18. Ŋeleny ŋa ŋuɽǝnana
Mindaŋ ma yiḏlǝ yuru ṯamḏu ta, na Dauḏ ay, ta na tor tuŋun tǝni Zalmuun orɔ kweleny kweḏi Izrayiilŋu. ta na Allah andaci Zalmuunŋu na nuŋu uṯicalu kwɔmne gi kunaŋnaŋu beṯen. Mindaŋ ma Zalmuun naŋnaḏa ṯǝḏina yeyena, ta na Allah nyeŋllena beṯen ta nuŋu ruzi kwor kwǝḏi yeyena ki lizila leḏi ṯurmuna tatap. Ta na Zalmuun leŋe kwɔmne kuru ta nuŋu orɔ kweleny kwǝḏi yeyena tɔk. na Allah ruzi kwurṯo beṯen.
Ki Urzalimna, na Zalmuun awci daŋga ŋgwa kwikitaḏigi Dauḏ kwir ṯernyin eḏi awci nuŋu aɽazi kwɔmne duŋ. Eṯi lizi kwɔce Allahlu na eṯir ketece kirama ki daŋgana ner ere kiktizi ki kemana keḏi ṯaɽiḏa duŋ mac. Na Allah ila nuŋu nani ki daŋgana, na eṯuŋu ummi ki lizina luŋun.
Lakin na Zalmuun amɽi law leḏi baleḏ kwir ter. nuŋu ere iɽi Allah na mac ṯaagaḏi ṯedi̱ law luru lir kaka 1,000 tatap! na law litazir deŋgenna lenḏi nyen lir baleḏa na terter ner ila yallah yi yeŋen na eṯirzi ta kwɔce lu. Mindaŋ Zalmuun upoŋe beṯen ta nuŋu kwɔce yallah lu yeŋen tɔk.
Na Allah ǝḏi ŋarrinyna beṯen nanigu Zalmuun. eḏi inḏeḏa Zalmuunŋu jiiza kaka iti irluŋgu ṯugwɔrlu mac, nuŋu kitaḏa eḏi uɽǝḏa lizi na leḏi Izrayiil eḏi orɔ ŋelenyna ŋiɽen ma Zalmuun ay.
Mindaŋ ma Zalmuun ay, na tor tuŋun tǝni, Rahubaam orɔ kweleny. Na Rahubaam orɔ kwor kwuḏykii beṯen. Na lizi aɽaḏa duŋ eḏizi ṯimaci ŋunduŋu korɔ kaka kweleny. Ner urtinina ŋiɽaŋalŋi ŋitazir nani gu Rahubaam, ner eca ŋwu Zalmuun kubyina ŋunduŋuzi ṯurfa nuŋu akini ŋunduŋuzi ŋɔḏɽɔr ŋirara beṯen na eṯiŋuzi kitini ṯulba ṯuru tɔk.
Na Rahumaam ŋiḏiyaŋi kii ǝɽici ŋunduŋuzi kandiza nuŋuzi eca ŋwu, ''Ŋaŋa laru ŋwu ŋaɽinyna Zalmuun kwir ṯernyeri kwinḏeḏaŋazi ŋɔdɽɔr ŋifili, lakin nyi kuŋazi duŋgwaci eḏi aki ŋɔḏɽor ŋirara ṯeṯec ki ŋɔḏɽɔrla ŋǝrricaŋuzi ŋaŋuzi, na ŋezi biini ṯurfa beṯen ŋirŋazaŋi eḏi ŋundu la.''
Na yabila wri yeḏi lizi leḏi Izrayiil iṯanici Rahubaamŋu na, na yabila ṯa yiɽen dak əɽini rugwɔr ri reŋen minmin nani gu Rahubaam. na yabila kiyu yiɽen orɔ ŋeleny ŋeḏi Yauḏiyaŋu.
Na yabila wri yiḏaḏu yeḏi lizi leḏi Izrayiil kiya yima iṯanici Rahubaamŋu na ner eca kworuna kwete kweni Yurubaam eḏi orɔ kweleny kweŋen. Ner kete ŋelenyi ŋeŋen ki ureyla wunani ndali la ta nerzi eca Ŋeleny ŋeḏi Izrayiil.
Na Yurbuaam iṯanici Allahna ta nuŋu duŋgwaci lizi ner ərri ŋikiyaŋi. Nuŋu əwcici lizi luŋun libayiila nden eḏizi kwɔcelu kilubi leḏili kwɔce Allahlu ki daŋgana ki ŋelenyna ŋeḏi Yauḏiyaŋu.
Na ŋeleny ŋeḏi Yauḏiyaŋa Izrayiilgi ruḏaḏzi ṯuwən na eṯir ṯugḏaḏzina wuɽewuɽeny ki nyamin nyɔko.
Ki ŋelenyna ŋeḏi Izrayiil ŋiyaŋ, na leleny orɔ ludur tatap. luru ki lelenyna klu nezi lizi liḏaḏu leḏi Izrayiil eɽnye kla linaŋna eḏi orɔ leleny ki yezir yeŋen.
Na leleny tatap na lizi ladaḏi keṯɔk eḏi ṯimaḏi kwɔrɔ ki ŋelenyna ŋeḏi Izrayiil ner kwɔce libayiilalu. Na ṯukuca lu ṯeŋen ṯeḏi libayiil əḏi ŋijinna na mindaŋ na nyamin nyokɔ ṯir kete kwelle kirama.
Na leleny leḏi Yauḏiyaŋu orɔ lugurnǝ leḏi Dauḏŋa. Na lokwɔ ki lelenyna klu ner orɔ lor lizaw leṯi kete ŋelenyi ŋirlalu na eṯir kwɔce Allah lu. lakin litazir ki lelenyna leḏi Yauḏiyaŋu ner orɔ ludur na lǝḏi ŋidinyi ki rugwɔrna, na leṯi kwɔkce libayilalu. Na leleny lokwɔ eṯir ketece yalla yir ŋǝluŋ kwelle kweŋen kirama. Na lizi luru deŋgenna leḏi Yauḏiyaŋu tok iṯinci Allahna ta ner kwɔce yallah lu yiḏaḏu tɔk .
Ṯiŋereŋ ṯeḏi kiṯam kirlinalu ter kǝni muluuk kwiŋna 1-6; 11-12