28. Kumo Mirum Ukbawipa

Ni khat cu, Jesuh sin ah kumno mirum ukbawipa pakhat a rak ra i, “Cawnpiaktu ttha, zungzal nunnak ngeihnak ding ah zei thil ttha dah ka tuah lai?” tiah bia a hal. Jesuh nih, “Zei tuang ah dah a ttha mi ah na ka chiah? A ttha mi cu Pakhat lawnglawng pei a um ko cu, cu cu Pathian a si. Zungzal nunnak na duh ahcun Pathian phungbia ta na zulh ko hna lai,” a ti.

“Zei bantuk phungbia dah?” tiah a hal. Jesuh nih, “Lai nawng hlah. Nupasualnak tuah hlah. Fir hlah. Lih chim hlah. Na pa le na nu upat hna, cun nangmah le nangmah naa dawt tluk in na innpa va daw,” tiah a leh.

Kumnopa nih cun, amah a dik kong i langhfianternak pah ah, “Hi phungbia pawl cu ngakchia te ka si lio in ka zulh dih cang hna. Zei tuah rih dah ka herh lai?” tiah a hal. Jesuh nih dengteo in a zoh i a dawt.

Jesuh nih a thawh i, “Tlamtlin na duh ahcun kal law na ngeihmi vialte zuar dih law tangka cu sifak ve tthen hna, cun vancung ah chaw na ngei lai. Cun ra law rak ka zul,” a ti.

Kumnopa nih cu bia a theih tikah, a ngaihchia tuk hringhran i, a ruang cu amah cu a rum ngai. Jesuh sin in aa mer i, lodiam a kal, a chawva sungh dih lai a ruat kho lo.

Cun Jesuh nih a zultule cu a thawh hna i, “Mirum hna ca i Pathian Penram chung luh a va har lai ning hi! A si, mirum pakhat i Pathian Penram chung luh nakin tthim awng chung i kalauk luh a fawi deuh lai,” a ti hna.

Zultu hna nih cu bia an theih tikah an lau tuk i, “Ho dah khamh a si kho kun lai?” an ti.

Jesuh nih a zoh hna i, “Minung leikap cun hi hi a si kho lai lo, nain Pathian keikap cun, zeizongte a si kho dih ko,” a ti hna.

Peter nih Jesuh cu a thawh i, “Zeizongte kal tak in kan in zulh. Zei lawmman dah kan hmuh awk a si lai?” tiah bia a hal.

Jesuh nih, “Kan min ruang ah a innlo, a unau, a ttale le a farle, a pa, a nu, a fale, silole a ngeihchiah a kal tak mi nih cun hi hnu vawlei thar ah a let 100 tam in le zungzal nunnak an co lai. Hmasa bik a simi mi tampi cu a hnu bik an si lai i, hmanung bik tu hmasa bik an si te lai,” tiah a ti.

//Baibal tuanbia laknak: Matthew 19:16-30; Mark 10:17-31; Luke 18:18-30//