́12. Ṯuruuḏa
Na Izrayiilŋa amina beṯen eḏi ṯazi Mazirŋu lu. Ner ere orɔ kwokwony liway mac, ta ner ele kiureyilu weḏi ṯikitaḏiza! Nazi Limazri inḏeḏa Izrayiilŋuzi wɔmne kere nyidak ŋgwa kumarzi naŋnaḏa, na tɔk ḏahab na fuḏḏa tɔk na kɔmne kuru kwizaw beṯen. Na lizi lɔkwɔ lir umam amini Allah ner ele Izrayiilŋali ner tazi Mazirŋulu.
Eṯizi Allah mulɔ ṯimenḏi teḏi lebleṯ tulala ṯiŋnaca ŋunduŋuzi kereny eṯiŋu iŋnaci ŋwunduŋuzi kereny ki aŋunna, ta kilikalu eṯiŋu orɔ ṯimen tulala ṯeḏi igə. Eṯi Allah nani ŋunduŋali dɔdɔk na eṯiŋuzi mulɔ tɔk kilyǝna keŋen. Ŋunduŋa tatap eḏi rumi ŋunduŋu.
Kwɔkwɔ ṯaŋwu na Faraunŋa lizili luŋun urlǝ ŋaɽinyna ŋeŋen ner naŋni Izrayiil eḏi orɔ luway leŋen kwokwony. Na Allah afrinyji Faraunŋu eḏi ferle ṯugwɔri, kaka eḏi lizi elŋe ŋundu kwiri Allah wir rerem, na eḏi elŋe ŋunduŋu kweni Yaweh, kwǝḏi ŋuma beṯen ŋiṯǝmḏuŋi ŋuma ŋeḏi Faraun na yalalu ywuŋun.
Ŋwuṯaŋu na Faraunŋa urṯa wi wuŋun ner kwaḏiḏa Izrayiilŋuzi eḏi ruuzi ŋunduŋuzi luway leŋen kwokwony. Ma lizrayiil eze urṯa weḏi limazri winḏu, ner icini lima iryǝnilu ki rinyina reḏi urṯa weḏi Faraun na Ṯujul ṯeṯi ǝni (ṯujul ṯori). Ner ṯenye ner aari kwula, "Nyiŋa lɔḏo liṯaza mazirŋulu eḏi ru? Nyiŋa linḏi eḏi ay!".
Na muuza eca lizrayiila, " Eṯi tinyari mac! Allah weŋzi ṯuguḏici aŋunu na ŋwiglǝḏi ŋaŋuzi." Ta na Allah eca muuzaŋu ŋwu, " Andica lizi eri ilaḏa ṯujuli nana" ṯeṯi ǝni (ṯujul ṯori).
Na Allah ili ṯimena teḏi lebleṯ eḏi nani kelgenyna kweḏi lizrayiilŋa limazrili kaka ṯa ŋwu a limazri ere ǝḏi ŋuma eḏeze lizrayiila mac.
Na Allah andaci muuzaŋu eḏi alazi ṯiila eḏi kitazi ṯujuli nana eḏi uɽǝḏa ŋawna. Ta na Allah diɽa kuroni eḏi ofe ŋawuna ki ṯujulna eḏi aɽaḏa ki yibir ŋǝgwur na ki ŋama, eḏi tay nani ki ṯujulna.
Na Lizrayiil ele ki ṯujulna ki urayila wunḏalu na ŋaw naniḏa ki yifirla yeŋen.
Ta na Allah dimǝ lebleṯ kiṯay eḏi duŋgwaci limazriya eḏi eze lizi leḏi Izrayiil lafru. Na limazri kitaḏa tiktik eḏi ruti ŋunduŋuzi.
Ŋwuṯaŋu ner kwaḏiḏa lizi leḏi Izrayiil kiṯayna ṯruḏu ṯujulḏi na, lakin na Allah dugwaci limazriya eḏi tenye na ŋwu muḏǝḏa lumurṯa leḏi urṯa ner ǝnḏi ki ŋargicaŋna dib ner aari kwula, ''ner ari ŋu afriri tuk! na Allah wu wuṯugiṯica lizrayiila.
Mindaŋ ma Lizrayiil tatap kilaw mer nani ṯujuli kǝni, na Allah andaci muuzaŋu eḏi alazi ṯiila kwokwony. Maŋu iɽi ŋiɽaŋalina ta, na ŋaw aɽaḏa urṯa nana weḏi limazri ner aɽiḏa kaka ṯa nanirgu kerreny ki ezir wuŋun. Na urṯa weḏi limazri ay tatap ki ṯujulna.
Mindaŋ ma Lizrayiil eze limazriya lima ay ta, ner aliḏa Allah rigwɔri nana ner amini eḏi ari ŋwu muuza kwiri kuɽi kweḏi Allah.
Na Lizrayiil amina tɔk ṯamana ṯiḏǝmḏi lu pur kaka mazigu Allah kilǝḏi ŋiɽenyna na ŋuwayna tɔk! ner orɔ kekermŋu hur eḏi akici Allah ŋɔḏɽɔr. Na Lizrayiil eleŋe rilŋa ruru beṯen reḏri kete lufǝ leḏi hurriya weŋen wiyaŋ na eḏi iɽǝzi Allah kaka maŋuzi kilǝḏi ŋunduŋuzi urṯa nana weḏi mazirŋu.
Na Allah inḏeḏa Lizrayiila wamira weḏwi keṯe zibira kweḏi ṯimumra yiḏlǝy tatap eḏi ṯiŋaini kaka mazi Allah inḏeḏa ṯilaza kii ki limazrila na maŋuzi alaa ki riinyna reŋen eḏi ere orɔ luway kwokwony mac. Ner ɽenŋe kaŋali kizuɽo nana nergi keṯe kraama. Nerzi ye yafaŋi kiya yira nyurŋana.
Tiŋereŋ Ṯeḏi Kiṯam Kǝni Ṯuruuḏa12:33-15:21