29. Velngeilo Mirianpa Tuanbia

Ni khat cu Peter nih Jesuh cu a thawh i, “Bawipa, ka cung ah sualnak a tuahmi ka unau cu vawi zeizat dah ka ngaihthiam awk a si hnga? Vawi sarih tiang maw?” tiah bia a hal. Jesuh nih, “Vawi sarih lawng hlah e, vawi sarih i a let sawm sarih tiang ta!” tiah a leh. Hi bia in Jesuh nih a chim duhmi cu, mi kan ngaihthiam zungzal hna lai, tinak a si ko. Jesuh nih tuanbia pakhat a chimh rih hna.

“Pathian Penram cu a mirian hna sin i leiba kong a tawlreltu siangpahrangpa bantuk a si. A mirian hna lak in pakhat nih kum thong 200 chung ttuan leiba tawrcheng a bat.”

“Leiba cu cham kho ti hlah kaw, siangpahrang nih a thawh i, ‘Hi pa le a chungkhar hi an zate zuar dih i leiba chamnak ah hman ding an si,’ a ti.”

“Mirianpa cu siangpahrang hmai ah a khuk aa bil i, ‘Zaangfah tein ka zawn ka ruat rih ko, ka'n pek dih te ko lai,’ tiah a nawl. Siangpahrangpa nih mirianpa cu a zaangfak i, a leiba vialte cu a awlhpiak dih.”

“Cu mirianpa cu a kal i, amah cu thla li chung ttuan leiba a batu mirian dang pakhat a va hmuh. Cu pa cu a hrum in a dih i, ‘Na ka batmi leiba atu ka cham!’a va ti.”

“Cu pa cu a khuk aa bil i,‘Zaangfah tein ka zawn ka ruat rih ko, ka'n cham dih te ko lai,’ a ti. Nain cu mirianpa nih cun a bia cu a la duhh lo i, cu pa cu leiba aa chamter khawh tiang thong ah a thlak.”

“Mirian dang cheukhat pawl nih cu thil a can ning an hmuh tikah an lung a nuam lo tuk. Siangpahrangpa sin ah an kal i thilsining vialte an chimh dih.”

“Siangpahrangpa nih mirianpa cu a auh i,‘Ziatthalo pa! Na ka nawl i na leiba ka'n ngaihthiam dih. Cu bantuk cun na tuah ve hrimhrim awk a si,’ a ti. A thinhun in siangpahrangpa nih cun cu ziatthalo mirianpa cu leiba vialte a cham dih tiang thong ah a thlak.”

Cun Jesuh nih a thawh hna i, “Nannih zong nan thinlung in nan unau nan ngaihthiam hna lo ahcun ka chimmi bantuk cun nan cung ah vancung ka Pa nih a tuah ve ko lai,” a ti hna.

//Baibal tuanbia laknak: Matthew 18:21-35//