17. David Sin I Pathian Biatiam

Saul cu Israel siangpahrang hmasa bik a si. Israel miphun duh ning bang a khan a sang i a chuakthiam ngai. A hramthawk ah cun Saul cu rinhcanh tlak ngai a si ko nain, a hnu ah cun mitthalo ngai, Pathian bia a ngai lomi ah a hun i chuah ruang ah amah airawltu ding siangpahrang ah Pathian nih mi dang a thim.

Cu pa min cu David a si. Amah cu tukhal a si. Tu a khalh lio ah a tu sehtu chiandeih pakhat le vom pakhat David nih a thah hna. David cu mi toidor le mi ding, Pathian a ttihzah i aa bochanmi pa a si.

David cu ralkap tthawng le hruaitu lianngan a si. David cu a no lio ah, Goliath timi mi nganpi a rak doh. Goliath cu raltuk cawnpiakmi, a tthawng ngaimi a si i, pe kua dengmang sang a si. Nain Pathian bawmhnak thawng in David nih Goliath cu a thah i Israel cu a khamh.

Saul nih David cu a nahchuah i vawi tampi thah a timh. Ni khat cu Saul nih David cu thah awk ah a kawl. David aa thuhnak lungkua ah Saul cu a va lut. David nih Saul cu rak that lo in, a thilpuan tu a hleh i, siangpahrang si ruah ah thah a timh lo ding kong a langhter.

A donghnak ah cun, Saul cu raltuknak ah a thi i, David cu Israel siangpahrang a hung si. Amah cu siangpahrang ttha, mipi nih duh ngaimi a si. Pathian nih David cu thlua a chuah i hlawhtlinnak a pek. David cu ral tampi a tu i Pathian nih teinak a pek. David nih Jeruslem a lak i khualipi ah a ser. David uk lio chan ah Israel cu a tthawng a rum ngaingai.

David nih mi vialte nih Pathian an biak i raithawinak an tuah khawh nak hnga biakinn pakhat sak a duh. Moses nih a rak sakmi Tonnak Thlam chung ah kum pi kum 400 chung Israel miphun nih Pathian an biak i raithawinak an tuah.

Pathian nih David sin profet Nathan a thlah i, “Nangmah cu ral a tumi na si ruang ah hi inn hi na ka sakpiak kho lai lo; na fapa nih a run sak te lai. Nain nangmah cu thluachuah tampi ka'n pek lai. Nangmah ciruang chung in pakhat cu Israel siangpahrang tthutnak tthutdan ah a tthu zungzal lai. Cun Messiah cu nangmah hrinsor chung mi a si lai!” tiah a chimhter. Messiah timi cu vawlei hi sualnak in a khamhtu ding Pathian Thimmi tinak a si.

David nih hi bia a theih tikah, Pathian cu a lawmh a tthangtthat colh, zeicahtiah Pathian nih David cu a liannganmi upatnak le thluachuah tampi a kamh. Israel miphun nih Messiah rat ding cu caan sau ngai, kum pi kum 1,000 dengmang hngah ding an si.

David nih dinnak le zumhtlak sinak he in ram cu kum tampi chung a um i, Pathian nih thlua a chuah. Nain a chan donghnak lei ah, Pathian hmai ah sualnak ngan tuk hringhran a tuah.

Ni khat cu a raldo pawl raldohnak i an kal lio ah, David cu chunhnu i a ihzaunak in a tho i, nu dawh ngai pakhat, ti aa kholh lio mi a hei hmuh. Cu nu min cu Bethsheba ti a si.

Hmun dang ah mer tak ko lo in, cu nu cu David nih a auhter hna. Cu nu cu a ihpi hnu ah inn ah a ttinter. Cu hnu tlawmpal a rauh ah, Bethsheba nih fa a pawi kong David cu thawng a thanh.

Cu nu vap, Uriah, cu David ralkap lak i rinhcanhtlak bik pakhat a si. David nih Uriah cu rallam in a auh i a nupi sin i um ding in a chimh. Nain ralkap dang vialte rallam i an um lio i inn i tlun ding cu Uriah nih a duh lo. Cucaah David nih Uriah cu raltuknak ah a kalter tthan i rallam ah thi te seh, tiah ral hratnak bik ah a chiah.

Uriah a thih in David nih Betthsheba cu a tthit. A hnu ah Bethsheba nih fapa a hrin. David nih a tuahmi kong ah Pathian cu a lung aa lawm lo i, cucaah profet Nathan cu David a sualnak langhter ding ah a thlah. David cu a sual a ngaichih i Pathian nih a ngaihthiam. Cu hnu a chan chung vialte, zeitluk har lio caan zong ah David nih Pathian cu aa bochan zungzal ko.

Nain a sual ruang ah David cu dantat a si, a fapa te cu a thi. Mah leng ah David cu a chanchung vialte amah innchungkhar lila ah dohnak a um i, a tthawnnak a zor ngaingai. David cu Pathian sinah zumhtlaklo in a um nain Pathian tu cu a biakam ah zumhawktlak in a um tthiamtthiam rih ko. Bethsheba nih fapa pakhat a hrin tthan, a min ah Solomon ti a si.

//Baibal tuanbia laknak: 1 Samuel 10; 15-19; 24; 31; 2 Samuel 5; 7; 11-12//