8.Allah wikilǝḏa Yuzifŋu Na dunuŋ Kuŋun
Ma yiḏlǝ ṯamḏu yuru, ma Yaguub orɔ kwor kwir kimayǝ, nuŋu uzi toru tuŋun tamɽaŋu, teni Yuzif, eḏi ele eḏi raŋaḏa liyegen kila leṯi karni ŋirela lu.
Eṯi liyeŋgen leḏi Yuzifŋa firazi ŋunduŋu kaka eṯigu ṯernyin amɽi ŋunduŋu beṯen na kaka inḏrigu Yuzif ṯilŋiḏa eḏi orɔ nda leŋen. Ma Yuzif ila nanigu liyeŋgen, ner muḏa ŋunduŋu ner liṯaḏa lizi kila leṯi yila luwaya.
Ma liyeŋgen leḏi Yuzifŋa ere aɽi kina dunuŋ mac, ner kii yireḏina yeḏi Yuzif nerzi oɽazi ki ŋinna ŋeḏi ŋiɽu. Ta nerzi baŋaci ṯernyin yireḏi eḏi ari ŋaɽinyna ŋuŋun ŋwu ŋirel ŋeḏi kiyaɽina ŋu ŋiri ŋima ɽeŋe Yuzifŋu. Na Yaguub jiɽmini beṯen.
Na lizi kila leṯi yila luwaya mulɔ Yuzifŋu nergi ele mazir. Na mazir orɔ baleḏ kupa, kwǝḏi ŋumana beṯen kunanu nanigu kifirṯa kǝni nail. Na kila leṯi yila luwaya liṯaḏa kworu kupa ŋoru ki ṯurumna na kwir korṯu Yuzifŋu. Na Yuzif akici kworu ŋgwa kwiliṯu ŋunduŋ ŋoḏɽɔr ŋizana, na Allah ortaḏa Yuzifŋu.
Na kwaw kweḏi ŋgwa kwilitu ŋunduŋu naŋni eḏi inḏiri Yuzifgi, lakin na Yuzif derne eḏi ǝrri ŋikiyaŋi ki yeyna yeḏi Allah. Nuŋu apiriḏa Yuzifŋu ŋariny nana nuŋu kakiḏa Yuzifŋu ŋǝluŋ nana ner muḏǝ ner ili zijin. Ta naniŋu zijin kina, na Yuzif ǝḏi ṯǝmina nanigu Allah, na Allah ortaḏa ŋunduŋu.
Ma yiḏlǝ ṯamḏu yiɽen, nata Yuzif nani ki zijin, kaka iti ǝrǝŋuzi ŋere ŋiki kina tɔk mac. Kulŋǝna kete, na Faraun ŋgwa kweṯigi lizi leḏi mazirŋu ari ŋwu melik kweŋen kwiri, nuŋu inḏiri rilŋiḏa riɽen ner rǝmbǝl ŋunduŋu beṯen. Nuŋu ere kwere ki lizina luŋun kla lǝḏi yeyna eḏi upici ŋunduŋu ŋiɽaŋali ŋeḏi rilŋiṯ ruŋun mac.
Na Allah inḏeḏa Yuzifŋu ŋuma ŋeḏiŋi upi riŋliḏana, ta ner mulca Faraunŋu Yuzifŋu kwunanu zijin. Na Yuzif upici ŋunduŋu riŋliḏana nuŋu ari ŋwu,'' Allah wiḏi eḏi ṯiŋaḏa yiḏlǝy dufɔkwɽeny yeḏi ṯunana turu, na yiḏlǝy dufɔkwɽeny yiḏaḏu yiromu yeḏi yaŋuna.''
Na Faraun amina beṯen Yuzifŋgi nuŋu inḏeḏa ŋunduŋu ŋoḏɽɔr eḏi orɔ nimra kuɽen keḏi zulṯa ki ŋelenyna ŋeḏi mazirŋu tatap!
Na Yuzif andaci lizi eḏi awani eḏneya wuru weḏi yiḏlǝ kiya yir dufakwɔkwɽeny yeḏi ṯuna ṯizaw. Ta na Yuzif liṯaḏa lizi eḏneya yidlǝy kya yeḏi yaŋu yir dufakwɔkwɽeny eḏi ŋunduŋa ǝḏi eḏnya wuṯimaḏu ŋunduŋuzi eḏi ye.
Na yaŋu ila yiki beṯen nerta ere nani Mazirna dak mac, ner nani tɔk Kanaan nanigu Yaguubŋa lizili luŋun.
Ta na Yaguub uzi nyele nyuŋun kinya nyupa ŋuɽala Mezr eḏi liṯa eḏneya ŋunduŋa ŋiyaŋgatatap ner ere liŋe Yuzifŋu mac. Mer irlici ŋunduŋu eḏi yila eḏneya. lakin na Yuzif liŋe ŋunduŋuzi.
Mindaŋ ma Yuzif uṯici liyeŋgenlu eḏizi eze merta urli rogɔrlu reŋen,nazi Yuzif eca ŋwu nyi kwri aŋgal kwalu, kwǝni Yuzif! eṯi ṯinyari mac. ŋaŋa likitaḏu eḏizi ǝrrici nyiŋu ŋiki kinaŋ mer nyi yila kaka kwuay lakin nazi Allah ǝrri ŋizaw ŋiɽaŋalŋi ŋiki! ilar a nani mazir ŋizi ta inḏeḏa ŋaŋuzi lizili lalu.
Ma liyeŋgen leḏi Yuzifŋa aɽi dunuŋ ner andaci ṯernyin ṯeŋen, ṯǝni Yaguub, Yuzif ŋgwala ta kwumiḏu, nuŋu amina beṯen.
Ruḏugu Yaguub ta kina kwor kwuma orɔ kimǝyǝ, nuŋu ta ele mazir dunuŋgi kuŋun tatap, ner nani tatap kinanaŋ. Ma Yaguub kina ere ay mac, nuŋu ortaḏa nyele nyuŋun tatap.
Na ṯikǝkina kiḏa ṯeḏi ṯikitaḏiza tinḏeḏa Allah Ibrahiimŋu nuŋu mumri nuŋu ele nanigu Izhaag, na nanigu Yaguub, na nuŋu ele nyele nyeḏi Yaguub nyir wri kuɽen dunuŋgila kweŋen. na lugurnǝ leḏi nyele nyir wri kuɽen.
Ṯiŋereŋ Ṯeḏi Kiṯam Kirlinalu Ter: Kəni Ṯikita 37-50