38. Ṯubuŋuḏa Teḏi Yecu
Yidileyuna tatap, eṯi yahuud damḏa zibir kweḏi tirerelu. Ziibir ŋgwa kweniŋu Allah wuma uruwa lugurna luŋun ki ŋuweyina ŋeḏi limazrin na kiyiḏileyna yuru yiri ruɽi ṯuduni ŋa ya yimdamḏu. Kiyidleyna kiya yirma tɔɽol kaka ma Yecu baŋaci lizilu ŋiɽaŋali ŋeḏi Allah, Kilamin la luŋun lir liŋna na Yecu andaci limeḏigen nuŋuzi ecaŋwu, '' Nyi kwinaŋna eḏi ṯinani ki ziibirna ŋgu ki Urzaliimna, ta ari nyi ɽenye kinaŋu.
Na kumad kweḏi Yecu kweni Yahuuza. Yahuuza kwiri kumḏu kulga kwedi kiriiz kedi yafuur, Lakin naŋu amɽi kiriiza eṯiŋu nyimi kiriiza dɔk dɔk kitinani kulgana. Ma Yecu ŋa lumad li luŋun upadi Urzaliima, na yahuuza ele nani gu yahuud kila lir ŋuɽa eḏi buŋudi Yecuŋu kiriiz gi. Naŋu elŋe lizi lir ŋuɽa leḏi yahuud lidirna ŋiɽeŋali ŋeni Yecu kwiti kwiri Mezayaŋu mac, ta ner naŋni eḏiɽenye ŋundŋu.
Nezi kwizi kwir nda, li leḏi yiziiz nuŋu omlɔ kila lir ŋuɽa leḏi yahuud, Neri inḏa yahuuzaŋu kiriiza kir yeriya yir tuɽi na wri eḏi gu ŋubuŋuḏi Yecuŋu. Ner errini ŋu kaka andizaŋu liɽi ŋiɽiya ŋi. na Yahuuza emini, naŋu afi kiriiza, ta nuŋu ele kiḏey. Ta nuŋu ece tey ṯinḏi timaci ŋundŋuzi aḏimḏa Yecuŋu eḏiri ɽenye.
Ki Urzaliim, na Yecu amlada zibiira kweḏi tirerelu lumad li luŋun. Ki aŋuna wa weḏi eḏne, ki zibirna weḏi tirerelu ta na Yecu dima kafaŋ gi ta. naŋu uɽana naŋu ari ŋwu, '' Metirri ye aŋna winyi wiri wumaŋazi inḏaḏa ŋaŋuzi ararzi ŋu eḏi ḏuŋweni nyiŋu.'' kiṯayilu kiṯu ,Yecu kwariŋu kwinḏi eḏi ayici ŋunduŋuzi aŋnalu wuŋun.
Ma Yecu ḏima ṯitiraŋi ta nuŋu ariŋwu,'' Iḏirizi ŋu, ŋeni ŋinyi ŋiri ŋeḏi ṯikitaḏiza tiyaŋ ŋa ŋiraḏalu ŋaḏi ṯiɽnyaḏalu teḏi ŋekiyaŋ. Ererezi ŋu aḏi iḏuŋwayini nyuŋu ki aŋun wa winḏiŋa eḏi ii.''
Ma Yecu andaci limeḏgen naŋuzi ecaŋu ''ŋgwa kwete kunani ŋaŋali kwinḏi eḏi buŋuḏi nyuŋu.'' Ta na limeḏgen urtinina, ta ner uticilu aya kwiri manuŋ kwerri ŋiɽaŋali gwu.''Nezi Yecu ecaŋwu, '' ŋgwa kwiḏinyi ad̄indada kafaŋi kwinderta kwiri buŋuda, ''Ta nuŋu inḏaḏa yahuuzaŋu kafaŋi.
Mindaŋ ma Yahuuza ǝfi kafaŋi, ta na zitan ǝnḏi ŋunduŋna. Nezi Yahuuza ṯazalu naŋu ele eḏi maci yahuuḏa eḏimiḏa Yecuŋu. Ki ezir na wir kulŋana.
Mer ṯimazi eḏneya, na Yecuŋa limeḏgen li ele ki ayinla weḏi zayiṯunŋu. Na Yecu ariŋwu, " Ŋaŋa linyi eḏi arṯalu kulŋana ṯa ŋgu. Ŋuloḏina, 'izaṯi nyi kupi kwaɽa ta a ma yaŋal faḏalu."'
Na Butruuz aŋnici, ''Ma kina lizi tatap liḏaḏu dirinḏa ŋaŋulu, nyi kwende kuŋi ǝfirici mac.'' Ta na Yecu andaci Butruuzŋu, kaka magu ziitan gwa kwinḏiŋa eḏi ǝfi ŋaŋu, lakin nyi kuŋi arici kiyiriny, Butruuz, temina ṯuŋa ŋwere ere mac. Ma kina, kulŋana ŋgu, inḏuŋu kiḏugɽi eḏi orri, ŋa kwinyi ǝfirini nyaminu tɔɽol ŋeni ŋu ŋa kwiti kwilŋiḏi nyuŋu mac.
Ma Butruuz andaci Yecuŋu, ''Menyi kina nani eḏi ay, nyi kwende kwinḏi aḏiŋa ǝfirini mac.'' Na lumad luŋun liḏaḏu andaci kandiza ṯa ŋga.''
Ma Yecu ele limeḏgen li luŋun ki ezir wa weni Jiztumaniya. Na Yecu andaci limadi luŋun eḏi ari kiyiriny mindaŋ ari ere enḏi kitumumana mac. Na Yecu ele eḏi ari kiyriny rogɽɔ ri ruŋun.
Na Yecu ari kiyiriny nyamini tɔɽol nuŋu ariŋwu, ''Papa kwinyi, ma amini aḏi dugwaci nyuŋu mac eḏi efi tiṯiraŋi teḏi turufa mac. Lakin ma tai ere tere mac ṯeḏi eɽinyaci, lizilu ŋikiyaŋlu ŋeŋen errazi ŋa ŋinanazi ṯogɔr ṯuŋa.'' Na Yecu urutinina beṯen beṯen ta ni ŋiima ŋuŋun bindalu kaka ŋin. Ta na Allah uza maleyka eḏi firili ŋunduŋu.
Ma aŋun weḏi tara kiyiriny tamḏu, na Yecu uralada nani gu limedegen luŋun, lakin ner inḏiri ŋwaru. mindaŋ maŋu aɽiḏa ŋundŋuzi nyaminu tɔɽol, ''Nezi Yecu ecaŋwu, '' Diɽiri! na kubuŋuḏa kwinyi ŋgu kunuŋ.''
Ni yahuuza ŋa ila lizili lir ŋuɽa liḏi yahuud, na wurta, na lizi li luru. Ner apa yalala ta yiḏreŋ yi tɔk. Na yahuuza ilaḏa Yecuŋu nana ta nuŋu acaŋwu,''Tagina ḏi, Lafenḏi,'' nuŋu aŋiḏa kunduŋu boza. Tagina kiḏu naŋu orɔ alama weḏi lizi lir ŋuɽa leḏi yahuudŋu eḏi elŋe eya kwiri kwenḏir eḏi imḏa. Ma Yecu andaci naŋu eca ŋwu, '' Yahuuza, ŋa kwinyi buŋuḏi tiɽa ṯunyu ḏi aʔ''
Mindaŋ ma wurta kete Yecuŋu ki zijina, ni Butruuz alla kalala nuŋu uɽi keni keḏi kaḏama keḏi kweleny ŋgwa kupa kweḏi kruu. Na Yecu ecaŋwu, ''Kita kalalalu kida̱ya! nyi kutici papalu kweḏi rurum reḏi maleyeka eḏiŋuzi iḏiŋada eḏi karni nyuŋu. Lakin nyi nyinyici papaŋu nana kwinyi.''Ni Yecu zawi kworu keni. Mer kete Yecuŋu kizijina, ni lumad luŋun ner afari kiḏeylu tatap.
Ṯiŋereŋ Teḏi kitam kirlinelu ter Matta 26:14-56; Marguuz 14:10-50; Lugga 22:1-53; Yuhana 12:6; 18:1-11