2.Ṯanḏa Ṯeḏi Ŋikiya Ki Ṯurmuna
Na Adamŋa kwawgi kuŋun nani lamina beṯen ki karṯinyna ŋga kizaw ki kiticazi Allah. Nuŋu ere kwere deŋgena kugina yireḏi mac, lakin ner ta ere ṯenye yey mac, kaka iragu ŋikiya ki ṯurmuna. Aṯir irǝrǝlu karṯinyna aṯir andazi Allahwi.
Lakin na kimǝwu nani kete karṯinyna. Nuŋu uṯici kwayulu,'' Allah weca ŋaŋuzi rerem a ṯiiḏiri nyoro nyeḏi yaɽi yinani karṯinyna mac a?''
Na kwaw aɽici kandiza ŋwu,'' Allah wecenyji ŋwu iḏiri nyoro nyeḏi yaɽi karṯinyna tatap lakin ere aye nyoro nyeḏi kwaɽi kweḏi ṯilŋiḏina ṯeḏi ŋa ŋizaw na ŋiki mac. Allah wecenyji ŋwu,' Ma ye nyoro nyuŋun ya mazi mumi nana, a ta ay.'''
Na kimǝw ǝɽica kwayo kandiza nuŋu eca ŋwu, '' Ŋiti ŋəḏi yeyna mac! ŋaŋa liti lay mac. Allah wilŋiḏi eḏi ari ŋwu ma ye, a orɔ kaka Allah ezi leŋe ŋa ŋizaw na ŋiki kaka ŋunduŋu.''
Na kwaw eze toru teḏi kwaɽi tizaw ki yeyna nuŋu izini tami tɔk. Kaka naŋnaŋgu eḏi ǝḏi yeyna tɔk, ŋwuṯaŋu nuŋu aki toru teḏi kwaɽi nuŋu ye. Na nuŋu inḏeḏa kwulen, kwunanirgi, nuŋu ye, ŋundu tɔk.
Kwɔkwɔŋu, na yey yeŋen kiṯini, ner icini liri ŋubundoṯ. Ner ṯecini eḏi kuɽbaḏa yaŋnalu yeŋen yǝniiyi yeḏi yaɽi nerzi ukiɽina eḏizi ruzi yireḏ.
Ta na kworŋa kwawgi kwuŋun neŋne kilya keḏi Allah winḏu karṯinyna. Ner lucini nden tɔk ki yeyna yeḏi Allah. Na Allah urniṯi kworu,'' Ŋa ŋgwa taka? na Aḏam ǝɽici kandiza,'' Nyimiŋa niŋnaci kwindu karṯinyna, ta ninyi ṯenye, ninyi lucini. Kaka roḏinyi lubundoṯ.
Ta na Allah uṯolu,'' Ǝya kwiri kwecaŋa ŋa kwiri lubunḏoṯ? Ŋa kuma ye kwaɽi ŋgwa kwecaŋagi ŋwu tiḏu mac a?'' Na kwor əɽici kandiza, '' Ŋa kwiri kwinḏeḏiny kwayo ŋgu, na nuŋu inḏeḏa nyiŋu toru teḏi kwaɽi,'' Ta na Allah uṯici kwayolu,'' Ada kwiri kuma ǝrri?'' Ta na kwaw ǝɽica kandiza,'' Nuŋu ari ŋwu kimǝw kiri kiminy kiɽǝnyjilu.''
Na Allah eca kimǝwa ŋwu,'' A guta bureni! ŋa kwele karigilu ki ureyilu na a ye ureyiŋi. Ŋaŋa kwawgi orɔ ṯuwǝn , na kwele kuŋa kwelegi kweḏi kwaw, erta əḏi ŋudrna deŋgena tɔk. A ŋa kwele kweḏi kwaw kurɔm ndana, na ŋa ye ŋunduŋuzi ŋwarana.''
Ta na Allah eca kwayo ŋwu,''Nyi kweŋ kitici ŋijma ŋirara beṯen ki ŋelŋena ŋuŋa. Na ata ǝḏi zurumana kweḏi kwor kuŋa, a kwor ǝḏi zulṯa duŋguŋala.''
Na Allah eca kworu ŋwu,''Kaka magu niŋnaci kwayo ŋiɽaŋali nere eḏi neŋne ŋiɽaŋali ŋinyi mac. Krekrem eḏi ureyi bureni, na ŋa aki ŋɔḏɽɔr ŋuru beṯen eḏi agi eḏneya ŋuroŋ. Mindaŋ a ta ay,a aŋna wuŋa aɽiḏa ki ureyina.'' Na Allah eca kwayo ŋwu Hawa, ŋǝni ŋwu '' kwelŋe kweḏi_ŋimiḏa,'' kaka inḏiŋgu eḏi orɔ aya kweḏi lizi tatap. Ta na Allah kinini Aḏamŋuzi Hawagi yireḏi yeḏi yirna yeḏi ŋirel.
Ta na Allah ari ŋwu,'' Krekrem kwizigwunaŋ kuma orɔ kaka ṯa nyiŋuzi ŋilŋiḏiŋuzi ŋa ŋizaw na ŋiki tɔk, liti lǝḏi ŋuma eḏi ye nyoru nyeḏi kwaɽi kweḏi ŋimiḏa eḏi miḏi ṯuɽok mac.'' Ta nuŋu ruti Adamŋuzi Hawagi karṯinyna ŋga kizaw beṯen. Na Allah kete limleka lǝḏi ŋuma ŋupa kǝgur weḏi karṯiny eḏi ṯinyini kwere nyiḏak eḏi ere ye nyoro nyeḏi kwaɽi kweḏi ŋimiḏa mac.
Ṯiŋereŋ Ṯeḏi Kiṯam Kirlinalu Ter: Kəni Ṯikita 3