21. Tikitaḏiza ṯeḏi Allah ṯinḏaḏuŋu Mezaya
Kerreny tuk kwɔnkwɔn, na Allah kitaḏa eḏi uza Mezaya ŋu. Ta na ṯikitaḏiza ṯiŋna ṯeḏi Mezaya ilaḏa Aḏamŋuzi Hawagi.Ta na Allah kitaḏa eḏaruŋw kugwurnǝ kweḏi Hawaŋa kwinḏi eḏi elŋeḏne kwinderṯa kwinḏi eḏi kurɔm kimǝwa nda na. Kimǝwu ŋga ki kiɽenyja Hawaŋu lu kiri ziṯan.Ta na ṯikitaḏza eni ŋwu Mezaya kwinḏi eḏi ketece ziṯan na ŋoru biɽeṯ.
Na Allah inḏeḏa Abrahimŋu ṯikitaḏiza ṯari ŋwu, ŋunduŋgi a lizi tatap na ŋuduŋ ŋweḏi ṯurmun afi ṯortana. Na ṯurtana kiḏu ṯinḏi eḏi ṯimani korɔ ki nyamin na nyokɔ nyinḏi eḏi ila mindaŋ ma Mezaya ila. Ŋuzi ṯa ketece lizi lu tatap leḏi ŋuduŋ ŋwir na ter ter ki ṯurmuna eḏi kilǝḏini.
Na Allah andaci Muzaŋu ŋiɽaŋali ŋeḏi ṯikitadiza ŋaru ŋi ŋwu ki nyamina nyokɔ nyinḏi eḏi ila kwinḏi eḏi diɽaza kuɽiya la kwete kwir kaka Muzaŋu. Ŋinderṯa ŋete ŋeḏi Mezaya ŋgwa kwinḏi eḏi ila ki nyamin la nyokɔ nyinḏi eḏi ila.
Na Allah andaci kwelenyi kweni Dauḏ ṯikitaḏizaḏi ṯeni ŋwu kwete ki lugurnǝ luŋun kwinḏi eḏi hakumi lizi leḏi Allah dɔkdɔk. Ŋinderṯa ŋeni ŋwu Mezaya kwinḏi eḏi orɔ kwete ki lugurnǝ na leḏi Dauḏŋa.
Kuɽigi kweni Irmiya, na Allah kitaḏa eḏi kete kruu kiyaŋ. Lakin kiti kiri kaka ŋga ki daɽimaḏi Allahŋa Izrayiilŋali ki ayinla weḏi Zinnaŋu mac.Kuru ŋgu kinḏigi Allah lɔ zeriya kwuŋun rugori nana reḏi lizi; a lizi elŋe Allah lere lere, er orɔ lizi leḏi Allah na azi Allah iɽinyaci ŋikiyaŋalu ŋeŋen. A Mezaya kete kruu kiyaŋ.
Na liɽi leḏi Allah andazi tɔk ner aruŋw Mezaya kwinḏi eḏi orɔ kuɽi, kujawiḏ na kweleny tɔk. Kuɽi kwiri kwir kuzi ŋgwa kweṯi neŋne ŋiɽaŋali ŋeḏi Allah ta eṯuŋw andaci lizi ŋiɽaŋali ŋeḏi Allah tɔk. Mezaya ŋgwa kukitaḏigi Allah eḏiŋu uza kwinḏi eḏi orɔ kuɽi kwirlalu.
Eṯi lijawiḏ leḏi Izrayiil ketece Allah ŋinalu ŋeḏi ṯuzuɽa ṯeḏi ŋikiya na ṯififirna ki rogɽɔ ki ǝpana ṯeḏi lizi kila lima aki pir. Ṯuɽaḏa ṯi kworɔ. Na eṯir errici lizi Allah ki yiriny. Kaka inḏi gu eḏi kete rugɽɔ ruŋun karama kiṯiḏimaḏi kworɔ nanigu Allah.
Kweleny kwiri ŋgwa kweti hakumi ŋelenyina eṯiŋu keteci lizi ŋelenyi tɔk. Mezaya kwinḏi edi orɔ kweleny kwirlalu kwinḏi eḏi nanalu ki kurzila kweḏi ŋeleny kweḏi kugurna kuŋun kweni Dauḏ. Ŋwu hakumi ṯurmuna tatap dɔkdɔk. Ŋwu kete ŋelenyi ŋirlalu naŋwu ala ṯikitaḏa ṯirlalu nyamin tatap.
Na liɽi leḏi Allah andazi ŋiɽiyaŋi komne gi kutazir kweḏi Mezayaŋu. Na kuɽi kweni Malaaki nuŋu andazi ŋiɽiyaŋi naŋu ariŋu kuɽi kwete kupa kwinḏi eḏi ila kereny ta ema mezaya ila. Na Izaya kwir kuɽi andazi tɔk ŋiɽiyaŋi naŋu ariŋu Mezaya kwinḏir edir elŋe aḏi kiŋɽana. Na kuɽi kweni Miika andazi tɔk ŋiɽiyaŋi naŋu ariŋu kwinḏir eḏi elŋe ki lilina leḏi Bethilyamŋu.
Ta na Izaya kwir kuɽi andazi naŋu ariŋu Mezaya kwinḏi eḏi nani Jalil, ŋuzi kandizalu kila liniyacazi rugɔrna, na ŋuzi inḏada huriya kila lurwarzi luweya na kila linani ki zijina. Na Izaya ariŋu tɔk ŋiɽiyaŋi tɔk Mezaya kwinḏi eḏi zawi lizi luuma na kila liti leṯi neŋne mac, liti leṯi iziḏi mac, na kila liti leṯi andazi na kila liti leṯi ele tɔk mac.
Na kuɽi kweni Izaya andazi ŋiɽiyaŋi naŋu ariŋu mezaya kwinḏir eḏi ifirazi na er durni domeny. Na liɽi lokɔ ariŋu lizi kila linḏi eḏi ɽenye Mezayaŋu linḏi eḏi urṯaḏi yiret yuŋun na kumaṯ kuŋun kunderṯa kwinḏi eḏi buŋuḏi ŋunduŋu. Kuɽi tɔk kweni Zakariya naŋu andazi ŋiɽiyaŋi naŋu ariŋu kumaṯ kwindir aḏi inḏaḏa yariya yir ṯuɽi na wri ŋeniŋu ŋeḏi ṯubuŋuḏa ṯeḏi Mezayaŋu.
Na liɽi andazi tɔk ŋiɽeny ŋi ŋeḏi Mezaya ŋinḏi eḏi orɔ aŋguru. Na kuɽi kweni Izaya andazi ŋiɽiyaŋi naŋu ariŋu Mezaya kwinḏi lizi eḏi unyaḏa nana 'er olo na er ipi tɔk. Ŋwu ayi ṯurfa ṯi ṯirara ṯeṯec kaka iti ǝrraŋu kinna kumne kwere kwir puɽucur mac.
Kwokwac na liɽi ariŋu Mezaya kwinḏi eḏi irlalu kwiti kweḏi ŋikiyaŋna mac. Kwinḏi eḏi ayi eḏi dimi hukuma weḏi lizi ŋikiya ŋi ŋeŋen. Hukum wuŋun winḏi eḏi afa ŋiɽana nani gu Allah na lizi. Ner orɔ ŋu na Allah orɔ wamina eḏi Mezaya kiraḏalu.
Taŋu na liɽi andazi ŋiɽiyaŋi ŋariŋu Mezaya kwinḏi eḏi ayi lakin a Allah diɽazala ki ŋiɽenyna. Ŋiɽeny ŋi na ṯidiɽa ḏi kiŋiɽanyna ṯeḏi Mezaya, ṯinderṯa ṯinḏi aḏi ṯimazi ṯikitaḏa teḏi kilaḏi lizilu ki ŋikiyaŋna ŋeŋen ta ŋukete ṯikitaḏiza ṯiyaŋ.
Nezi Allah ruwecilu lir liɽi ŋitezir ŋeḏi Mezaya lakin na Mezaya ere ila kinna mac ki yiḏlyana yeḏi liɽi kila mac. Mindaŋ ma yiḏla yir kaka 400 ṯamḏu Allah yediḏica ṯiṯamza ṯeḏi ŋiɽiya ŋa, ta ki lamin ṯa kila dap, Allah winḏi eḏi uzi Mezayaŋu kiṯurmuna.
Ṯiŋereŋ ṯeḏi kiṯam kirlinalu ter ṯinani :Tekuwin 3:15;12:1-3;Ḏiṯuronomya 18:15;2 Zamwil aṯaani 7; Irmya 31;Izaya 56:16; Danyal 7; Malaki 4:5;Izaya 7:14;Miika 5:2;Izaya 9:1-7;35:3-5;61;53;Mezmuur 22:18;35:19;69:4;41:9;Zakariya 11:12-13;Izaya 50:6;Mezmuur 16:10-11.