42. Jesuh Cu Vancung Ah A Tlung

Cu ni zanlei sang ah, Jesuh zultu pahnih cu lamnaih khua pakhat ah an kal. Cuti an kal pah cun, Jesuh thihnak kong le nurual nih a nung an ti kong an i ruah. Jesuh cu Messiah a si taktak ko hnga maw, ti an ruat.

Cu ah cun Jesuh cu a phan ve an sin cun a kal ve, nain ho a si an hngal lo. Zei kong dah an i ceih kong a hal hna i, annih nih a luancia ni zeimaw zat lio te chung lungbar thilcang pawl kong an chimh. Cu bantuk kong a thei rih lo mi khual sawhsawh ah an ruah.

Cun Jesuh nih Messiah kong Pathian Bia i a chimmi a cawnpiak hna. Profet pawl nih Messiah cu a a ingtuar lai i thah a si lai, nain ni thumnak ni ah a tha tthan lai an rak timi kong a hngalhter tthan hna. An kalnak khua an phanh ah cun khua a mui deng cang.

Cu pa pahnih nih cun Jesuh cu an sin i riak ding in an sawm i Jesuh cu an sin ah a riak ve. Rawl an ei hlan ah, Jesuh nih chang hlum hlum khat a vun i lak, Pathian sin ah lawmhnak a chim dih in a cheu. Cu ah cun duak tiah an mit a hung dei i Jesuh a si an hun hngalh. Cu ah cun Jesuh cu a lo colh ve.

Pa pahnih nih cun an i thawh i, “Pathian Bia a kan cawnpiak ah khan kan thinlung pei phundang pi in a um khe tak kha!” an ti. Cu lecangka Jerusalem ah an kir zau i, lamkal pawl cu, “Jesuh a nung! Amah mipum hrimhrim kan hmuh!” tiah an va chim hna.

Cu ah cun lakhruak pi in Jesuh cu a lang! Lamkal pawl nih mithla ah an ruah, nain Jesuh nih a thawh hna i, “Nan cung ah daihnak um ko seh! Zei ruang ah dah ttihphang le lungawttawm in nan um? Ka kut le ka ke hi zoh tuah u. Mithla nih cun keimah bang hin tampum an ngeih khawh ttung lo,” a ti hna. Mithla a si lo an fiannak hnga nga hmin cia a hal hna i a ei.

“Pathian Bia nih ka kong a chimmi vialte a tling dih lai, tiah ka'n ti ko hna kha,” tiah Jesuh nih a ti hna. Cun an thinlung innka a hunpiak hna i Pathian Bia cu an theihthiam. A thawh hna i, “Messiah cu a teem lai i a thi lai, cun ni thumnak ni ah tihnak in a thotthan lai, tiah hlan lio pi in rak ttial a si cang.”

“Cun sual ngaihthiamnak ca i ngaihchihnak kong zong Jerusalem in i thawk in mi vialte sin ah chimthanh a si lai, ti zong aa ttial rih. Hi thil vialte kong ah nannih cu biahngaltu nan si,” a ti hna.

Cu hnu ni sawmli chung ah, Jesuh cu a lamkal hna sin le a zultu hna sin ah vawi tampi a lang. Vawi khat hoihna cu minung 500 hmun khat te i an umtti lio ah a lang! Amah cu a nung hrimhrim ko, ti hi a lamkal pawl sin ah lam tampi in a langhter i annih cu Pathian Penram kong a cawnpiak hna.

Ni sawmli a dih hnu ah, Jesuh nih a lamkal pawl cu a thawh hna i, “Vancung le vawlei i nawlngeihnak vialte pek ka si cang. Cuca'h kal u law mi vialte lamkal ah va ser hna u, Pa le Fapa le Thing Thlarau min in tipilnak pe hna u law, ka'n chim mi hna vialte hi an zulhnak lai cawnpiak hna u.”

“Cun hi hi philh hlah u. Nan sin ah ka um camcin lai. Cunglei in tthawnnak nan hmuh hlan chung cu Jerusalem ah um ko u,” a ti hna. Cun Jesuh cu vancung ah lak a si, minmei nih a phenh ruang ah an hmu kho ti lo. Jesuh cu zeizong vialte cung i uktu si ding in Pthian awrh lei ah a hung tthu.

//Bibal tuanbia laknak: Matthew 28:16-20; Mark 16:12-20; Luke 24:13-53; John 20:19-23; Acts 1:1-11//