34. Jesuh Nih Tuanbia Dangdang A Chimh Chap Hna

Jesuh nih Pathian Penram kong tuanbia dangdang tampi an chimh hna. A thawh hna i, “Pathian Penram cu mipa nih a lo ah a tuh mi anttam ci bantuk a si. Ci a si lio ah cun ci vialte lak i ci hme bik a si.”

“Nain a hung tthan tikah cun dum thlaikung vialte lak ah kung ngan bik a hung si i, a bawrh lak ah va nih bu sernak ding tlak in a hung ngan kho,” a ti hna.

Jesuh nih tuanbia dang pakhat a chimh tthan hna, “Pathian Penram cu minu pakhat nih changvut nawnmi ah thilnu a cawh i, cu chawngnawn cu a zate in a thawhter dih bantuk a si.”

“Pathian Penram cu lo chung ah thuh mi suingun, minung pakhat nih a hmuh i a phum zau tthan mi bantuk a si rih. Aa lawmh tuk ah, a ngeih thil vialte a zuar dih i, cu lo cu a cawk,” a ti.

“Pathian Penram cu lungvar mansung taktak a kawl mi lungvar chawletpa bantuk a si. Lungvar mansung tuk hringhran a hmuh tikah a ngeih thil vialte a zuar i cu lungvar cu a cawk,” a ti.

Cun Jesuh nih anmah thil ttha tuahmi ah aa lunghmuih ngai i midang zei i a rello mi hna kong tuanbia a chimh hna. “Minung pahnih Biakinn i thla cam ah an kal. Pakhat cu ngunkhuai khawltu a si i, adang pakhat cu biaknak hruaitu a si.”

“Biaknak hruaitu nih cun hitihin thla a cam, ‘Maw Pathian, kaa lawmhnak cu, kei cu midang pawl bantuk ka si lo mi hi a si —mifir, mi eihmuar hmang, horduhzuncuai pawl, silole khi ngunkhuai khawlpa bantuk hoihna khi ka si lo.’”

“‘Zarh khat ah vawi hnih rawl ka ul i ka hmuh tthen za khat chung in tthen hra ka'n pek,’ a ti.”

“Nain ngunkhuai khawltu pa cu lam hlat nawn ah khin a dir i, van hmenh a cau ngam lo, a ttang aa cum i thla a cam, ‘Maw Pathin, kei misual hi vel run ka ngeih ko sawh,’ a ti.”

Cun Jesuh nih a thawh hna i, “Biatak ka'n chimh hna, biaknak hruaitu pa si lo in ngunkhuai khawltu pa tu ngaihthiam in inn ah a ttin. Amah le amah aa chuang mi cu tthumh an si lai, nain amah le amah aa tangchia mi cu cawisanh an si lai,” a ti.

//Baibal tuanbia laknak: Matthew 13:31-33, 44-46; Mark 4:30-32; Luke 13:18-21; 18:9-14//