19. Profet Hna

Israel miphun tuanbia caan chung vialte, Pathian nih profet a rak pek hna. Cu profet hna nih Pathian sin in bia an theih i, cu Pathian bia cu mizapi an rak chimhchin hna.

Ahab nih Israel ram i siangpahrang a rak ttuan lio ah Elijah cu profet a rak si. Ahab cu siangpahrang sual ngai a si i, a rammi hna cu Baal timi pathian deuh a rak biakter hna. Elijah nih Ahab cu a thawh i, “Keimah nih ka umter hlan chung poh cu Israel ram ah ruahti silole dapti a um kho lai lo,” a ti.

Cun Pathian nih Elijah cu tiva pakhat kam i ramkaro ah va i thup ding in a chimh. Zing fatin le zanlei fatin va nih chang le sa an rak put tawn. Ahab le a raldo pawl nih Elijah cu an i kawl sek, nain an hmu kho lo. Khuakhen cu a zualcei tuk i tiva ti zong cu a reu dih.

Cu ruang ah Elijah cu a pawng ram pakhat ah aa tthial. Nuhmeinu pakhat le a fapa te, mangttam ruang i ei awk tlawmte lawng a ngeimi an um. Cu hna nufa nih cun Elijah cu an rak zohkhenh i, Pathian nih cu hna nufa an changvut chiahnak umpu le an chiti chiahnak thawl cu reu ballo in a tuah. Mangttam chung vialte ei awk an ngei camcin ko. Elijah cu cu kaa ah sau ngai a caam.

Kum thum hnu ah Pathian nih Elijah cu a auh i, ruah a surter cang lai ruang ah Israel ram ah va kal i Ahab va chawnh ding in a chimh. Ahab nih Elijah cu a hmuh lecangka, “Nangmah maw na si, harbuai chuahpitu pa!” a rak ti. Elijah nih a thawh ve i, “Nangmah dahkaw harbuai chuahpitu cu na si hi! Pathian dik na hlawt riangmang i Baal tu na hei biak. Israel mi vialte pum hna law Carmel Tlang ah rak ra u,” a ti.

Israel mi vialte cu, Baal profet 400 rual zong tel chih in, Carmel Tlang ah cun an ra. Elijah nih a thawh hna i, “Zei can riamruam dah lungrep ngei lo in nan um rih lai? BAWIPA cu Pathian a si ko ahcun Amah cu rian ko u! Baal cu Pathian a si, nan ti le amah cu rian ko u!” a ti hna.

Cun Baal profet pawl cu a thawh hna i, “Cawtum pakhat in that u law raithawinak tuah u, nain mei in khang hlah u. Kei zong nanmah na tuah bantuk in ka tuah ve lai. Kan hal veve lai i, mei petu Pathian cu Pathian taktak a si lai,” a ti hna. Cuticun Ball profet pawl nih raithawinak cu an timhtuah, nain mei in an khang lo.

Cun Baal sin ah thla an cam, “Maw Baal, kan thlacamnak rak kan ngaihpiak tuah!” an ti. Chunnitlak thla cu an cam, an au, an namte in anmah le anmah an i chun an i at, nain an thlacam cu Baal nih a let hna lo.

Zanlei pi ah Elijah nih Pathian sin ah raithawinak cu a tuah ve. A raithawinak sa, thing, le biakttheng kam hrawng vawlei vialte tiang in, umpu ngan pipi pu hleihnih khat ti in ciap cikcek in a toih dih.

Cun Elijah cu thla a cam, “Maw BAWIPA, Abraham, Isak, le Jacob Pathian, nihin hrimhrim ah hin Nangmah cu Israel Pathian na si le keimah zong Nangmag riantu ka si hi run langhter tuah. Hi mi hna nih Nangmah cu Pathian na si an hngalh khawh nak hnga ka thlacam ka let tuah,” a ti.

Cuti thla a cam lecangka, van in mei a rung tla i sa le thing le lung le biakttheng umnak vawlei tiang in a kang dih. Cu cu mi vialte nih an hmuh tikah vawlei ah an bok i, “BAWIPA cu Pathian a si! BAWIPA cu Pathian a si!” an ti.

Cun Elijah nih, “Baal profet vialte kha tlai dih hna u, luatter hna hlah u!” a ti hna. Cucaah Baal profet pawl cu an tlaih dih hna. Elijah nih aa kalpi hna i a va thah dih hna.

Elijahnih Siangpahrang Ahab cu a thawh i, “Khua ah rak kir zau tuah, ruah a sur cang lai,” a ti. Tlawmpal ah van a nak, khua a dawm i ruahpi cu a thlet in aa thle. Pathian nih khuakhen cu a donghter i Amah lawnglawng Pathian a si a fianter.

Elijah hnu ah Pathian nih Elisha cu A profet ah a thim. Elisha hmang in Pathian thil maksak tampi a tuah. Vawi khat cu, Israel an ral a simi ralbawipa Naaman, ttihnung ngai a simi vun zawtnak thinghmui hma nih a tlunh. Elisha kong cu a theih i, Elisha i damh ding in a sin ah a kal. Elisha nih Jordan Tiva ah vawi sarih i hnim ding in a chimh.

A chim ka ah cun Naaman cu a thinhung i Elisha chimmi cu a tuah duh lo. Nain a hnu ah a lung aa thleng i, Jordan Tival ah vawi sarih a va i hnim. Vawi sarihnak aa hnim dih ah a zawtnak cu a thiang dih hirhiar! Pathian nih a zawtnak a damh.

Profet dang tampi an um rih. An zate nih rammi hna cu siasal bia lo ding le diknak le dawtnak langhter zungzal ding in an chimh hna. Rammi hna nih an sualnak an i ngaihchih lo i nawlngai tein an nun lo ahcun, Pathian biaceih an tong lai i dantat an huah lai kong profet pawl nih ralrin an pek zungzal hna.

Vawi tampi cu mi nih an bia an ngai duh hna lo. Ral zoh in an zoh hna i, cheukhat hoihna cu an thah hna. Vawi khat cu, profet Jeremiah cu thi te seh, tiah ti umlo tikhor pakhat chung ah an thlak. Tikhor ne nawncek lak ah a vung tla, nain siangpahrang nih a zaangfah i a thih hlan ah a chanh manh.

Cuticun profet pawl cu huat an tong ko nain, Pathian bia chim cu an ngol hlei lo. Mipi cu an sual ngaihchih lo i an um rih ko ahcun hrawhhralh an si lai kong ralrin an pek hna. Cun Pathian Messiah rat te ding biakam kong hngal peng ding in mipi cu an chimh lengmang fawn hna.

//Baibal tuanbia laknak: 1 Kings 16-18; 2 Kings 5; Jeremiah 38//