27. Samaria Miphun Mi Ttha Pa Kong

Ni khat cu, phungbiathiampa pakhat Jesuh cu hneksak duh ah a rak ra i, “Cawnpiaktu, zungzal nunnak co ding ah zei dah ka tuah awk a si?” tiah bia a hal. Jesuh nih a thawh i, “Pathian phungbia chung ah zei dah aa ttial?” tiah a hal.

“Bawipa na Pathian cu na thinlung, na thazang, na khuaruahnak dihlak in na dawt lai. Cun, na innpa cu nangmah le nangmah naa dawt tluk tein na dawt lai,” tiah phungbiathiampa nih cun a leh. Jesuh nih, “Na dik tuk! Cu cu tuah law, na nung lai cu,” a ti.

Nain phungbiathiampa nih a dik le diklo fian duh ah, “Kan innpa cu ho dah a si?” tiah a hal chap.

Jesuh nih tuanbia pakhat chimh pah bu in a leh. “Vawi khat cu Judah mipa pakhat, Jerusalem in Jeriko lei ah khual a tlawng.”

“Cuti khua a tlawn lio ah cun, mifirsual rual phu khat nih amah cu an tlaih. A thil vialte an lakpiak dih in thideng in an an tukvelh tak. Cun lodiam an kal.”

“Cu tlawmpal ah, Judah tlangbawi pakhat cu kaa lam cun a rak ra ve. Cu biaknak hruaitu pa nih cun, a thil vialte chuh dih mi le velh mi pa cu a hmuh in, lam khatleipang in a hrial i, cuti bawmh a herh ngai pa cu hramh ta lo in, a lanh tak diam aisawh.”

“Cu hnu tlawmpal ah, Levi miphun pa pakhat cu kaa lam ah cun a rak ra ve. (Levi miphun cu Biakinn i tlangbawi pawl a bawmtu Judah miphun phun khat an si.) Levi mipa zong nih cun khattalei kam in a hrial i, a thil chuh dih mi le velh mi pa cu hramh ta lo in a kal tak ve.”

“A hnu ah cu kaa lam i a rak ra mi pa cu Samaria miphun a si. (Samaria miphun cu Judah miphun le miphun dang cawh hrinsor an si. Samaria miphun le Judah miphun cu an i hua.) Samaria pa nih mipa cu a a hmuh tikah zaangfahnak in a khat. A vun khinhhramh i a hma tehna zong a menpiak.”

“Samaria pa nih cun cu pa cu a la cung ah a chuan i, riahbuk pakhat ah a kalpi i a cawnghhramh.”

“A thaizing cu, Samaria pa cu a khuallam peh ding cu si kaw. Riahbuk zohkhenhtu pa cu phaisa zeimawzat a pek pah in, ‘Mah pa hi run zohkhenh law, hi phaisa nih a zat lo a si le na dih mi zat cu ka kir lei ah ka'n cham te ko lai,’tiah a ti.”

Cun Jesuh nih phungbiathiampa cu a thawh i, “Mah minung pathum ah hin a ho dah a thil an chuh dih mi le an velh mi pa i a innpa cu a si hnga, tiah na ruah?” tiah a hal. Phungbiathiampa nih, “Velngeihnak a langhtertu pa ta a si ko lai,” tiah a leh. Jesuh nih phungbiathiampa cu a thawh i, “Nang zong cu bantuk cun va tuah ve,” a ti.

//Baibal tuanbia laknak: Luke 10:25-37//