2. Vawlei Ah Sualnak A Lut

Adam le a nupi cu Pathian nih a serpiakmi hna dum dawh chung ah an um, an i nuam tuk. An pahnih in thilpuan zeihmanh an i hruk lo, nain ningzah awk ah an hngal lo, a ruang cu vawlei ah sualnak a rak um rih lo. Dum chung ah an i chok i, Pathian he an i chawnbia tawn.

Nain dum ah cun a zertiangmi rul a rak um. Rul nih minu cu a thawh i, "Pathian nih dum chung i zei thingkung poh, an theitlai nan ei lai lo, tiah a'n ti taktak hna maw?" tiah bia a hal.

Minu nih, "A ṭha le a chia hngalhkhawhnak thingkung theitlai dah tilo thingkung dang theitlai cu nan ei khawh dih ko. Ei lo ding theitlai nan ei ahcun silole nan tawngh men zong ah nan thi lai, tiah Pathian nih a kan ti," tiah a leh.

Rul nih minu cu a thawh i, "Mahcu bia cu a dik lo! Nan thi lai lo. Mahhi thingthei nan ei lecangka Pathian bantuk nan si lai i, amah bantuk in a ṭha le a chia nan hngalhthiam khawh ding Pathian nih a hngalh ziar ruang ah a si," tiah a leh.

Minu nih thingthei aa dawh ning le thawt tuk dawh a si cu a hmuh. Fim zong cu duh kaw, thingthei zeimawzat cu a lawh i a ei. Cun thingthei cu amah he a ummi a vapa a pek i, a vapa zong nih thingthei cu a ei ve.

Chikkhat te ah, an mit a hun dei i taktalawng pi i an um an i hngal. An taktalawng pi sinak cu thinghnah in thiltpuan an i thit i khuhzual an i zuam.

Cun mipa le minu nih dum chung i Pathian aa chawh thawng an theih. Pathian nih a kan hmuhsual lai, tiah an i thup. Pathian nih mipa cu, "Khoika'h dah na um?" tiah a auh. Adam nih, "Dum chung i naa chawh thawng ka theih, taktalawng pi ka um ruang ah ṭihphannak ka ngei. Cuca'h kaa thup," tiah a leh.

Cun Pathian nih, "Ho nih dah taktalawng pi i na um cu a'n chimh? Ei lo ding ka'n timi thingthei kha na ei dahra?" tiah a hal. Mipa nih cun, “Nangmah nih mah minu hi na ka pek i, amah nih thingthei cu a ka pek,” tiah a leh. Cun Pathian nih minu cu a thawh i, “Na tuahmi hi zeidah a si?” a ti. Minu nih, “Rul nih a ka leirawi,” tiah a leh.

Pathian nih rul cu a thawh i, “Nangmah cu chiatserh na si cang! Na paw in na lawn lai i leidip na ei lai. Nangmah le minu cu nan i ral lai i, na tefa le a tefa zong an i ral ve lai. Minu i a hrinsor nih na lu a rial lai i, nang nih a kedil na cuk ve lai,” tiah a ti.

Cun Pathian nih minu cu a thawh i, “Fa na hrin tik ah na nganfah ka zualter lai. Na va cu na duh lai i, anih cu na cung ah nawl a ngei lai,” a ti.

Pathian nih mipa cu a thawh i, “Na nupi bia na ngaih i keimah cu zei ah na ka rel lo. Vawlei hi chiatserh a si cang i, rawl voiter ding in fak pi in rian na ṭuan a hau lai. Cun na thi lai i, na takpum cu leidip ah a cang ṭhan lai,” a ti. Mipa nih a nupi cu Eve tiah min a sak, cu min a sullam cu “nunnak-petu,” tinak a si, a ruang cu amah cu mi vialte nu a si ding a si. Cun Pathian nih Adam le Eve cu saphaw in a thuamh hna.

Cun Pathian nih, “A tu cu minung nih kanmah bang a ṭha le a chia an hngalh khawh cang si kaw, zungzal nung ding in nunnak thingkung i a theitlai hi eiter hrimhrim lo ding an si,” a ti. Cuticun Pathian nih Adam le Eve cu dum dawh chung in a ṭhawl hna. Nunnak thingkung i a theitlai cu hohmanh nih an einak hnga lo Pathian nih dum chung luhnak ah a ṭhawngmi vanmi a chiah hna.

//Baibal tuanbia laknak: Genesis 3//