17. Ṯikitaḏiza Ṯeḏi Allahŋa Ḏauḏgi
Na Zawul orɔ kweleny kweḏi Izrayiilŋu kwiŋna. kwir kuzi kwete kwulala na kwizawi ŋoru tɔk, kaka ṯa naŋnagu lizi na. Na zawul orɔ kweleny kwete kwizaw beṯen yiḏlǝyu yokɔ yiiŋna kiya yimaŋu yi orɔ kweleny kweḏi Izrayiilŋu. lakin ta nuŋu orɔ kwor kwiki kwiti kweṯi iɽii Allahna mac, ŋwuṯaŋu na Allah ece kworuna kwir ter eḏi orɔ ki lamin lete kweleny ki lubi luŋun.
Na Allah ece toruna tokuɽeny tri Izrayiil tǝni Ḏauḏ eḏi orɔ kweleny kukwaḏaḏu Zawulŋu. Na Ḏauḏ orɔ taɽa ki maḏinana kweḏi Beṯlamŋu. ki nyamin nyir na ter ter nyimaŋu nyi izaci ṯernyin yaŋali lu, na Ḏauḏ eɽinye yirawi yiɽen dok kir lima na zundaŋ tɔk kiya yima ǝnḏiḏa yaŋalina. Na Ḏauḏi orɔ kwete kwiṯi ǝjilini ki rɔgɽɔ na naŋu orɔ kwor kuzuɽu kweṯi aliḏa Allah ṯugwɔri nana na eṯi ŋu inyici nana tɔk.
Na Ḏauḏ orɔ urṯa wete wupa na naŋu orɔ nda tɔk. kinaŋ roḏogu Ḏauḏ taamal tete kinna tɔkwuɽeny, nuŋu ṯuguḏi kwuru kwete kupa kweni Julyaaḏ. Na Julyaaḏ orɔ kulŋiḏi ŋurṯana, kufirli beṯen, naŋu olela tɔk kaka limiṯira toɽɔl! Lakin na Allah meci Ḏauḏŋu eḏi eɽenye Julyaaḏŋu na eḏi kilǝḏi Izrayiilŋuzi tɔk. mer ṯimayni ŋa ta, nezi Ḏauḏ ilazi kii luru lir ṯuwǝn ṯeḏi Izrayiil, niḏi lizi iɽǝzi ŋunduŋu.
Na Zawiil ke ŋiɽany kaka magu lizi amɽi Ḏauḏŋu. Na Zawiil ṯecini nyamin nyuru eḏi ɽenye ŋunduŋu, lakin eṯi Ḏauḏ lucini ki yeyna yeḏi Zawiil. Lamin lete, na Zawiil naŋni Ḏauḏŋu lu eḏi eɽenye ŋunduŋu. Na Zawiil ele kibaŋna ṯa ga kulucina gi Ḏaud ki yeyna yeḏi Zawiil. Lakin na Zawiil ere eze ŋunduŋu mac. Na Ḏauḏ nani Zawiilŋu korɔ keṯɔk aŋguŋu naŋni eḏi eɽnye ta aŋguŋuṯa ɽenye ŋunduŋu. Lakin nuŋuzi ere ǝrri mac. Ta ki lubi kla, na Ḏauḏ uɽḏǝḏa Zawiilŋu kireḏi kwɔkwɔk eḏi ilŋiḏni Zawiilŋu kwiti kwinḏi eḏi eɽenye ŋunduŋu eḏi orɔ kweleny mac.
Kwɔkwɔŋ ṯalu, na Zawiil ay ŋaryǝna, ta na Ḏauḏ orɔ kweleny kweḏi Izrayiilŋu. Nuŋu orɔ kweleny kwizaw na lizi amɽi ŋunduŋu tɔk. Na Allah urtaḏa Ḏauḏŋu na nuŋu ruzi kwete kwǝḏi yeyena tɔk. Na Ḏauḏ ṯuguḏi ki ŋǝryana ŋuru na Allah meci ŋunduŋu eḏi ilazi ṯuwǝni kii ṯeḏi Izrayiil. Na Ḏauḏ miḏa Urzalimŋu nuŋu ruzi nda leḏi maḏina kuŋun. Ki ŋumurla ŋwa ŋweḏi ŋeleny ŋuŋun, na Izrayiil ǝḏi ŋima beṯen na nuŋu orɔ kurṯu tɔk.
Na Ḏauḏ naŋni eḏi awci daŋga kweḏi gi Izrayiilŋa tatap kwɔce Allah lu na eḏi ketece ŋunduŋu krama. Yiḏlǝyu kaka ruɽiŋana ṯuḏni kwaɽŋan (400) na lizi tatap kwece Allah inḏeḏa kirama ki yiŋnana yeḏi ṯaɽiḏa doŋ kiya yidaɽimaḏizi Muzza.
Lakin na Allah ṯiŋaḏa kuɽiya kwete kwǝni Naḏaan nanigu Ḏauḏ juwabgi, "Kaka ruḏuŋa kwor kweḏi ŋǝrya, a kwiti kwinḏi eḏi ǝwcici nyuŋu daŋga ŋgu mac. kwi tiɽǝlu awci. Lakin ta, nyi kwinḏiŋa eḏi urtaḏa bǝryǝl. kwete ki lugurnǝ na luŋa kwinḏi eḏi orɔ kweleny ŋwa hakumi lizi linyi nyaminu dɔk!''Niṯa Mazzaya orɔ dak kwir kugurnǝ kweḏi Ḏauḏŋa kwinḏi eḏi hakumḏi nyaminu dɔk. Na mazzaya ǝni kwete kwica Allahna orɔ ŋgwa kwica Allahna kwinḏi eḏi kilǝḏi lizi leḏi ṯurmun ki ŋikiyana ŋeŋen.
Ma Ḏauḏ neŋne ŋiɽaŋali ŋwu, ta kinaŋṯalu nuŋu ǝmni Allah beṯen na nuŋu urtaḏa tɔk kaka maŋu inḏeḏa Ḏauḏŋu ṯiɽǝna ṯupa beṯen na ṯurtaḏa tɔk. Na Ḏauḏ ere elŋe mac ṯacaŋ kwiri kwinḏi gi Allah eḏi ǝrri kwɔmne ŋgwa mac. Lakin mer ta ǝrrini, na lizi leḏi Izrayiil ǝni eḏi aki kizǝn ŋumuri ŋulana ŋwiti ŋwimaŋi kurzṯu ila kina mac, yiḏlǝy yir kaka1000.
Na Ḏauḏ hakumi ŋirlaluŋi na ṯugwɔrḏi ṯizuɽo na tɔk yiḏlǝy yuru, ta na Allah urtaḏa ŋunduŋu. ŋwuṯaŋu ma ŋumur ŋuŋun ǝdaḏi keṯɔk eḏi ernene ta, nuŋu ǝrri ŋikiyaŋi ŋuru ki yeyna yeḏi Allah.
Lamin lete, na urṯa weḏi Ḏauḏ ere dunuŋ mac wunanu tuk wuṯoguḏu ki ŋǝrya na, nuŋu icani par ŋgila kezir wa weḏi ŋeleny ŋuŋun ta nuŋu eze kwayo kwete kwiina nana. na yiriny yuŋun ǝni Beṯziiba.
Ki lubi liŋguŋli icani tuk, na Ḏauḏ uzi kwizi kwete eḏi mulca ŋunduŋu. Ner gi inḏiri ta nuŋu ṯiŋaḏa nuŋu aɽi dunuŋ. ki nyamin nyokɔ nyiblana kwɔkwɔŋu na Beṯziiba ṯiŋaca Ḏauḏŋu ŋiɽaŋali nuŋu ece nyi gu kuma eḏe.
Na kulen kweḏi Beṯziibaŋa kwǝni Uriya, orɔ kwete kwizaw beṯen ki urṯana weḏi Ḏauḏ. Na Ḏauḏ urnuṯa Uriyaŋu eḏi aɽa kiṯay ki ŋǝryǝna nuŋu eca ŋwu eḏi ele nanigu kwaw kuŋun. Lakin na Uriya derne eḏi ele dunuŋ kaka nani gu urṯa wokɔ ŋǝryǝna. Ŋwuṯaŋu na Ḏauḏ aɽazi Uriyaŋu ŋǝryǝna nuŋu andaci ŋgwa kupa eḏi ṯiŋa kezir wa wǝḏi ṯuwǝni ṯifirli beṯen mindaŋ er ɽenye.
Mindaŋ mer ɽenye Uriyaŋu, na Ḏauḏ aagi Beṯziibaŋu. kwaḏan, ta nuŋu elŋenje Ḏauḏŋu toŋɔra. na Allah ke ṯogɔrna beṯen ŋiɽaŋal ŋi ŋǝrrazi Ḏauḏ naŋu uzi kuɽi ya kwǝni Naḏaan eḏi andaci Ḏauḏŋu ŋirɽaŋal ŋi ŋiki ŋeḏi ŋikiyaŋ ŋuŋun.na Ḏauḏ ruwazi ŋikiyaŋ lu ŋuŋun nezi Allah iɽinyacilu. Na nyamin nyǝɽina nyeḏi ŋimiḏa ŋuŋun, na Ḏauḏ rumi Allah na eṯiŋu iɽina tɔk, na tɔk ki nyamin kinya nyifirli.
Lakin kaka jiiza kweḏi ŋikiya ŋeḏi Ḏauḏ, na tor toŋun tir toŋɔr ay. kinaŋ ta na ŋǝryǝ nani ki dunuŋ kweḏi Ḏauḏ ki nyamin nyeḏi ŋimiḏa ŋuŋun ŋǝɽina, na ŋuma ŋeḏi Ḏauḏ ajli beṯen. kaka iti ǝḏi gu Ḏauḏ ṯogwɔr tizuɽo Allah yi mac, na ṯa Allah ǝḏi ŋirlaluna ṯikitadi̱za ṯi ṯuŋun. kwaḏan ta na Ḏauḏŋa Beṯziiba gi ǝḏi toru tete kwokwony ner ǝnjici yiriny ner eca Zolomon.
Ṯiŋereŋ Ṯeḏi Kiṯam Kirlinalu ter kǝni: Zamwil kwir1. 10:15-19; 24; 31; Zamwil kwir2. 5;7;11-12