50.Yecu Maŋu Aɽa
Ki yiḏlǝna, yimorɔ 2,000 na lizi luru ṯurmuna nana tatap nani liniŋna ŋiɽaŋli ŋizaw ŋeḏi Yecu kweni Mazaya. Na kanizza upeŋe nuŋu orena. Na Yecu kitaḏa eḏi aɽa ma ṯurmun ernene. Ta maŋuṯa ere aɽa kinna krekrem mac, nata ṯikitaḏiza ṯuŋun nani.
Kaka nanirgu lakica Yecuŋu kizen, Allah wunaŋnanyji eḏi nani ki tayla ṯirlinalu ter na kiḏa ṯeṯi iɽii ŋunduŋuna. Nuŋu naŋni nyiŋuzi tɔk eḏizi andaci kila liḏaḏu eḏi eliŋe ŋelenyi ŋuŋun. Kinaŋ nanigu Yecu ki ureylu nuŋu ari ŋwu,'' Limǝḏgǝri lele ezir nana tatap ki ṯurmuna er andaci lizi ŋiɽaŋali ŋeḏi ŋeleny ŋeḏi Allah, ta ama ṯurmun ṯigiɽmiḏa ila.
Lizi ŋuduŋna luru linanu ki ṯurmuna liti kinna li niŋna ŋiɽaŋali ŋeḏi Yecu mac. Kwiti kinna kumele ki lerena mac, na Yecu andaci likurztiyan ruwazi ŋiɽaŋalilu ŋizaw ki lizina kila liṯi limineŋne mac. Nuŋuzi eca ŋwu,'' Iniri a kete limaḏi ki lizina lir ŋuduŋ ter ter tatap!'' na,'' Ŋwan ŋweḏi ṯuruny ŋwuma naŋni eḏi onnini.
Na Yecu ari ŋwu tɔk,''Kaḏama kende keṯi upeŋe ki ŋgwala kweṯi akini ŋunduŋu ŋoḏɽɔr mac. Kaka ṯa magu zulṯa kweḏi ṯurmun kiḏu wǝzi nyiŋu. Liŋzi ta rəri nana na erŋazi ɽenye ki ŋiɽaŋala ŋinyi. Ŋaŋa lindi eḏi inḏa ṯurfa ki ṯurmuna rac ta, firliri teter kaka manyigu ilazi zitana kii, ŋgwa kwir kweleny kweḏi ṯurmun kiḏu. Ma orɔ lete lirlalu nani nyi mindaŋ ma ṯurmun ernene, ta eŋuzi ta Allah kilǝdini!''
Na Yecu andaci limeḏgen ṯiŋerɔŋa aḏizi ruwacilu ŋa ŋinḏi eḏi errini ma ṯurmun ernene. Nuŋu ari ŋwu,''Kwor kunani kwete kuguḏi ŋula ŋuzaw ki tu̱runyna ṯuŋun. Maŋu inḏiri kilkǝlu, na ṯuwǝn ele ner kwɔce tɔmola ki ŋulana ŋuzaw tatap. Ta naŋu ele kiḏey.''
''Mindaŋ ma ŋwan ruwa kirda, na yaḏama yeḏi kwor ari ŋwu,'' Limba, ŋa kuguḏi ŋula ŋwizaw ki ṯurunyna. Ta tomɔl taḏa tima nani deŋgena?' Na limba eɽici kanḏiza, ' Ṯuwǝn ṯorɔ ṯimazi ṯikiḏu.'''
'' Na yaḏama eɽica limba leŋen kandiza, 'A nyi ele nyaliḏa tomɔlalu a?'' Na limba ari ŋwu, 'bǝri, mezi erri ŋwu, ŋaŋa laliḏa ŋwanalu ŋwɔko tɔk. Irliri mindaŋ a lumor ila leḏi ṯonna ta ama aɽazi nyɔmola duŋ ki ŋurom ŋudunaḏi, lakin ŋwan ŋwa ŋwizaw ezi firṯaḏa ki tuluŋna tinyi.'''
Ta na limeḏgen ner ere leŋe ŋiɽaŋali ŋeḏi ṯiŋeroŋ mac. Ner uṯici Yecuŋulu eḏizi ruwaci ŋunduŋuzilu ŋiɽaŋal ŋeḏi tiŋêrɔŋ. Na Yecu ari ŋwu,'' Kwor ŋgwa kuguḏu ŋula ŋwizaw kworɔ ki lubi leḏi Mazaya. Na ṯuruny nani ki lubi leḏi ṯurmun, na ŋula ŋwizaw ǝni lizi kila linanu ki ŋelenyna ŋeḏi Allah.''
'' Ta na tɔmol ǝni lizi kila leḏi ŋgwa kwir kudur. Na ṯuwǝn kiḏa ṯikuḏu tɔmola nuŋu ǝni ŋgwa kwir kudur. Na ṯonna ǝni ṯurmun kinaŋ maŋu ernene, na kila leṯi onni ner əni limaleyka leḏi Allah.''
'' Ma ṯurmun ernene ta, a limaleyka aɽazi lizi leḏi ŋgwa kwir kudur erzi kaṯu ki igǝna, ki ezir winḏirwi eḏi ari kola na erye yiŋaḏna ki ṯurfana ṯirara beṯen. Na kila lirlalu er erṯelu kaka aŋun ki ŋelenyna ŋeḏi Allah kwir papa kweŋen.''
Na Yecu ari tɔk ŋwu kwinḏi eḏi aɽa ki ureyilu ma ṯurmun ere ernene kina mac. Ŋwaɽa kaka kinaŋu maŋu ele, er ta orɔ ŋwu, ŋuṯa aɽa aŋna yi weḏi kwizigunaŋ lebleṯli ki lere. Ma Yecu aɽa, a lukruztiyan tatap eri diɽǝ kila lima ay ki ŋiɽenyna er biɽṯa ŋundugi ki lerey.
Ma lukruztiyan kila linani limiḏu er diɽi ki lere er kadriḏi lukruztiyan li kila lidiɽu ki ŋiɽenyna. Er nani tatap Yecuŋali. Ŋwuṯaŋu a Yecu nani lizili luŋun ki ŋiɽǝnana ŋi, na ki ṯuɽmaṯana nyaminu dɔk.
Na Yecu kitaḏa eḏi inḏaḏa kwere nyiḏak kwǝmini ŋunduŋu taŋgiŋi. er nani ŋimiḏana na ŋelenya Allahwi ki ŋiɽǝnana ŋi nyaminu dɔk.
Lakin Allah windi ŋuhakumi kwere nyiḏak kwiti kwǝmina Yecuŋu mac. Ŋukaṯu ŋunduŋuzi ki igǝna, wǝni jahanam, ki ezir winḏirwi eḏi ari kula na er ye yiŋaḏna ki ṯurfana ṯeṯi naniḏa ṯuɽok. Igǝ wa witi weṯi ay mac kwindi aḏi dunni ŋunduŋazi nyaminu tatap eta lɔndɔ ŋuye ŋunduŋazi liṯi lirlalu mac.
Mindaŋ ma Yecu aɽa, kwinḏi eḏi kurmazi ziṯanalu kiṯay ŋelenyŋi ŋuŋun. Ŋukaṯu ziṯana ki igǝna ŋudunaḏi nyaminu ṯuɽok, lizili kila lima ǝmini eḏi kwaḏiḏa ŋunduŋu dirnadirgu eḏi iɽii Allah na.
Kaka ṯa ma Adamŋa Hawagi ere iɽii Allah na mac ner ǝnyja ŋikiyaŋi ki ṯurmuna, Na Allah burazi na nuŋu kitaḏa eḏi kurmezilu. Lakin ma nyamin ṯamḏu nyokɔ na Allah kete lereya liyaŋ na urey wiyaŋ wa winḏi eḏi orɔ minmin.
A Yecuŋa lizili luŋun lindi eḏi nani ki ureyina wiyaŋ, na ŋwa orɔ kweleny nyaminu ṯuɽok ki kwɔmnela- tatap ŋgwa kunanu. Ŋuzi firṯaḏa ŋwal ki yeyna tatap kiḏay a ṯurfa ere kiḏay tɔk, ṯijiɽmina, ŋwal, ŋikiya, ṯrara ṯeḏi yaŋna, na ŋiɽeny. A Yecu orɔ kweleny ki ŋelenyna ŋuŋun ŋiɽǝna ŋi na ŋirlalu ŋi, na er nani lizili luŋun nyaminu tuɽok.
Ṯiŋerɔŋ Ṯeḏi Kiṯam: kǝni Maṯṯa 24:14; 28:18; Yuhana15:20; 16:33; Ruuya 2:10; Matta 13:24-30, 36-42; 1Ṯazaluniiki 4:13, 5:11; Yaguub 1:12; Matta 22:13; Ruuya 20:10, 21:1,22:21