21. Pathian Nih Messiah Thlah Ding Aa Kam

Messiah rat te ding hmasa bik biakamnak cu Adam le Eve sin ah a rak si. Eve hrinsor a chuak te lai i, cu nih cun rul lu cu a rial te lai, tiah Pathian nih bia a rak kamh hna. Eve a rak hlengtu rul cu Setan a si. Pathian biakam i a sullam cu a ra te dingmi Messiah nih Setan cu a tei lai, tinak a si.

Pathian nih Abraham cu vawleicung miphun vialte amah thawng in thluachuah pek an si te lai tiah bia a kamh. Cu thluachuah cu mi vialte khamhnak lam serpiak ding ah ni khatkhat ah a ra te ding Messiah kong chim duhnak a si.

Pathian nih Moses sin ah amah Moses bantuk profet dang a thlah te ding kong bia a kamh. Cu zong cu a hnu i a ra te ding Messiah kong chimchungnak tthiamtthiam a si.

Pathian nih David sin ah, Messiah cu amah David hrinsor pakhatkhat a si te lai, tiah bia aa kam.

Profet Jeremiah hmang in, Pathian nih, Israel mi hna sin i Pathian Biatiam bantuk phun si lo in Biatiam Thar a ser lai kong biakamnak a ngei. Cu Biatiam Thar ah cun, Pathian nih a nawlbia cu mi hna thinlung ah a ttial lai, mi nih Pathian an hngalh lai, annih cu Amah mi an si lai i, Pathian nih an sualnak a ngaihthiam hna lai, ti a si. Messiah nih Biatiam Thar cu thawk ding a si.

A ra dingmi Messiah cu profet, tlangbawi, siangpahrang a si ding a si. Profet timi cu Pathian bia a thei i, cu Pathian bia cu mi sin i a chimchintu a si. A ra ding Messiah cu profet tlamtling a si ding a si.

Tlangbawi timi cu a sualmi hna aiawh in Pathian sin i raithawinak a tuahtu a si. Tlangbawi nih mizapi ca ah Pathian sin ah thla an cam tawn. A ra te ding Messiah cu tlangbawi zik tlamtling, Pathian sin i raithawinak tlamtling ah amah lila aa pe te ding a si.

Siangpahrang timi cu penram pakhat ah uktu a si i, rammi pawl an bia a ceihtu a si. A ra te ding Messiah cu saingpahrang tlamtling, amah hringsortu David bawitthutdan ah a tthu te ding, zungzal in hi vawleicung pumpaluk a uk te ding, le zeitik poh te ah ding te le dik tein bia a ceih ding a si.

Profet pawl nih a ra te ding Messiah chuah lai nak kong hi an rak chimchung. Malakhi nih cun Messiah a rat hlan ah profet lianngan pakhat a rat lai kong a rak chimchung. Isaiah nih Messiah cu ngakcu thiang in hrin a si te lai kong a chim. Mikah nih Bethlehem khua ah a chuah te lai kong a chim.

Profet hna nih Messiah i a rianttuan kong zong an rak chimchung. Isaiah nih cun, Messiah cu Galilee ah a um te lai i, ngaihchiami hna hnemtu, saltangmi ca i zalonnak petu, thongtlami hna ca i luatnak petu, ti in a rak chim. Isaiah i a chim chap rih mi ah, Messiah cu hnachet, mitcaw, kebei, le holhkholo tibantuk tel in midamlo damtertu a si lai, tiah a ti.

Isaiah nih, Messiah cu a ruang umlo pi in huat le hlawt a si lai, a ti. Messiah kong ah Psalm nih a chimchungmi cu a thilpuan conak ding ah camcawhfung an zuh te lai i a hawikom lila nih a leirawi te lai, ti a si. (Psalm cauk cu Ca Thiang chung i Judah mi hna thangtthatnak hla a si.) Zechariah nih, a hawipa cu a leirawi man ah nguntangka sawm thum pek a si lai, a ti.

Profet hna nih Messiah cu zeitin dah a thih te lai kong zong an chim. Isaiah nih, Messiah cu cil an chak lai, an cawhdeh lai, an tuk lai. Cun fei in an chunh lai i thing cung ah an thlai lai, cu kaa ah cun a thi te lai, a ti.

Messiah cu a tlamtlingmi a si lai i, sualnak ngeilo a si lai. Midang an sualnak ruang i dantat hrem thihnak a huah lai. Cu bantuk a ruatnak thawng in Pathian le minung kar ah daihnak a tlung lai. Cu ruang ah cun Messiah a thihnak nih Pathian lung a lawmhter lai.

Messiah cu a thi te lai, ti tiang lawng si lo in profet pawl nih an chim rih mi cu, Pathian nih thihnak in a thawhter lai, ti a si. Cuti Messiah thihnak le thawhtthannak in Pathian nih khamhnak ca i a khuakhan cu a lim lai lai i Biatiam Thar cu a thawk lai.

Pathian nih profet pawl cu Messiah rat lai kong ah thil tampi a hmuhsak ko hna nain Messiah cu a ra ra hlei rih lo. Hi profet bia hna lak i hmanung bik hnu kum 400 ringlo hnu, a caan a tlin hnu, ceo lawng ah Pathian nih Messiah cu hi vawlei ah a run thlah.

//Baibal tuanbia laknak: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11//