud. Mindaŋ mer niŋnacazi Yecu ŋandicaŋuzi, ner ke rugɔrna beṯen ŋunduŋgi.
Na lizi laḏi Nazraŋu ner omlɔ Yecuŋu ki ezirna weḏi ṯukwecalu ner ruwa ŋunduŋu kimamuwa kenni edi̱ eɽenye ŋunduŋu. Lakin na Yecu ruu ki ŋuduŋana ta naŋu ṯazi maḏina lu kweḏi Nazraŋu.
Ta na Yecu iraralu ki yezirna yeḏi Jalilŋu, na ŋuduŋ ŋuru ila naniŋu gu. Ner mulḏa lizi luru luuma na lir yuborkɔn tɔk, mindaŋ kila liti leṯi iciḏi ,liti leṯi ele, ya liti leṯi andazi, mac ta nezi Yecu zawi .
Na lizi luru leḏi rigɽimana deŋgen riki nerzi mulḏa nanigu Yecu. Nezi Yecu eca amura, na rigɽim riki ruḏa ki lizina, eṯir arri kola," Ŋa kwiri tor teḏi Allah!" Na ŋuduŋ ŋweḏi lizi ner liŋɽi ner kweci Allahlu tɔk.
Ta na Yecu alla lworuna lir wri kuɽen naŋuzi eca yafuur. Eṯi yafuur iraralu Yecuŋali na eṯirzi elŋe naniŋu gu .
Tiŋereŋ ṯeḏi injiil ṯinani kitam na keḏi matta 4:12-25;marguuz 1:14-15;35-39;3:13-21;lugga 4:14-30;38-40