28. Ŋiɽaŋal Ŋeḏi Kamal Kir Kurṯu

Lamin lete, na kamal ila nanigu Yecu kir kurṯu, nuŋu eca ŋwu, "Lefendi kwizaw, aḏa kwenyi erri mindaŋ manyi ǝḏi ŋimiḏana ŋinḏi eḏi naniḏa dok?'' Na Yecu aŋnici nuŋu eca ŋwu, '' Ŋa kwaḏa kwecanyi ,kufḏana'? kaka iti nanigu kwizi kwere kufḏana mac, na Allah orɔ kutuput kufḏana. Lakin ma naŋni eḏi ǝḏi ŋimiḏana ŋiṯi naniḏalu dok, imiḏica Allah kruu kuŋun.''

''Nuŋu uṯici Yecuŋulu nuŋu eca ŋwu,'' Kruu kender kendu kinaŋnanyi eḏi nyi inyizi nana? Na ŋwuzi eca ŋwu. Na zi Yecu aɽi,'' Eti ̱ere ɽenye mac, eṯi ere erri ŋijina mac, eṯi ere nyimi mac, eṯi ere orɔ koluŋ mac, eṯi iɽi ṯarnyalŋazina lanyalu gi, eṯizi amɽi kila leḏi yenilu yalu kaka eṯi amɽi rɔgɽɔ ralu.''

Lakin na kamal ari ŋwu, ''Nyi kuma inyici kruu nana ŋgu tatap kinaŋu ruḏinyi gu kinna tor tɔkuɽeny. Na aḏa kwiri kwinyi iraci eḏi ǝdi ŋimiḏana ŋiṯi naniḏa dɔk?'' Na Yecu eze ŋunduŋu nuŋu amɽi beṯen.

Na Yecu aŋnici nuŋu eca ŋwu,''Ma naŋni eḏi orɔ kwizi kwir minmin inḏu a liṯa komne tatap koḏiŋa a kanaci luwaya ŋeni kiriiza, ta ŋa kweḏi ṯawana ṯuŋa ki lerena. Ta a ma ila nyi kwaḏiḏa.''

Ma kamal neŋne ŋiɽaŋali ŋir kaka ŋimzi Yecu andaci, na ṯogɔr iyena beṯen, kaka ruḏuŋgu kurṯu nuŋu ere amɽi eḏi inḏaḏa luwaya komne kwoḏiŋu mac. Na kamal urli ŋudɔŋ nuŋu ele kiṯay ki ezir wa winañ wi Yecu.

Ta na Yecu eca limeḏgen ŋwu,'' Ŋifirli beṯen eḏi lizi lir lurṯu eḏi ǝndi ŋelenyna ŋeḏi Allah! Awu, na ŋiṯi orɔlu weṯ eḏi kamla eḏi anḏi ley li leḏi libri ta ner ferle beṯen eḏi kwizi kwiri kurṯu eḏi ǝnḏi ŋelenyana ŋeḏi Allah.''

Mindaŋ mezi limeḏgen neŋne ŋa ŋimazi Yecu andazi, ner liŋɽi ner ari ŋwu,'' Ǝya kwiri kwinḏi eḏi kilǝḏini?''

Na Yecu eze limeḏgen nuŋu ari ŋwu,'' Ŋiṯi ŋufḏana ŋwu ki yeyna yeḏi lizigwunaŋ mac, lakin eḏi Allahna, komne tatap a ṯaŋu orɔ lu weṯ.''

Na Buṯruuz eca Yecuŋu,'' Nyiŋa lima ṯaza komnelu tatap kweḏinyi eḏinyi kwaḏiḏa ŋaŋu. Na ujra weri winḏi eḏi orɔ aḏa?''

Nazi Yecu aŋnici nuŋuzi eca ŋwu, ''kwere kuma ṯaza dunuŋlu kuŋun, ya enŋgenlu kwir toŋɔr, kwiri tira, ṯernyin, lenyin, kwele, ya komnelu kwǝḏiŋu eḏi kwaḏiḏa nyiŋulu, kwinḏi eḏi ǝḏini nyamina 100 na nyɔkɔ nyiṯmḏilu na tɔk kwinḏi eḏi afi ŋimiḏa ŋiṯi naniḏa dɔk. Na kila liŋna linḏi eḏi aɽiḏa kwaḏan, na luru linani kwaḏan linḏi eḏi orɔ ŋuɽa.''

Ṯiŋeroŋ ṯeḏi injiil ṯinani kiṯam na keni: Maṯṯa 19:16-30; Marguz 10:17-31; Luuga18:18-30