13. Israel Sin I Pathian Biatiam

Pathian nih Israel miphun cu Rili Sen chung in a hruai hna hnu ah, Sinai timi tlangram ah thetseram ramkaro lak in a kalpi hna. Cu tlang cu Moses nih burbuk kang lio mi a rak hmuhnak kha a si. Israel mi hna nih tlang hram ah an puaninn an i sak cio dih.

Pathian nih Moses le mi vialte cu a thawh hna i, “Ka bia nan ngaih i ka biatiam nan zulh ko ahcun ka sunhlawihmi ka minung, tlangbawi penram le miphun thiang nan si lai,” a ti hna.

Ni thum hnu ah, thlarau nun in mi vialte an i timhtuah dih hnu ah, Pathian cu Sinai tlang par ah khuari le mimtlau le meikhu le muko tum thawng pi he a rung ṭum. Moses lawng tlangpar ah kai sianh a si.

Cun Pathian nih biatiam a pek hna i, “Keimah cu nan Yahweh, nan Pathian, Izip ram i salsinak in a'n khamhtu hna ka si. Pathian dangdang cu nan bia hna lai lo.”

“Milem i serh hlah u, bia fawn hna hlah u, zeicahtiah Keimah, Yahweh, cu nahchuahhmang Pathian ka si. Ka min hi zeirellonak in hmang hlah u. Sabbath ni cu ni thiang in hmang zungzal u. Nan rian vialte ni ruk chung ah ṭuan dih u law, a ni sarihnak ni cu keimah hngalhṭhan ding in dinh ni ah hmang u.”

“Nan pa le nan nu upat hna u. Lai nawng hlah u. Nupasualnak tuah hlah u. Fir hlah u. Lih bia chim hlah u. Nan innpa a nupi, a innlo, silole a ngeihmi zeipoh hngar hlah u,” tiah a ti hna.

Cuticun Pathian nih Nawlbia Pahra cu lungphek pahnih ah a ṭial i Moses a pek. Phungbia le zulh awk phung dangdang tampi zong Pathian nih a pek fawn hna. Mi hna nih a nawlbia an zulh ko ahcun thlua a chuah hna lai kong le a kilven hna lai kong Pathian nih bia a kamh hna. Mi nih nawlbia an zulh duh lo ahcun, Pathian nih dan a tat hna ding a si.

Pathian nih Israel miphun cu sakter a duhmi hna thlam pakhat sakning kong vialte a chimh dih hna. Cu thlam cu Tonnak Thlam tiah auh a si i, khaan hnih a ngei, cu khaan hnih cu puanzar nganpi nih a dan. Puanzar hnulei khaan cu Pathian umnak a si ruang ah tlangbawi zik lawng luh sianh a si.

Pathian phungbia a zul lo mi poh nih Tonnak Thlam hmai i biakṭheng ah saram an rak put i Pathian sinah i thawinak an tuah. Tlangbawi nih saram cu a thah lai i biakṭheng cung ah a khangh lai. Thawinak i hmanmi saram thisen nih thawinak a tuahtu a sualnak cu a khuh i Pathian mithmuh ah a thianter. Pathian nih Moses naupa Aaron le Aaron i a hrinsor hna cu a tlangbawi ah a thim hna.

Mi vialte cu Pathian i a pek mi hna nawlbia zul ding in, Pathian lawnglawng bia ding in, le a miphun khunhlei si ding in an lungtling ko. Nain cuti Pathian nawl zul ding i an i tiamkam tlawmpal ah fak tuk in an sual.

Ni tampi chung Moses cu Sinai Tlang par ah a um i, Pathian he an i chawnbia. Mi hna nih cun a rak kir an hngak kho ti lo. Cucaah Aaron sin ah sui an rak put i milem serpiak ding in an nawl!

Aaron nih cawfa he i lo in sui milem a serpiak hna. Mi hna nih cu serchom milem cu an biak i a hmai ah thawinak an tuahl! Cuti an sual tuk ruang ah Pathian cu a thinhung tuk i hrawh a timh hna. Nain Moses nih thla a campiak hna i a thlacam cu Pathian nh a ngaihpiak ruang ah a hrawk hna lo.

Moses cu tlang cung in a rung ṭum i milem cu a hmuh tikah a thinhung tuk hringhran i Pathian nih Nawlbia Pahra a ṭialnak lungphek cu a khuai dih hna.

Cu dih in milem zong cu sop cikcek in a den i, cuti a sopmi a dip cu ti ah a thlak i, cu ti cu mi vialte a dinter hna. Pathian nih chiat a tlunter ciammam i mi tampi an thi.

Cun Moses cu tlang ah a kai ṭhan i mi hna cu Pathian nih a ngaihthiam hna ding ah thla a hung cam. Pathian nih Moses thlacam cu a ngaihpiak i mi hna i an sualnak cu a ngaihthiam hna. Moses nih a khuaimi lungphek airawl ah lungphek thar ah Nawlbia Pahra cu a ṭial ṭhan. Cun Pathian nih Israel miphun cu Sinai Tlang in Kamh Ram lei ah a hruai hna.

//Baibal tuanbia laknak: Exodus 19-34//