49. Pathian Biatiam Thar

Jesuh nu Mary cu amah Jesuh a rak chuah tiang ah nuthiang a si, zeicahtiah Jesuh cu Pathian Fapa a si. Jesuh cu minung zong a si Pathian zong a si.

Jesuh nih Pathian a si hngalhternak ah khuaruahhar thil tampi a tuah. Ti cung ah a kal, thlichia le tilet a daihter, a zaw tampi a damter hna, khuachia a chuah hna, mithi a nunter tthan hna, chang hlum nga le nga fang hnih in minung 5,000 rawl a khimter khawh hna.

Jesuh cu cawnpiaktu lianngan a si rih. Nangmah le nangmah naa dawt bang na innpa na dawt lai, tiah mi a cawnpiak hna.

Cun, na ngeihchiah vialte zong si ko seh, zeizei nakin Pathian cu na dawt bik hrimhrim a hau, tiah a cawnpiak rih fawn hna.

Jesuh nih vawleicung ah hin zeizei dang nakin khamhnak a sung bik tiah mi a cawnpiak hna.

A cawnpiaknak ah, mi vialte nih an cohlan lai lo kong le khamh an si dih lai lo kong a chim chih ko. Khamh a si lo mi cu vawlei caan dongh ni ah pumh an si lai i hell mei chung ah zungzal in thlak an si lai kong a chim.

Jesuh cawnpiak ning ah Pathian nih misual hi a dawt hringhran hna. Anmah ngaihthiam ding ah le a fale siter ding ah a duh zungzal ko.

Jesuh cawnpiaknak ah vawleimi vialte an sual dih i Pathian he an i tthen dih. Sualnak ruang ah mi kip Pathian ral an si. Pathian nih sualnak cu a huat.

Nain Pathian nih vawlei hi a dawt hringhran ca ah A Fapa ngeihchun a pek, cuticun Amah a zummi poh hell ah an kal lai lo, Amah he zungzal an umtti lai.

Na sualnak ruang ah sual in palh in na um cang. Thihnak le Pathian thinhunnak a hlawt ding na si, nain Pathian nih a thinhunnak cu Jesuh tu ah a bungh. Vailam cung i Jesuh a thih cu, na sual leiba dantat a tuar ruang ah a si.

Jesuh nih na pumpak sualnak le vawleicung pumpi sualnal vialte tlanhnak ding i soisel awk umlo le sualnak ngeilo riathawinak i thih ding aa thim. Jesuh thawng in, zei bantuk sualnak a si zong ah, sualnak poh ngaihthiam khawh dih an si.

Mizei hmanh nih thil ttha tuahnak thawng in khamh si khawh a si lo. Pathian he nan i pehtlaihnak cu na tuahmi zei hmanh nih a remh kho lo. Jesuh cu Pathian Fapa a si i, na sual thianhnak ding ah a thi i a tho tthan ti na zumh lawnglawng ah na sualnak cu ttawlthianh khawh a si lai.

Jesuh a zum i tipil a ingmi lawng khamh an si lai, nain a zumlomi cu hnon an si lai. Na rum maw na sifak, nu maw na si pa, na tar mw na no, khoi kaa mi dang na si, titehna ruah len hau a si lo. Pthian nih a'n dawt i, Amah he nan i pehtlaih khawh nak lai Jesuh na zumh ding a duhmi a si.

Jesuh cu Messiah a si, Pathian Fapa a si, ti na zum maw? Misual na si i Pathian dantatnak a huah ding na si na zum maw? Jesuh cu vailam cung ah na sual thianhnak ding ah a thi, ti na zum maw? Jesuh nih amah sin i rat, amah zumh i tipil ing ding in a'n sawm.

Hi hi na zumh ahcun nangmah cu Khrihfa na si! Pathian nih nangmah cu Setan penram muihnak chung in a'n lak i amah Pathian Penram ceunak chung ah a'n chiah cang. Thil hlun vialte an lo cang, a ruang cu Pathian nih thil vialte a tharter dih cang hna.

Khrihfa na si ahcun, Jesuh tuahmi thawng in na sualnak cu ngaihthiam a si cang. A tu ah, Pathian nih a'n zoh tikah, nangmah cu ral in a'n hmu ti lo, hawikom ttha in a'n hmuh cang.

Pathian hawikom ttha si cang hnu cun Jesuh cawnpiaknak zulh na duh ko lai. Khrihfa cu na si cang ko lai nain, sualnak he cun naa pai peng rih ko lai. Nain na sual naa phuan ngam ko ahcun Amah Pathian cu zumhtlak a si i, a'n ngaihthiam lai i sual doh kho ding in thazang a'n pek lai kong Pathian nih a chim.

Pathian nih thla cam ding, A Bia cawng ding, Khrihfa dang he Amah biak ding, Pathian nih zei dah a'n tuahpiak ti tehna midang va chimhchin ding in a'n chimh. Hi bantuk thil vialte na tuahnak thawng in Amah he nan i pehtlaihnak ah na tthang lai.

//Baibal tuanbia laknak: Romans 3:21-26, 5:1-11; John 3:16; Mark 16:16; Colossians 1:13-14; 2 Thessalonians 5:17-21; 1 John 1:5-10//