19.Liɽi
Ki ŋiŋeroŋna tatap ŋeḏi Izrayiil nazi Allah uzica liɽiya. eṯi liɽi niŋna ŋiɽaŋali ta eṯir andaci lizi ŋiɽaŋali ŋeḏi Allah.
Iliya kwiri kuɽi kinaŋ roḏigu Ahaab kweleny ki ŋelenyna ŋeḏi Izrayiil. Ahaab kwir kwor kwir kwudur eṯiŋu eca lizi eḏi kwɔce allah lu weḏi ŋǝluŋ wǝni Baal. Na Iliya eca Ahaabŋu, "kaw kiti kinḏi eḏi anni ya eḏi ŋwuju nani ki ŋelenyna ŋeḏi Izrayiil mindaŋ nyi ari ŋwu eḏir orɔ. '' Ner ǝḏini ŋwu Ahaabŋu ŋarinyna beṯen.
Na Allah eca Iliyaŋu diɽi ele kumbuŋna ki wuḏerna a lucini na Ahaab ŋgwa kunaŋna eḏi eɽenye ŋunduŋu. Nyamin tatap ŋworpana na kirakalu eti ndaw ǝfica yafaŋi na yiiḏi tɔk. Na Ahaabŋa urṯayi wuŋun ece Iliyaŋu lu, lakin ner ere inḏa mac. Ta na kijaŋ ferle ŋiɽaŋali beṯen ta na kumbuŋ ŋga unḏina.
Ŋwuṯaŋu na Iliya ele ki baled na kweḏi yeni lu. Na kwaw kwayi kworu na tor tuŋun tir tɔŋor ki baled na ŋgwa ǝḏi eḏneya wɔkuɽoc wadaḏi eḏi ernene kaka irra gu kaw ŋga kima afa yaŋwu. Lakin ner aŋraci Iliyaŋu, na nezi Allah inḏeḏa ta na tɔnyo teḏi yiilǝ na kuuza kweḏi ŋila ŋeŋen ere unḏaḏina mac. Ner ǝḏi eḏneya yiḏleyu kiya tatap yeḏi yaŋu. Na Iliya nani kinaŋ yiḏleyu yokɔ.
Mindaŋ ma yiḏlǝ toɽɔl na yǝwǝ nyirlil ṯamḏu ta, na Allah andaci Iliyaŋu eḏi aɽiḏa ki ŋelenyna ŋeḏi Izrayiil eḏi andaci Ahaabŋu kaka inḏuŋ gu eḏi uza kaawa kwokwony. Mindaŋ ma Ahaab eze Iliyaŋu nuŋu ari ŋwu, "Ŋa ŋgwa kinaŋ, ŋa kwiri kwiṯizi ǝrri ŋiki!'' Na Iliya ǝɽici ŋunduŋu kandiza, ''Ŋa kwiri kwir kwiṯizi ǝrri ŋiki tatap! Ŋa kuma duŋgaci Yahwehŋu, kwir Allah wir rerem, na kwɔce Baal lu. mulḏa lizi leḏi ŋeleny ŋeḏi Izrayiil ndeṯ a li ila ki ayinla weḏi Karmalŋu.
Na lizi tatap leḏi ŋeleny ŋeḏi Izrayiil, na liɽi 450 leḏi Baal ner ila ki ayinla weḏi karmalŋu. Na Iliya eca lizi ŋwu, ''Ŋaŋa linḏi eḏi nani yiḏlǝyu ḏa lurlana ŋaɽinyla? Ma Yahweh orɔ Allah ta, akicari ŋɔḏɽor! Ma Baal orɔ Allah ta, akicari ŋɔḏɽor!
Ta na Iliya eca liɽiya leḏi baal ŋwu, " Iɽinyiḏir ŋiḏiri a kete kirama, lakin a ere uṯǝḏa igǝŋi mac. Ŋenji ṯa ǝrri kaka ṯaŋwu. Allah wa winḏi eḏi neŋne maŋu ṯiŋaḏa igǝŋi wenḏerṯa wiri Allah wir rerem." Ŋwuṯaŋu na lijauḏ leḏi Baal kete kwɔmne lu biɽeṯ kweḏi kirama lakin ner ere uṯǝḏa igǝŋi mac.
Ta na liɽi leḏi Baal ariḏa Baalŋu kiyiriny, ''Niŋnacanji, Baal!" ner ari kiyiriny laminu tatap ner ari kula mindaŋ ner undu yaŋna yeŋen nana yedǝŋyi, lakin na ṯǝŋnic̱a ere ṯere mac.
Ma lamin ele eḏi ernene, na Iliya ketece Allah kwɔmne lu kweḏi kirama. Ta nuŋu eca lizi eḏi balci nyibɽaŋi wrikuɽen nyupa nyeḏi ŋaw kirama la mindaŋ a yiiḏi, mindaŋ nyuɽi tɔk, na urey wa wirkaḏi ezir lu weḏi ṯuduna eḏi iglilu ndeṯ.
Ta na Iliya ari ki yiriny, "Yaweh, Allah weḏi Abrahim, Izhaag, na Yaguub, niŋnacanji aŋunu ŋgwu ŋa kwiri Allah weḏi Izrayiil na nyi kwiri kaḏama kuŋa. Ǝŋnicanji mindaŋ ma lizi klu elŋe eḏi ari ŋwu ŋa kwiri Allah wir rerem.''
Kinaŋuṯa lu, na iga oɽa kilere ta nuŋu dunazi yiiḏi, ŋuɽi na ŋwiɽi, korgɔṯ mindaŋ na ŋaw ŋa ŋirikaḏi ezir lu weḏi ŋwǝḏugun. Mindaŋ mezi lizi eze ŋwu ner idǝḏalu ŋurguŋi ki ureylu ner ariuŋ, "Yaweh kwiri Allah! Yaweh kwiri Allah!"
Ta na Iliya ari ŋwu, "Eṯi duŋgwacar kuɽiya kwere kweḏi Baal eḏi afri mac!" Ŋwutaŋu na lizi miḏa liɽiya tatap leḏi Baal nerzi dimi ki tay kinaŋ na nerzi eɽenye.
Ta na Iliya eca kwelenyi kweni Ahaab ŋwu, "Aɽu fitak ki maḏinana, na kaw ŋga kinḏi eḏi ila." kwɔkwɔŋṯa na lere uŋni yeyena ta na kaw duni kuru. Na Yaweh iri kɽaŋi kiṯay nuŋu ǝŋaci lizi ŋundu kwiri kwir Allah wir rerem.
Mindaŋ ma ŋumor ŋweḏi Iliya ṯamḏu, na Allah ece kwuruna kwete kweni Iliza eḏi orɔ kuɽi kuŋun. Na Allah ǝrri ŋiliŋɽaza ŋuru Ilisha gi na ŋiliŋɽaza ŋete ŋǝrrinca Nummanŋu kwir nda leḏi ṯuwǝn, ŋgwa kweḏi kimǝṯ keḏi kirna nuŋu neŋne Ilishaŋgi ta nuŋu ele nanigu nuŋu uṯici Ilishaŋu lu eḏi zawi ŋunduŋu. Na Ilisha eca Numman ŋu eḏi uɽi nyaminu dufakwuɽeny ŋawna ŋeḏi kufirṯa keḏi Orḏunŋu.
Krreny na Numman ke ṯogwɔrna nuŋu derne eḏizi ǝrri kaka izaŋzi ŋir ŋeɽer. Lakin nuŋu urlǝ ŋaɽinyna ta nuŋu uɽazi aŋna wuŋun nyaminna dufakwuɽeny ki ŋawna ŋeḏi kufirṯa keḏi Orḏunŋu. Mindaŋ muŋu aliḏalu ki tamin teŋgi ṯimaḏi kworɔ ta na kimaḏ keḏi kirna kwuŋun zawini kiṯay! Na Allah zawi ŋunduŋu.
Allah uza liɽiya liḏaḏu luru. Tatap ner andaci lizi eḏi irli ṯokwucalu ṯeḏi libayiil lidaɽimina rii ri na er ǝŋaci lizi ŋirlalu na ŋimɽiya tɔk. Na liɽi woraci lizi mer ere duŋgwaci ṯǝrrǝ ṯeḏi ŋiɽaŋal ŋiki eḏi kwɔce Allah lu, ta Allah winḏi eḏi hakumi ŋunduŋuzi kaka kla litizi ǝrri ŋiki, na ŋuzi inḏeḏa jiza tɔk.
Nyamin nyuru, nyiti nyimnyi lizi iɽi Allahna mac. Ta eṯir ǝwɽi liɽiyaŋi yeyelu nyamin tatap na nyamin nyokɔ eṯir zi eɽenye. Lamin lete ner kete kuɽi ya kweni Irmiya ki ṯilna ṯunḏuna ner ṯazalu eḏi ay. Nuŋu oɽi ki kulu na lac, ki ṯogwɔrna ṯeḏi ṯil, lakin na kweleny ǝḏi ŋimiɽiya nanuŋgu na nuŋu alica yaḏama yuŋun wamra eḏi ala Irmiyaŋu ki ṯilna mindaŋ maŋu ere ay mac.
Ta eṯita liɽi ilaḏa kereny eṯir andazi ŋiɽaŋali ŋeḏi Allah kinna kaka firazazi lizi. Ner woraci lizi, Allah winḏi eḏi kirazi ŋunduŋuzi lu ma ere urlǝ rogwɔrlu mac. Eṯir tɔk ṯiŋeni lizi ṯikitada ṯi ṯaruŋu, Mazaya kweḏi Allah kwinḏi eḏi ila.
Ṯiŋereŋ ṯeḏi kiṯam kirlinalu ter keni muluuk kwiŋna 16-18;muluuk aṯaani 5; irmiya 38