32.Yecu Maŋu Zawi Kworu Ŋgwa Kweḏi Ṯigɽimana Ṯiki Na Kwaw Ŋgwa Kuuma Tɔk

Lamin lete, na Yecuŋa limeḏgen li ele ner ǝnḏi ki falukana ǝḏi ṯamḏu ṯujuli kenni ki ezir wa wiṯi yi lizi nani kila lir Lijaḏri.

Mer upaḏi kezir wa weḏi ṯujuli kenni, na kwor ŋgwa kweḏi ṯigɽimana ṯiki ruḏa naŋu ǝfraḏa Yecuŋu nana.

Kwor ŋgu naŋu orɔ kwizi kwete kweḏi ŋuma beṯen na kwizi ere kwere kwindi aḏi ogomci mac. Na eṯi lizi kǝki rii na ŋwara ŋuɽɔŋ ŋi, lakin ǝṯuŋuzi ṯa undaḏana.

Kwor ŋgwa ǝṯuŋu nani ki ezir weḏi rimam. Kwor ŋgu ǝṯiŋu opona kɔlagi kilkalu na kaŋina tɔk. Ǝṯiŋu ere kenne yireḏi mac na ǝṯiŋu undundi ǝŋna wuŋun nana yalyi.

Mindaŋ ma kwor ila nani gu Yecu, naŋu idacalu ŋurguŋi kiyena yuŋun. Na Yecu eca ṯigɽima ṯiki ŋwu, ''Ruḏu parlu eḏi kworna ŋgu!''

Na kwor kweḏi ṯigɽimana ṯiki ari ṯogɽɔ ṯi ṯete ṯupak, " Ada kwiri kunaŋnaḏinyi, Yecu, tor teḏi ŋgwa kupa kweni Allah? Nyi kwaraḏiŋa ŋwal eḏi ere inḏaḏa nyuŋu ṯurfa ṯere mac !" Na Yecu uṯici ṯigɽimalu ṯiki naŋu ǝca ŋwu, " A kweni ǝya? " Naŋu ǝŋnici naŋu eca ŋwu, "Nyi kweni Ligon, kaka rodinyi luru." ( " Na ligon eni" ŋuduŋ yir elifna yuru ki urṯana weḏi Rumiyaŋu.)

Na rigɽim riki naŋniḏa Yecuŋu ner eca ŋwu," Eṯi ṯiŋaḏinyji ki ezir kwir ter mac !" Kinaŋu ta na yizaŋ nani ayiinu korɔ yinulu. Ta, na rigɽim riki naŋniḏa Yecuŋu ner eca ŋwu, " Nyiŋa linaŋnaŋa eḏi nyji ṯiŋaḏa ki yizaŋina !" Nezi Yecu eca ŋwu," Inḏiri !"

Na rigɽim riki ruḏa ki kworna ner ǝnḏi ki yizaŋna. Na yizaŋ afri ner idaḏa ki ṯujulna. Luduŋ minmin lir kaka 2,000 leḏi yizaŋ.

Mezi lizi kila liṯi eze yizaŋilu eze ŋiɽaŋal ŋerrina kaka, ner ǝfri ner ǝnḏi ki maḏinana ta ner andaci lizi ŋiɽaŋal ŋa ŋimerzi eze ŋir kaka ŋerrazi Yecu tɔk. Na lizi ila linani ki maḏinana ner eze kworu ŋgwa kweḏi rigɽimana. kunanalu cugo cugop, na kukinna yireḏi tɔk, naŋu orɔ kaka kwizi kwiti kweḏi ŋiɽaŋalna ŋere mac .

Na lizi ṯenye beṯen ner uṯici Yecuŋulu ǝḏi ele kiḏay. Ta na Yecu ǝnḏi ki falukana naŋu daɽmani nana ǝḏi ele. Na kwor ŋgwa kweṯi ǝḏi rigɽimana riki nuŋu naŋni eḏi ele Yecugi nyamin tatap.

Lakin na Yecu ecaŋu, " Beri ma, nyi kunaŋnaŋa ǝḏi ele dunu a andaci limedgalu na lizilu luŋwa leḏi dunuŋu tɔk ŋiɽaŋal ŋi tatap ŋa ŋimaŋazi Allah errici na ǝŋguru kaka eḏuŋgu ŋimɽiyana nani ŋaŋu gi."

Ŋu ṯaŋu na Kwor ele naŋu andaci lizi tatap ŋiɽaŋali ŋir kaka ŋimazi Yecu errici ŋunduŋu. Kila lere lere lima neŋne ŋiŋereŋwa ŋir kaka ṯaŋu ner liŋɽi ŋiɽaŋal ŋi ŋir ŋiliŋɽaza.

Na Yecu urla ki ezir weḏi ṯujul. Mindaŋ maŋu opaḏi kinaŋ, na ŋuduŋ ŋupa riyiḏa ezir wunaniŋu gu na ner ermici ŋunduŋu nana. Ki ŋuduŋna ŋwa ṯa na kwaw nani kwete kwuma kiraza ŋinalalu yiḏlayu yir kaka wri kuɽen. Naŋu keteci yakiima kiriiza kuŋun tatap ǝḏi gi zawi ŋunduŋu, lakin nuŋu na ŋin iralu ŋiḏamḏula.

Naŋu neŋne Yecu kuma zawi lizi tatap luuma naŋu kitaḏa naŋu ari ŋwu, " Nyi kweḏi ṯamina beṯen menyi mɔmi yireḏi ,nana dak yeḏi Yecuŋu, nyi kwinḏi ǝḏi zawini tɔk !" ta naŋu ilaḏa Yecuŋu ki ṯoɽona naŋu mumici yireḏi . Kinaŋuṯa maŋu mɔmi yireḏi na ŋin rili !

Fita fitak, na Yecu icini ŋumaŋi ŋima ruu duŋgunla . Nuŋu urlalu naŋu uṯalu ŋwu, " Aya kwiri kumominyi nana ?" Na limeḏgen eŋnici ner eca ŋwu , "Kinaŋ ṯa na lizi nani luru lirikaḏila nana lumɔmŋa ŋa nana tɔk. Na ŋa kwaḏa kuṯalu, ''Aya kwiri kumɔminyi nana ?"'

Na kwaw idaci Yecŋulu, ŋurgu ŋilu ki yena yuŋun, kunḏoḏu nana na kuṯinya beṯen. Ta naŋu andaci ŋiɽaŋal ŋi tatap ŋir kaka ŋerricaŋuzi na mindaŋ maŋu zawini. NaYecu ǝca ŋwu, " Ṯamina ṯuŋa ṯimaŋa zawi . Inḏi ŋiɽana ŋi.''

Ṯiŋereŋ ṯeḏi injiil ṯinani kiṯamna keḏi: matta 8: 28-34; 9; 20- 22; marguuz 5:1-20 ;5: 24b-34; lugga 8: 2̃6-39;8: 42b-48