5. Biakamnak Fapa

Abram le Sarai cu kum pi kum 20 chung an hngak, nain fapa an ngei kho hlei lo. Pathian nih Abram cu fapa a ngeih lai kong le a hrinsor cu van arfi zat an si te ding kong bia a kamh than. Abram nih Pathian biakam cu a zumh.

Cun Abram cu a nupi nih a thawh i, “Kei cu Bawipa nih fa ngeih a ka sianh lo i, atu hoihna cu fa ngei ding ah cun ka tar tuk cang si kaw ka sinumnu Hagar a um ko hi ta. Amah hi nupi ah thi ve law fa a ka ngeihpiak lai cu,” a ti.

Cuticun Abram nih Hagar cu nupi ah a thit. Hagar nih fapa te a hrin i, Abram nih Ishmael tiah min a sak. Abram nih Ishmael cu Pathain thlua chuah seh, ti a duh. Pathian nih, “Thlua ka chuah ko lai, nain Ishmael cu biakamnak fapa a si lo. Amah he biakamnak ka ser lai lo.”

“na nupi, Sarai, nih fapa a hrin lai—amah cu biakamnak fapa a si lai. Isak tiah min na sak lai. Ka biakam cu amah he in a si lai i, amah miphun nganpi ah a cang te lai,” a ti. Cun Pathian nih Abram min cu Abraham ah a thlen, a sullam cu “mi tampi pa” tinak a si. Pathian nih Sarai’ min zong Sarah ah a thlen, a min sullam cu “siangpahrang” tinak a si.

A donghnak ah, Abraham cu kum 100 a hung si i Sarah zong kum 90 a si hnu ah, Sarah nih Abraham cu fapa te a hrinh. Pathian nih a chimh cia hna bantuk in Isak tiah min an sak.

Isak cu kum no patling a hung si tikah Pathian nih Abraham zumhnak cu a hneksak, a thawh i, “Na fapa ngeihchun Isak na lak lai i kan sin raithawinak ding ah na thah lai,” a ti. Pathian tuah ding a timi bia cu Abraham nih a ngaih ko.

A fapa Isak cu hri in a tem i biaktheng cung ah a chuan. Thah a vun timh bak ah Pathian nih, “Ngol! Ngakchiapa cung ah fahnak tuah hlah. Na ka tih ti ka hngalh cang ko, na fapa ngeihchun hmanh pek sian lo in na ka um lo,” a ti.

Abraham nih a pawng burbuk lak ah tukawng pakhat a ki in a taan a hmuh. Pathian nih raithawinak ah Isak si loin tukawng tu a run pek. Abraham nih lunglawm tein tukawng cu raithawinak ah a hman.

Cun Pathian nih Abraham cu a thawh i, “Nangmah cu zeipoh te, na fapa ngeihchun hmanh, pek na ka sian ruang ah thlua ka'n chuah lai, tiah bia kaa kam. Na hrinsor tefa cu van arfi nakin an tam deuh lai. Ka bia na ngaih ruang ah nangmah chungkhar chung hin vawleicung mi vialte thlua chuah an si lai,” a ti.

//Baibal tuanbia laknak: Genesis 16-22//