4. Abraham Sin Pathian Biatiam

Buanchukcho in kum tampi hnu ah, vawleicung ah mi tampi an hung um i, an zate in holh khat an rak hmang. Pathian nih a fial hna ning te in an tefa le hrinsor in vawlei cu khahter ding an si nain an i pumkhawm i khuapi an rak dirh.

An i uah tuk hringhran i Pathian chimmi bia cu zei ah an rel lo. Van a tawng kho ding tunginn sang pi sak hram an i thawk. Cuti hmun khat i sual rian an ṭuanṭi lengmang ahcun sualnak phun tam chinchin an tuah lai, ti cu Pathian nih a hmuh cia cang.

Cu ruang ah Pathian nih an holh cu holh phun tampi ah a ṭhenpiak hna i vawleicung khuazakip ah a ṭhek dih hna. Sak an thawkmi khua cu Babel ti a si, a sullam cu “buai” tinak a si.

Kum za tampi hnu ah Abram timi mipa pakhat sin ah Pathian nih bia a chim. Pathian nih a thawh i, “Na ram le na chungkhar chuah tak in ka'n hmuhsak ding ram ah kal tuah. Thlua ka'n chuah lai i, miphun nganpi ah ka'n ser lai. Na min ka lianhnganter lai i, thlua a'n chuahtu thlua ka chuah hna lai i, chiat a'n serhtu chiat ka serh hna lai. Nangmah thawng in vawleicung miphun vialte, thlua chuah an si lai," a ti.

Abram nih Pathian cu a bia a ngaih. A nupi Sarai le a sinum vialte le a ngeihchiah vialte he Pathian nih a hmuhsakmi ram, Kanan ram, kal ah aa thawh.

Abram cu Canaan a phak tik ah Pathian nih a thawh i, “Na velchum vialte kha zoh dih tuah. Na hmuh khawh ram vialte hi nangmah le na hrinsor, ro ah ka'n pek dih hna lai," a ti. Cuticun Abram cu, cuka ram ah cun khua a sa.

“Na hrinsor cu miphun nganpi ah ka ser hna lai i keimah cu nan Pathian ka si lai. Thlua a'n chuahtu thlua ka chuah ve hna lai i chiat a'n serhtu chiat ka serh ve hna lai. Vawleicung miphun vialte hi nangmah thawng hin thlua chuah an si lai,” a ti. Cun Pathian nih Abram cu biatiam hmelchunhnak ah a chungkhar pa vialte an cuarpar tan ding in a chimh fawn. Abram nih cu bia cu a ngaih.

Abram cu Pathian a zum. Pathian biatiam a zumh ruang ah Abram cu Pathian nih mi dingfel a si a ti. Nain buaibainak pakhat a hung um. Abram le a nupi cu tefa an ngei kho lo. Cucaah zeiti hmanh in Abram cu miphun nganpi pa si kho a si lo, nain Pathian biatiam cu zum in zumhnak he an hngak rih ko.

Ni khat cu, Abram cu Cungnung Bik Pathian tlangbawi Melkhizedek he an i tong. Melchizedek nih Abram cu thluachuah a pek i, “Cungnung Bik Pathian, van le vawlei a ngeitu nih Abram cu thlua chuah ko seh,” a ti. Cun Abram nih Melkhizedek cu a ngeih vialte i cheu hra cheu khat a pek.

//Baibal tuanbia laknak: Genesis 11-15//