23. Ŋelŋe Ŋeḏi Yecu
Na kwor kwirlalu kweni Yuuzif kukamṯa Maryamŋu. Maŋu neŋne Maryam kume eḏe, ta naŋu elŋece rac aḏariŋu tor tuŋun titi tri mac. Naŋu ere naŋni eḏi ruweci Maryamŋu ŋiɽaŋalu mac, Ta naŋu kitaḏa eḏi duŋgweci nyetec. Lakin iti eraŋwezi ŋere kinna mac na maleyka ila naŋu andaci ki ṯiŋliṯna.
Ta na maleyka eca ŋwu,''Yuuzif, eṯi ṯinya mac eḏi afi Maryamŋu kaka kwaw kuŋa. Na tor tizaŋu tri teḏi Ṯigɽim Ṯirlinalu Ter. kwindi eḏi eḏi ṯelŋe toŋɔra. Enyjici yiriny eca ŋwu Yecu ( ŋeni ŋwu, 'Yawey kweṯi kileḏi ), kaka inḏiŋu gu eḏi kileḏi lizi ki ŋikiyaŋna ŋeŋen.''
Taŋu na Yuuzif agi Maryamŋw nuŋgi ele dunu kaka kwaw kuŋun, Lakin ner ere oɽmaṯi mac mindaŋ naŋu elŋe.
Mindaŋ ma aŋun adaḏi keṯɔk weḏi yi elŋe, ta na ṯurum kiḏa ṯupa ṯeḏi Ruman nuŋu ala amura eḏi lizi aɽi kimaḏina na kweḏi lugurnana leŋen eḏi lɔḏini yiriny yeŋen. Ta na Maryam ŋa Yuuzifgi diɽi edele kilya kwoluna ki ezir wu nanir yi Nazra eḏi ele Bethilyam kaka eni gu Bethilyam maḏina kwir dunu kweḏi kugurna kweŋen kweni Dauḏ.
Mindaŋ mer miḏaḏi Bethilyam, ner ere inḏa ezir mac weḏi yi nanina. Na yiŋna dak yindarzi ner ta orɔ ezir weṯi yi ŋirel nanina. Na tor elŋeḏne ṯa kinaŋ na lenyin inḏirelu ki luḏuna leṯi li ŋirel eḏne na, kaka irargu kwaŋgiraŋ. Ner enyjici yiriny ner eca Yecu.
Ki kulŋana ṯa ŋga, na nyaɽa nani nyokɔ ki ezir wa kworɔ keṯɔk nyikarnaḏu yaŋali yeŋen. Kokɔ milak nezi maleyka kwari nana kamkam ruwenicelu, Ta ner unḏoḏi. Nezi maleyka ecaŋu, ''Eṯi ṯinyari mac, kaka menyi gu afica ŋaŋuzi kandiza kizaw. Mezaya, kwir kweleny, kumer elŋe ki Bethilyamna!''
'' Inḏir ma ica toru, tukuɽubana yiret yi ṯinḏiralu kiluḏuna leḏi eḏne. '' Kokɔ milak, na ŋwere ureni limaleykali liɽaza Allah, lariŋu, '' Ŋiniṯ ŋeḏi Allah ŋiṯi nani kindala kider eṯi ŋiɽana nani kuṯalu ki lizina leṯuŋuzi amɽi!''
Ki aŋun wa ṯa na nyaɽa upaḏi fitak ki ezir wunani wi Yecu na nire inḏa kwindiralu kiluḏuna leḏi eḏne, kaka ṯa andicazi maleyka. Ner nyeŋlena beṯen. Ta na nyaɽa aɽi ki ezir weḏi yaŋal yeŋen, ortaḏi Allah komne gi tatap kumir neŋne na kumir eze tɔk.
Ki nyamin na nyokɔ nyikwaḏaḏi, na lor leḏi yeyna ki ŋwilina ŋwa ŋolona tuk uḏeri ŋgi. Iza ṯorumi ṯiti ṯiri kaka rorum ndeṯ kilerena mac. Ner elŋe ŋeniŋu, kweleny kwiyaŋ kweḏi Yahuuḏ kumir elŋe. Ṯaŋu ner ila ki ezir woluna tuk eḏi eze kwelenyi ŋgu. Ner upaḏa Bethilyam ner inḏa yiŋna kiya yinani yi Yecu na ṯernyin ṯi na lenyin tɔk.
Mindaŋ ma lor laḏi yeyna eze Yecuŋu lenyin gi, ner kwecelu ŋurgo ŋi. Ner inḏaḏa Yecuŋu komne kwir ghali. Kwir haḏiya mindaŋ ner orle dunu.
Ṯiŋereŋ teḏi kiṯam kirlinalu ter keḏi: matta 1; lugga 2 ̂