35. Tiŋereŋ Ṯeḏi Papa Kweḏi Ŋimɽiyana
Lamin lete, na Yecu urtini lizi luru liṯi alla ṯulba na liḏaḏu leḏi ŋikiyaŋna ner ǝɽiḏa duŋ eḏi niŋnaci ŋunduŋu.
Na ŋuɽa ŋokɔ ŋweḏi ḏiin ŋunani kinaŋ tɔk ner eze Yecuŋu kuruuza lizi liki kaka limeḏgen, ner andazina wiɽe wiɽeny ŋunduŋu nana . Ta nezi Yecu andaci ŋunduŋuzi ṯiŋereŋwa kiḏu.
" kwor kunani kwiti kweḏi nyoru nyiɽen. Na kira tokuɽeny naŋu eca ṯernyinŋu, papa,nyi kunaŋnaŋa eḏi kanici nyuŋuzi komini kwinḏiŋa eḏi kanaci nyuŋuzi kirikirem!' ta na ternyin kanaci nyoru komne nyir nyiɽen."
"Fitak na tor tokuɽeny nuŋu ɽamazi komne tatap kweḏiŋu naŋu gi ele ki ezir wuluna tuk naŋu ṯuza ŋerela ŋuŋun tatap ki ŋeḏrena ŋiki."
" Kokɔ ta, na yaŋu ǝndi yupa ki ureyla wa wunani yi tor tokuɽeny, ta naŋu ere ǝḏi kiriiza ǝḏi gi iila eḏneya. Naŋu ece ŋɔḏɽorlu, naŋuzi inḏa ŋeḏiŋi iḏni yizaŋi. Na yaŋu iyena beṯen naŋu naŋni ǝḏi ye eḏneya weḏi yizaŋ."
"Kwaḏan ta, na tor tokuɽeny ǝca rogɽɔ ruŋun, ŋwu ǝḏa kwiri ŋgu kwerra nyi ? yaḏama yeḏi ternyeri tatap eṯir ǝḏi komne kuru kweḏi ye, na nyi kuuma naŋni eḏi ay yaŋu. Na nyi kudiɽi nyaɽiḏa nani gu papa kwinyi nyi uṯicalu eḏinyi orɔ kwete kwir kaka yaḏama yuŋun."
" Na tor tokuɽeny diɽi naŋu ǝɽiḏa dunuŋ nana kweḏi papa kuŋun. Kinaŋ nanuŋu gu ki ezir ulana, na ternyin eze ŋunduŋu tuk na ŋimɽi ye beṯen . naŋu ǝfri nani gu tor tuŋun naŋu miḏani nana naŋu iɽaḏa ṯunyu tɔk."
"Na tor eca ŋwu, '' Papa, nyi kuma ǝkici Allahlu lumori puɽucur na ŋaŋu tɔk. Nyi kwiti kufḏana mac eḏi orɔ tiɽŋalu."
" Lakin na ṯernyin eca kaḏama kete kuŋun ŋwu, inḏu fitak a dima yireḏi ezi kinici toru tinyi ! a kinici kaṯima kilamin luŋun na a kinici yiḏwanu ŋwarana tɔk . Ta a ɽenye tiḏri tir limaḏar mindaŋ ǝri amina na er kete zibira, kaka ay ŋu tor tinyi lakin kirem tima miiḏi ! teni tuṯuḏɔ, na kiremŋu tima inḏini.'"
"Ŋuṯaŋu na lizi kete zibira. Mer ere naniḏa mac , na tor tupa ila dunu tinani taki ŋoruŋ ki ṯurinyna. Naŋu neŋne lufa na limazika tɔk naŋu liŋɽi naŋu ǝriŋwu ǝḏa kwiri manuŋ kuma errini dunuŋ."
" Ma tor kira tupa elŋe likita zibira kaka magu eŋgen ǝɽa dunu, naŋu ke togɔrna beṯen, naŋu ere amɽeḏi eḏi ǝnḏi kininy mac. Na ternyin ruuḏa par ŋgila naŋu uraci ŋunduŋu eḏi amina ŋunduŋali, lakin naŋu derne."
" Na tor kira tupa eca ternyin ŋwu, yiḏleyu kiyu tatap nyi kwakicaŋa ŋodɽɔr togɔr ṯi ṯizaw ! na nyi ere ǝkici ŋaŋu lumori puɽucur lamin lere mac, na ere inḏaḏa nyuŋu kinna toŋe tere teḏi ŋiɽu teḏi ri amina limaḏgeri li mac . Lakin ma tor tuŋa tima ṯuza kiriiza tatap ki ŋeḏrena ŋiki maŋu aɽa dunu, ta na ɽenyje tiḏri tir limaḏar."'
" Na ternyin ǝŋnici naŋu ǝca ŋwu, '' Tor tinyi, ŋa kunani nyigi dok dok, na komne tatap kweḏinyi kuŋa kwiri. Lakin ner ufḏani deŋgerina eḏi amina, kaka aigu aŋgalu, lakin kirem kuma miḏi. akweni kuḏodɔ, na kirem kuma inḏini !'"
Ṯiŋereŋ Ṯeḏi Injiil Ṯinani kiṯamina keḏi lugga 15:11-32