32. Jesuh Nih Khuachia Tuahmi Pa le Midamlo Nu A Damter Hna

Ni khat cu, Jesuh le a zultu cu Gerasenes ram kal ding ah Galilee Rili tan in an kal.

Rili khattelei ral an phak tikah, khuachia nih a tuahmi pakhatpa Jesuh sin ah a rak tli.

Cu pa cu a tthawng tuk i ho hmenh nih an tlai kho tawn lo. Cikcin tehna tiang hmang in an hrenttem len ko nain a chah dih tawn.

Cu kaa hmun thlanhmun lak ah a um tawn. Chunchun zanzan a aukhuang tawn. Thilpuan hruk lo pi in a um i, amah le amah lung zumhar in aa chun aa aat.

Cu pa cu Jesuh sin i a rat tikah, a hmaika ah a khuk aa bil i a kun. Jesuh nih, “Khuachia, mah pa chung hin chuak!” tiah a ti.

Khuachia nih a ttemttawnmi cu pa cu aw thang pi in a hun au i, “Jesuh, Cungnung Bik Pathian Fapa, zeitin dah tuah na ka duh? Zaangfah tein ka hrem sawh hlah mu!” tiah a ti. Jesuh nih mipa cu, “Na min ho?” tiah a hal. “Ka min cu Ralkapbu ti a si ko, tampi kan si,” tiah a leh. (Ralkapbu ti tikah ralkapbu thong 6 hrawng tiang komhmi bu, tinak a si.)

Khuachia rual nih cun Jesuh cu an thawh i, “Zaanfahtein hi hmun hin rak kan tthawl sawh hlah!” tiah an nawl. Cu hmun pawng tlangram ah cun vok rual an vak len ko. Cuca'h khuachiarual nih cun Jesuh cu, “Zaangfah te in vok chung tu ah hin kan luhter ko sawh!” tiah an nawl. Jesuh nih, “Va lut u!” a ti hna.

Khuachia rual cu mipa chung cun an chuak i vok chung ah cun an lut. Vok cu tlangram vampang in an zuang i rili chung ah an tla. Vok cu an zate ah 2,000 hrawng an si.

Vok cawng pawl nih zei dah a cang, ti an hmuh tikah an tli i mi kip sin ah Jesuh nih a tuahmi kong cu an chim. Khua chung in mi vialte cu an rak chuak i khuachia nih an rak tuahmi pa cu an hmuh. A rak tthu ko, thilpuan aa hruk, a umtu zoh ah mi kelte bantuk a si ko.

Mipi cu an thinphang tuk i Jesuh cu kal zau ding in an nawl. Cuca'h Jesuh cu lawng chung ah a lut and kal aa tim. A damter mi pa nih Jesuh cu a sin i kal ve ding in a nawl.

Nain Jesuh nih a thawh i, “Inn tu ah va tlung law na hawikom le na chungkhat sin ah Pathian nih zeibantuk thil lianngan dah a'n tuahpiak le zei tluk in dah vel a'n ngeih kong va chim hna,” a ti.

Cu ruang ah mipa cu a kal i Jesuh nih a tuahpiakmi kong cu mi kip a chimh hna. Cu thilcang kong a thei mi poh an khuaruahhar an lung a arr dih.

Jesuh cu Galilee Rili khattelei ral ah a rak kir tthan. A velchum ah mibupi an rak ra i an i tenhchih lulhmalh. Cu mibupi lak ah cun kum hleihnih chung a thi a chuak mi nu pakhat a um ve. A damnak ding ah phaisa tampi hmang in damhthiam sibawi aa zohter tawn ko nain a zual chin leilei.

Jesuh nih midamlo tampi a damter hna ti a theih tikah a lung chung te in, “A puan ki te tal tawng kho ninglaw ka dam ko ttung hnga mu!” a ti. Jesuh hnulei in a rak i tenh ve i a puan cu a tawngh. Jesuh a tawng lecangka a thi cu a chuak ti lo!

Mah lecangka Jesuh nih a sin in a thiltikhawhnak a chuah a hun hngalh. Aa mer zau i, “Ho dah a ka tawng?” tiah a hal hna. A zultule nih, “Jesuh, na pawng ah minung an tam tuk hringhran hi an i tenh an i eng. ‘Ho dah a ka tawng?’tiah cun zeitin dah bia na kan hal khawh ning a si?” tiah an ti.

Minu cu Jesuh hmai ah a khual aa bil i, thengphang ngai in a um. Cun biadik vialte cu a chimh dih. Jesuh nih a thawh i, “na zumhnak nih a'n damter. Daihnak nih in umpi sehlaw na damlonak in va thing cang ko,” a ti.

//Baibal tuanbia laknak: Matthew 8:28-34; Mark 5:1-20; Luke 8:26-39//