43.Ṯuruuḏa Ṯeḏi Kaniiza Keḏi Kiḏlaŋu
Kinaŋu ma Yecu aɽa kilerena , na lumaḏ luŋun aɽaḏi duŋlu ki Urazaliim na kaka andicazi Yecuŋu eḏir zi erri . Na lizi liṯemini Yecuŋu aɽaḏi duŋlu taraḏi kiyiriny.
Ylḏleyuna ratap , nyamin nyir 50 ma aŋun weḏi ṯirǝrǝlu, eṯi yahuud ŋa aɽaḏi duŋ aḏamalaḏa zibira kweḏi lamin leni kamzin. Lamin leni kamzin lendir liṯir li amina mer onni ŋwana. Eṯi yahuud nḏet ila kezir nana tatap weḏi ṯurmun etir uɽamaḏa duŋlu ŋiɽaŋal ŋi ŋeḏi lamin leni kamzin. Ta na kiyiḏleyu ŋgu, na aŋun ila weḏi lamin leḏi kamzin uzbu wutuput ma Yecu ele kilerena.
Kaka aɽaḏir nḏet duŋlu kila litamini Yecuŋu, ni ŋwal ŋwaɽina kɔrun urani yiŋna kiya yinanir yi. Na duŋ laɽina igǝ ijini ŋuɽala ŋweḏi kila liṯamini Yecuŋu. Ner tatap urani Ṯigɽimana Ṯirlinalu Ter ta ner andazi riŋla rirna terter.
Ma lizi leḏi Urazaliimŋu neŋne kenyjeri, na duŋ laḏi lizi ner ila eḏi eze aḏa kwiri manuŋ kwerina. Ma lizi neŋne lizi kila liṯamini Yecuŋu lamlaḏu ŋɔḏɽor ŋir ŋilim ŋeḏi Allah, ner liŋɽi mer neŋne kandiza kandina riŋla ri reŋen.
Na lizi lwɔkɔ enyjici lumad leḏi Yecu wɔŋ nana lariŋu lurlalu. Nezi Butruz aŋnici nuŋzi ece ŋu, ''Niŋnecarnyi! lizi kilu liṯi lurlalu mac! ŋeni ŋwu ŋimirataḏi ŋeḏi ŋiɽiy ŋi ŋeḏi kwiɽi kweni Yuwiil ŋeniŋu Allah, 'kilamin lirimiḏu, kwenḏi aṯiḏiŋada Ṯigiɽimana Ṯirlinalu Ter.'''
''Lor leḏi izrayiilŋu, Yecu kwiri kwizi ŋgwa kwamlaḏu yalama yuuru beṯen na ŋiɽaŋal ŋir ŋijmit ŋuma ŋi ŋeḏi Allah, kaka ŋimzi eze ta nezi elŋe tɔk. Lakin ŋaŋa na alazi ŋunduŋu ŋuɽila ŋuɽmuḏalu!''
''Kina ma Yecu ayi, ni Allah diɽazila ŋunduŋ ŋiɽenyna. Ŋuṯa ŋwu ŋuratazi ŋiɽiya ŋari ŋu kwende kwinḏi eḏi dungaci,' kwirlinalu ter eḏi nyiŋɽi kiṯimamna.'' Nyiŋa liri zuhud lir rerem leḏi ŋiɽaŋal ŋeni Allah widiɽaza Yecuŋu kwokwony.''
''Ŋutaŋu na Yecu nanalu kiṯiila teḏi Allah kweni papa. Na Yecu ṯiŋaḏa Ṯigɽima Ṯirlinalu Ter kaka muŋu kitaḏiza ŋinḏuŋuzi eḏi zi erri. Ṯigiɽim Ṯirlinalu Ter kiḏu ṯiṯi menyji kwɔmne ŋgu kwizaŋa na kwiṯiŋa neŋne.''
''Ŋaŋa lemi alazi kwor ŋgu ŋuɽila ŋuɽmuḏalu, Yecu. Lakin ilŋiḏir eḏari ŋu ŋiri rerem ni allah ruzi Yecuŋu eḏi ŋorɔ kweleny na Mezayaŋ tɔk.''
Lizi kila liniŋnica Butruzŋu nezi ŋiɽaŋal ŋandina uḏa ŋunduŋzi.Ta ner uṯaci Butruzŋu lumad li luŋun, '' Liyangeri, aḏa kwiri kwinḏinḏi eḏi zi erri?''
Nezi Butruz aŋnici ŋunduŋzi, ''nuŋzi ecaŋu urlacar ŋikiya kiḏey na abaptizni yiriny yi yeḏi Yecu Kurztu mindaŋ ma Allah iɽnyicilu ŋikiyaŋlu ŋalu. Mindaŋ muŋu indaḏa ŋaŋuzi hidiya weḏi Ṯigɽim Ṯirlinalu Ter.''
Na lizi lir 3,000 emni kanḏiza keḏi Butruz ner orɔ lumad leḏi Yecuŋu. nerzi baptizini ner orɔ lete leḏi kaniiza keḏi Urzaliimŋu.
Na lumad leḏi Yecu eṯir niŋnaci ṯurtuna ṯeḏi yafuur, eṯir nani duŋ, eṯir eḏne duŋa na ṯir ari ki yiriny duŋ tɔk. Eṯir amina mer nii Allah duŋ eṯir kani kwɔmne kweŋen duŋ li tɔk. Eṯir upi ŋiɽaŋal ŋeŋen kiduŋalu leŋen. nyamin tatap, na lizi luuru orɔ lamina leḏi Yecuŋu.
Ṯiŋereŋ Ṯeḏi Injiil Weni Amaal Alrazuul 2