3. Kiiru
Ma ŋumur ŋuru ṯamḏu, na lizi nani luru ki ṯurmuna. Ner orɔ lizi liki beṯen na lirŋaza letizi erri ŋa tatap ŋiki. Ner ke beṯen na Allah kitaḏa eḏi enyjazi ṯurmunalu tatap kiirugi kupa.
Lakin Nɔh nuŋu inḏa ṯimǝca ki yeyna yeḏi Allah. Kaka roḏuŋgwu kwor kwirlalu, kunanu ki lizina liki. Na Allah andaci Nɔhŋu kiirugi kigitaḏuŋgi eḏi uza. Nuŋu andaci Nɔhŋu eḏi awci faluka kupa.
Na Allah andaci Nɔhŋu eḏi daɽmaḏa faluka kwir limiṯira140 oleŋgi, na limiṯira 23 ṯorana kiibir, na ṯolala13.5. Ta na Nɔh naŋni eḏi awci faluka ŋiɽbinŋi eḏi kete ŋɔɽɔna ṯoɽɔl, na yiŋnana yuru, ki lɔɽɔna, na lufɽo. Eḏi faluka aŋraci Nɔhŋu, dunuŋgi kuŋun, Na kwɔmne tatap ki ureylu ŋirelŋina kilumor leḏi kiiru.
Na Nɔh iɽi Allahna. Ŋuduŋa nyelenyi nyuŋun nyir ṯoɽɔl ner daɽmaḏa faluka kaka ṯa andicazigu Allah eḏi daɽmaḏa. Na ṯidaɽmiḏa ṯeḏi faluka naniḏa yidlǝy yuru, kaka upaŋu beṯen. Na Nɔh oraci lizi ŋiɽaŋalŋi ŋeḏi kiiru ŋga kinḏi eḏi ila na nuŋuzi eca ŋwu aɽaḏiri Allah nana, lakin na lizi ere ǝmini ŋiɽaŋali ŋuŋun mac.
Na Allah inḏeḏa Nɔhŋu wamira dunuŋgi kuŋun eḏi awanci rogɽɔ reŋen eḏneya na ŋirel ŋeŋen tɔk. Mindaŋ ma kwɔmne tatap nanilu biɽeṯ, na Allah eca Nɔhŋu ŋwu tumor timila tuŋa, kwawgi kuŋun, na nyɔŋor nyuŋun nyir ṯoɽɔl, lawlina leŋen eḏi enḏi ki falukana __ lizi tatap lir dufakupa.
Na Allah uza ŋirela tatap kwor na kwaw kuŋun na ndǝw ṯɔk nanigu Nɔh eḏi enḏi ki falukana eḏi kilaw ki lamin leḏi kiiru. Na Allah uza ŋirela tatap degina kweŋen dufɔkwuɽeny ŋir law na dufɔkwuɽeny ŋir lor ŋeḏŋi kete ṯirlina. Mindaŋ mer nani tatap ki falukana, na Allah leŋḏiḏa ogwur ṯiḏi ṯuŋun.
Ta na kaw dunni, nuŋu dunni, nuŋu dunni.Nyaminu nyir ruɽi riɽen na yulŋana yir ruɽi riɽen kiti kirilu mac! na ŋaw ofa ki ureyilu tɔk. Na kwɔmne tatap ki ṯurmuna kuɽbanilu ŋawŋi, yayinyina kiya yulala tɔtɔj nezi ŋaw kuɽbaḏalu.
Kwɔmne tatap ŋgwa kunanu ki ureyilu nuŋu ay ndeṯ, lizigwunaŋ ŋirel ŋi dak kla linanu ki falukana. Na faluka ele ki ŋawla nuŋu aŋraci kwɔmne eḏi kiiru ere ferṯe mac.
Mindaŋ ma kaw irli, na faluka ele ki ŋawla yǝwǝ ṯuḏni, ki ŋomorla ŋwu na ŋaw ele eḏi anḏilu ki ureyilu. Ta lamin leṯe na faluka irli kayinla wir nda, lakin ta na ṯurmun karbinalu ŋaw ŋi. Mindaŋ ma yəwə kiɽeḏi ṯoɽɔl na yayin izini ŋuɽalu.
Mindanŋ ma nyamin kiɽeḏi nyir ruɽi riɽen, na Nɔh uza kuɽǝwa kwir kɔḏoŋɔrɔ eḏi eze ezir maŋu unḏalu. Na kɔḏoŋɔrɔ diɽi nuŋu rikanalu eḏi eca ureyu unḏalu, ta nuŋu ere inḏa ezir were mac.
Kwɔkwɔny na Nɔh uzi kuɽǝwa kwir koḏor. Lakin nuŋu ere inḏa ureyiŋi unḏalu tɔk mac, nuŋu aɽi nanigu Nɔh. Ma uzbu ṯamḏu, nuŋu uza koḏora kwɔkwɔny mindaŋ maŋu aɽa nuŋu afa ṯil ṯeḏi kuuni ṯunyuḏi ṯuŋun! Ma ŋaw enḏilu, na yaɽi ruuna kwɔkwɔny!
Na Nɔh aki kizen nyaminu dufɔkwuɽeny kwɔkwɔny nuŋu uza koḏora taminu tir toɽɔl. Kinaŋu ta, nuŋu inḏa ezir weḏwi kaṯu wǝŋ nuŋu ere aɽiḏa Nɔhŋu nana mac . Na ŋaw ele eḏi unḏalu!
Ma yǝwǝ ṯamḏu yiɽen na Allah eca Nɔhŋu ŋwu,'' ruḏari ŋaŋa dunuŋgi kuŋa na ŋirel tatap a ṯaza falukalu krekrem. Elŋiḏi kwele kuru na lugurna er ureni ki ureyilu.'' Ta na Nɔhŋa ruḏǝ ki falukana kwelegi kuŋun.
Mindaŋ ma Nɔh dapiḏalu ki falukana, nuŋu awci ŋwaḏguna ŋweḏŋi irlini ŋirela ŋa tatap ŋufḏana edi̱zi irlini karama. Na Allah amina karamaŋi keḏi Nɔh nuŋu ortaḏa ŋunduŋu dunugi kuŋun.
Na Allah ari ŋwu,'' Nyi kukitaḏa eḏi ere burazi ureyiŋi kwɔkwɔny ŋiɽaŋalŋi ŋiki ŋeṯizi lizi erri mac, ya eḏi kirazi ṯurmunalu kiirugi mac, lizi leḏi ta ŋikiaŋna kereny tuk kinaŋ roḏirgu nyele nyɔkwuɽeny.''
Na Allah kete ṯululuwa kerreny eḏi orɔ ŋele ŋeḏi ṯikitaḏiza ṯuŋun. Ki lomor lere nyiḏak ma ṯululu izini ki lere, eṯi Allah ṯiŋayini ŋiɽaŋali ŋeḏi ṯikitaḏiza ṯuŋun na lizi luŋun ṯiŋayni tɔk.
Ṯiŋereŋ Ṯeḏi Kiṯam Kirlinalu Ter: Kəni Ṯikita 6-8